Ester Nhoma 1 - KYER?W KRONKRON（ATWDB）

Modekai Adaeso

1Nhoma ahorow bi mu no, 11.2—12.6 ne Ɔfa A 1—17 ɛwɔ ha yi yɛ pɛ.

2Ɛyɛ Ɔhene Ahas-weros ahenni afe a ɛto so abien, ɔsram Nisan da a edi kan no, na Yair ba Modekai, a ne nena ne Shimei a ɔyɛ Kish ba, na ofi Benyamin abusua mu no, soo dae.

3Ɔyɛ Yudani a ɔte Susa ahenkurow mu, ɔyɛ onipa kɛse a na ɔsom wɔ ɔhene no asenniibea.

4Ɔka nnommum a Babel hene Nebukadnesar de wɔn fii Yerusalem a ɛwɔ Yudea, Yuda hene Yekonia bere so no ho. Ne dae no ni:

5Dede ne basabasayɛ, apenanaa, asasewosow ne hooyɛ wɔ asase so.

6Afei awɔ akɛse abien ni, a wɔasiesie wɔn ho rebɛko. Wɔbobom ma ɛyɛ hu.

7Wɔn mmobom no nti, aman nyinaa yɛɛ krado sɛ wɔrebɛko atia ɔmantrenee no.

8Ɛyɛ esum ne kusuu da, a amanehunu, ɔyaw ne gyegyeegye wom wɔ asase so.

9Na ɛhaw ɔman trenee no nyinaa, efisɛ na wosuro bɔne a ɛreba wɔn so no.

10Na wosu frɛɛ Awurade. Wɔn su a ɛte sɛ asu ketewa no, asu kɛse fii mu bae, ma wonyaa nsu pii.

11Hann bae, ma awia maa ne ho so, na wɔpagyaa mmɔborɔfo de hyɛɛ adehye aniwu.

12Modekai huu wɔ ne dae yi mu, nea Awurade asi ne bo sɛ ɔbɛyɛ. Onyan fii ne dae mu no, ɛhyɛɛ ne so da mu no nyinaa, hwehwɛe sɛ ɔbɛte dae no ase awie prɛko.

Ahas-weros apontow

13 Eyi akyi na saa nneɛma yi sisii wɔ ɔhene Ahas-weros bere so. Ɛyɛ ɔno Ahas-weros koro no ara na odii hene wɔ amansin bɛboro ɔha aduonu ason so, fi India kosi Etiopia.

14 Saa nna no mu a wɔde no dii hene wɔ Susa ahenkurow mu no,

15 ne mfe abiɛsa so, ɔtow pon maa ne nnamfo, ne atitiriwfo bi a wofi Persia, ne Mede ne aban mpanyimfo a wɔhwɛ amansin no so.

16 Eyi akyi a ɔde n'ahemman no mu ahonyade ne afɛfɛde dodow akyerɛ saa ara nna ɔha aduɔwɔtwe no, na afahyɛ no rekɔ n'awiei no,

17 ɔtow pon foforo a ɛyɛ asanom nkutoo, maa nnipa horow a wofi aman horow so na wɔtete ahenkurow no mu. Eyi kɔɔ so ara nnansia wɔ ahemfi hɔ.

18 Wɔde asaawa a ɛyɛ fɛ awene ntama de asensɛn hɔ, na wɔde asaawa a ebiridum de ayɛ nhama de akyerekyere sika ne dwetɛ apon de akɔsoa Odum a wɔde marboro ne abo foforo ayɛ ho. Wɔde sika kɔkɔɔ ne dwetɛ nneɛma ayɛ fam hɔ fɛfɛɛfɛ. Wɔde agude nyinaa mu titiriw marboro adi dwuma nso wɔ hɔ. Wɔde ntama a ɛyɛ fɛ asesɛw hɔ na wɔde nhwiren ahorow a ɛyɛ fɛ atwa ho ahyia.

19 Wɔde sika kɔkɔɔ ne dwetɛ nkuruwa nketenkete a wɔasiesie no a ne bo bɛyɛ talente aduasa asisi hɔ. Nsa dɔkɔdɔkɔ abu so ama ɔhene sɛ otumi nom.

20 Mmara bi nna asanom no ho, obiara nom nea obetumi. Saa na ɔhene ahyɛ ne nkoa no, sɛ wɔnyɛ mma ɔno ne n'ahɔho no nen.

21 Bere koro no ara na ɔhemmea Wasti nso atow pon ama ahemfi mmea no, wɔ beae a ɔhene Ahas-weros wɔ no.

Wɔpam ɔhemmea Wasti

22 Da a ɛto so ason a ɔhene Ahas-weros ani agye no, ɔfrɛɛ Haman, Basan, Tara, Borase, Satolta, Abatasa ne Taraba a ɔyɛ opiani a ɔto so ason a wɔsom no no, na osee wɔn sɛ

23 wɔnkɔfa ɔhemmea no mmrɛ no, na wɔmfa no mpue gua, sɛ ɔhemmea, na wɔmfa ahenkyɛw no nhyɛ no, na aman horow sofo ne aban mpanyimfo a aba hɔ no nhu n'ahoɔfɛ. Efisɛ ne ho yɛ fɛ.

24 Nanso ɔhemmea Wasti ampɛ sɛ obetie ɔhene no, sɛ ɔne apiafo no bɛkɔ. Eyi haw ɔhene no na ɛmaa ne bo fuwii.

25 Na ɔka kyerɛɛ ne nnamfo no sɛ: Saa na Wasti abua me, mommu asɛm yi ho ntɛn.

26 Arkesaeu, Sarsataeu, ne Malesea a wɔyɛ aban mpanyimfo a wofi Persia ne Mede, na wɔte bɛn ɔhene no, baa ne nkyɛn

27 bɛkyerɛɛ nea ɔhene nyɛ ɔhemmea Wasti, sɛ wantie ɔhene, na ɔne apiafo no amma.

28 Mukaeu ka kyerɛɛ ɔhene ne aban mpanyimfo a ahyia hɔ no sɛ: Ɔhemmea Wasti abu ɔhene ne mpanyimfo a ahyia hɔ no nyinaa animtiaa.

29 Na ɔkaa nea ɔhemmea no kae ne bu a obuu ɔhene mmara so no kyerɛɛ wɔn, sɛ wabu ɔhene mmara no so.

30 Enti mmea animdefo a wɔyɛ Persiafo ne Mediafo ahemfo yerenom te eyi a, ɛbɛma wɔabu wɔn kununom animtiaa saa ara.

31 Enti sɛ ɔhene pɛ a ɔmma mmara bi mfi ne hɔ, na wɔn kyerɛw no Persia ne Media mmara mu, na wɔannan ani sɛ: Wasti mmma ɔhene Ahas-weros anim bio, na ɔhene mfa ne dibea no mma ne yɔnko a oye sen no.

32 Ma wɔnkan mmara ko a ɔhene de bɛba no, wɔ ahemman no baabiara, sɛnea ɛbɛyɛ a mmea de nidi bɛma wɔn kununom, sɛ wɔyɛ asikafo anaa ahiafo.

33 Saa asɛm yi sɔɔ ɔhene ne aban amradofo a ahyia hɔ no ani, na ɔhene yɛe sɛnea Memukan kae no.

34 Na ɔhene de mmara no soma kɔɔ n'ahemman no afanan nyinaa, na afei ɔde kɔɔ amansin nyinaa sɛnea wɔn kasa te, sɛnea ɛbɛyɛ a ofi biara mu wɔde obu bɛma okununom.