1 Makabe 13 - KYER?W KRONKRON（ATWDB）

Simon di ade

1Simon tee sɛ Trifo aboaboa asraafo pii ano de rebɛsɛe Yuda,

2na ohui sɛ ne nkurɔfo no suro. Enti ɔkɔɔ Yerusalem, kɔboaboaa nkurɔfo no ano.

3ɔhyɛɛ wɔn nkuran sɛ: Mo ara munim nneɛma akɛse a, me nua mmarima no ne me, ne m'agya fi ayɛ ama mmara no ne asɔrefi ha. Munim akodi ne ɔhaw ahorow a me ne me nuanom ahu.

4Ama, me nuanom nyinaa awuwu Israel nti, na me nkutoo na maka.

5Afei ɛmpare me sɛ ahokyere bere a ɛte sɛɛ no, mɛka sɛ merebɔ me ho aguaa, agye me kra nkwa, efisɛ minnye nsen me nuanom.

6Nanso, me man, ne asɔrefi yi, ne mo yerenom ne mmofra yi nti, mɛtɔ were. Efisɛ amanaman atwa ahyia, nam ɔtan so rebɛsɛe yɛn.

7Nnipa no tee asɛm yi no, wonyaa honhom mu nkuranhyɛ bi.

8na wɔde nne kɛse teɛɛm sɛ: Wobɛyɛ yɛn dikanfo asi wo nuanom Yuda ne Yonatan anan mu,

9ako yɛn ko ama yɛn, na nea woka biara no yɛbɛyɛ.

10Enti ɔboaboaa akofo no nyinaa ano, na ntɛm ara wowiee Yerusalem afasu no si. Na wɔbɔɔ ho ban wɔ afanan nyinaa.

11Ɔsomaa Absalom ba Yonatan kɔɔ Yopa, de asraafo dɔm kaa ne ho, kodii ɛhɔfo no so, na wɔtenaa hɔ.

Trifo atoro ne ne nsisi

12Afei Trifo ne asraafo pii fii Polemi kɔtoo Yuda, a Yonatan ka n'aboafo no ho.

13Simon kɔbɔɔ nsra wɔ Adida a ɛkyerɛ petee fam hɔ.

14Trifo tee Simon asɔre asi ne nua Yonatan anan mu, na ɔpɛ sɛ ɔne no ko, enti ɔsomaa abɔfo kɔɔ ne nkyɛn sɛ:

15Na wo nua Yonatan de adehye fotow no mu ka, ɛnam ne dibea nti, na yekura ne mu.

16Soma fa sika dwetɛ talente ɔha, na fa ne mma baanu bɛsom, na sɛ yegyaa no a, wantow atua. Sɛ woyɛ eyi a yebegyaa no.

17Simon huu sɛ asɛm no nyɛ nokware, nanso ɔde sika no ne nnipa no kɔe, nea ɛbɛyɛ a, basabasa bi remma nnipa no mu na wɔnka sɛ:

18Ɛyɛ Simon na wamfa sika ne nnipa no ankɔ nti na yɛrehu amane yi.

19Enti ɔde nnipa no ne sika no kɔe, nanso Trifo anni n'asɛm so, na wannyaa Yonatan amma wɔn.

20Eyi akyi no, Trifo kɔtoaa ɔman no sɛe no, na otwaa ho hyiae koduu Adora. Nanso Simon ne n'asraafo no kɔɔ so bɔɔ nsra, dii no nhwɛnim ara, baabiara a ɔkɔe.

21Afei mmarima a wɔwɔ abandennen no mu no, kɔɔ so somaa abɔfo, de nkra kɔmaa Trifo sɛ ɔmmfa sare so kwan mfa aduan mmrɛ wɔn.

22Enti Trifo siesiee n'apɔnkɔsotefo sɛ wɔrekɔ, nanso anadwo no ara sukyerɛma pii tɔe, enti wɔantumi ankɔ. Enti ɔde n'ani kyerɛɛ Gilead asase so.

23Ɔredu Baskama no, okum Yonatan siee no wɔ hɔ.

24Afei Trifo san kɔɔ ne kurom.

Yonatan damoa

25Simon koyiyii ne nua Yonatan nnompe kosiee no wɔ n'agyanom asase so wɔ Modein.

26Israelfo nyinaa suu no kɛse na wɔyɛɛ nyi nna pii.

27Na Simon de abo a ɛyɛ fɛ, yɛɛ nkaedum tenten a wohu no baabiara wɔ n'agya ne ne nuanom nna so.

28Afei osisii nkaedum ason a biara ne ne yɔnko di nhwɛnim wɔ n'agya ne ne na ne ne nuanom baanan no nna no so.

29Nkaedum no so no, ɔyɛɛ ade bi sonowonko. Ɔyɛɛ nkyekyɛmu bi, na biara so no, ɔyɛɛ atuo ne akode sɛ ɛnyɛ nkae daa, ɛno akyi no ɔyɛɛ ahyɛn mfonini, na ama wɔn a wɔkɔ po no ahu.

30Eyi ne nkaedum a ɔyɛɛ no Modein. Na ɛwɔ besi nnɛ.

31Trifo nam nsisi so, kum ɔhene Antioku.

32Na odii hene wɔ n'anan mu, hyɛɛ Asia ahenkyɛw no, nam so de ɔhaw pii baa asase no so.

33Nanso Simon si abannennen a ɛwɔ Yudea no, twaa ɛho afasu hyiae, afasu no soso na ɛyɛ atenten, na aban no mu na ɔkora ne nnuan.

34Simon somaa abɔfo kɔɔ ɔhene Demetri no sɛ ɔmma ɔman no home kakra, na nea Trifo yɛe ne sɛ ɔbɛfow ade.

35Ohene Demetri penee n'adesrɛ no so, na ɔkyerɛwee saa lɛtɛ yi kɔmaa no.

36Ɔhene Demetri de nkyia kɔma, ɔsɔfo panyin Simon, a ɔyɛ ahemfo adamfo ne Yuda mpanyimfo.

37Yɛn nsa aka sika ahenkyɛw ne brɛw a mode somae no, na yɛayɛ krado sɛ yɛne mo bɛyɛ asomdwoe apam, na yɛrekyerɛw akɔma mpanyimfo no sɛ wɔmmma munntua tow bio.

38Sika biara a yɛatua ama mo no di mu, na abannennen amoasisi no nnyɛ mo dea.

39Yɛde mfomso biara a moayɛ abedu nnɛ no kyɛ, na agua no ho ka biara a mode no yɛde kyɛ. Na wɔrennye yow biara bio wɔ Yerusalem.

40Na sɛ obi di mu sɛ ɔbɛka yɛn asraafo no ho a, ɔkwan da hɔ, na asomdwoe mmra yɛn ntam.

41Na bɛyɛ mfe ɔha ne aduɔsɔn no, na amanaman mufo haw bi nni Yuda.

42na nnipa no kyerɛw eyi wɔ wɔn nhoma ne nhyehyɛe mu wɔ Ɔsɔfo panyin Simon, a ɔyɛ asraafo panyin ne Yuda dikanfo afe a edi kan no mu.

Simon di Gasara so panyin

43Nna no mu no Simon ne n'asraafo twaa Gasara ho hyiae, na wɔde ako mfiri baa kurow mu, bedii so nkonim, de gyee abannennen baako.

44Asraafo a wɔwɔ mfiri no mu no, yii wɔn ti wɔ kurow no mu, maa dede kɛse bae.

45Na kurow no mu mmarima, ne wɔn yerenom ne wɔn mma, de wɔn ntama a atetew foroo ɔfasu no, de nne kɛse teɛɛm, frɛɛ Simon sɛ ɔne wɔn nyɛ asomdwoe apam.

46Wose nhwɛ yɛn mfomso so ne yɛn nni, na mmom nya ayamhyehye ma yɛn.

47Enti Simon ne wɔn yɛɛ asomdwoe apam na ɔko no gyaee. Nanso otuu wɔn fii kurow no mu, na odwiraa afi a wɔde abosom agu ho fi no, na ɔde nnwonto ne ayeyi hyɛɛ hɔ ma.

48Oyii nea ɛho ntew biara hɔ, na ɔde mmara sodifo tenaa hɔ. Afei omiaa ɛho banbɔ no mu, na osii ne fi wɔ hɔ.

Simon san nya Yerusalem abannennen no

49Ɔkwan amma ho, amma wɔn a wɔwɔ Yerusalem abannennen ankodi gua wɔ ɔman no mu. Enti ɔkɔm kɛse bae, maa wɔn mu pii wuwui.

50Afei wosu frɛɛ Simon sɛ ɔne wɔn nnyɛ asomdwoe apam ma ɔpenee, nanso otuu wɔn fii hɔ, yiyii ɛhɔ fi no, dwiraa hɔ.

51Afe ɔha aduɔsɔn biako no, sram a ɛto so abien no, da a ɛto so aduonu biako no, ɔde nnwonto, asaw asankubɔ ne berɛw hyɛn hɔ, efisɛ wɔadi ɔtamfo kɛse bi so wɔ Yerusalem.

52Simon hyɛe sɛ afe biara wɔmfa anigye nhyɛ saa da titiriw yi ho fa. Omiaa banbɔ mu fi asɔrefi koko no so koduu abannennen no ho, na ɔne n'sraafo no tenaa hɔ.

53Simon hui sɛ ne ba barima adu ne mpanyin afe so, enti ɔde no sii asraafo no so panyin de no tenaa Gasara.