1Nsɛm yi akyi no, ɔhene pagyaa Hamedata ba Haman, a odi mu no, bɔɔ n'aba so de ahemfo no ne ne nnamfo nyinaa hyɛɛ n'ase.
2Enti na wɔn a wɔwɔ ahemfi hɔ nyinaa bu no, efisɛ saa na ɔhene no ahyɛ ato hɔ nen. Nanso Modekai buu saa mmara no so.
3Enti ɔhene asomfo no, bisaa no sɛ: Adɛn nti na woyɛ ɔhene mmara ho asoɔden?
4Wotu no fo daa ne daa, nanso wammua wɔn. Afei wɔbɔɔ Haman amanneɛ sɛ Modekai nni ɔhene mmara so. Efisɛ Modekai aka akyerɛ wɔn sɛ ɔyɛ Yudani.
5Haman tee sɛ, Modekai mmu no no, ne bo fuwii yiye.
6Enti ɔbɔɔ ne tirim sɛ ɔbɛsɛe Yudafo a wɔwɔ Ahas-weros ahemman mu hɔ nyinaa.
7Enti Ɔhene Ahas-weros ahenni afe a ɛto so dumien no, Haman yɛɛ n'adwene sɛ ɔbɛbɔ ntonto, ahu ɔsram ko, ne da ko a, eye sɛ wɔsɛe Modekai abusua nyinaa. Ntonto no kosii ɔsram Adar mu.
Wɔhyɛ mmara tia Yudafo no8Ɛnna Haman bɔɔ ɔhene amanneɛ sɛ: Ɔman bi wɔ hɔ a emu nnipa apete w'ahemman mu ha baabiara. Wɔn mmara ne afoforo de nsɛ. Na wonni wo mmara so. Enti enye sɛ ɔhene wone wɔn tena.
9Enti sɛ ɔhene pɛ a, hyɛ mmara sɛ wɔnsɛe wɔn nyinaa, na metua sika, talente ɔpedu agu ɔhene fotow mu.
10Enti ɔhene penee so, na oyii ne nsatea mu pɛtea de sɔw mmara a wɔbɛyɛ atia Yudafo no ano.
11Na ɔhene ka kyerɛɛ Haman sɛ: Wode fa wo sika no, na yɛ saa ɔman no nea wopɛ biara.
12Enti ɔsram a edi kan no da ɛto so dumiɛnsa no, wohyiaa ɔhene akyerɛwfo no nyinaa, na Haman hyɛɛ wɔn sɛ wɔnkyerɛw lɛtɛ wɔ ɔhene din mu nkɔma atemmufo ne ɔmansin asoafo a wɔwɔ Etiopia ne India nyinaa. Wɔyɛ amansin aduonu asɔn. Wɔnkyerɛw lɛtɛ no wɔ obiara ankasa kasa mu.
13Wɔde ahyɛde yi kyinii Ahas-weros ahemman afanan nyinaa sɛ wɔnsɛe Yudafo no nyinaa ɔsram a ɛto dumien no mu, a ɛyɛ Adar, na wɔnfow wɔn nneɛma.
Who We AreWhat We EelieveWhat We Do
2025 by iamachristian.org,Inc All rights reserved.
