Sirak 23 - KYER?W KRONKRON（ATWDB）

1O AWURADE, m’agya, ne m'abrabɔ so tumfo.

nnyaw me mma wɔn nhyehyɛe,

na wɔn nti mma menhwe ase!

2Na hena na ɔbɛbɔ me nsusuwii,

na watetew m'adwene ne me nyansa!

nea ɛbɛyɛ a ɔrennyaw me wɔ me mfomso mu,

na ɔnnkata n'ani me bɔne ho;

3Anyɛ a, me mfomso bɛdɔɔso,

na me bɔne nso adɔɔso!

na mahwe m’atamfo anim,

na m'atamfo ani agye.

4O Awurade, m’agya ne me Nyankopɔn a ɔhwɛ me nkwa so,

mma me aniwa a ɛnnsɔ ade,

5na tu bɔne pɛ fi me mu.

6Mma adidintraso, ne honam akɔnnɔ nhyɛ me so,

na nyi me mma animguasefo.

Tɛkrɛma sohwɛ

7Me mma monyɛ aso, ntie kyerɛkyerɛ a ɛfa tɛkrɛma ho

nea otie eyi no, wɔrenkyere no da.

8Wɔnam nea efi abɔnefo anom so na ɛkyere wɔn,

na wɔnam atɛmdidifo ne ahantanfo anom nsɛm so, na nsa ka wɔn.

9Mma ɛnyɛ wo ho ade sɛ wode w'ano bɛka ntam

anaa mma ɛnyɛ wo suban, sɛ daa ne daa, wobɔ Ɔkronkronni no din kɛkɛ.

10sɛnea bere biara ani wɔ akoa ho,

na akuru rempa ne ho da no,

saa ara na onipa biara a ɔka ntam,

na ɔbɔ ɔkronkronni no din kɛkɛ no te.

saa onipa no, ho rentew mfi bɔne mu da.

11Nea ɔka ntam pii no,

amumɔyɛ hyɛ ne mu ma,

na asotwe remfi ne fi mu da;

sɛ ɔfom ka ntam a, ne bɔne mpopa da,

na sɛ obu n’ani gu so a, ne bɔne yɛ mmɔho;

sɛ ɔka ntanhunu a, wɔremmu no bem da,

na mmusu bɛtena ne fi daa.

Kasafi

12Kasa bi wɔ hɔ a ɛte sɛ owu;

ɛnsɛ sɛ wohu bi wɔ Yakob asefo mu da.

Saa suban no nhyɛ Nyame anuonyam,

na wɔrentena bɔne mu.

13Mma ɛnyɛ wo suban sɛ wode w'ano bɛka kasa fi,

efisɛ bɔne bata ne ka ho.

14Kae w’agya ne wo na, bere a asi wo yiye no;

anyɛ a, w’ani befi wɔn so.

na woabɔ nkwasea bra afa suban bɔne;

na wobɛpɛ sɛ, anka wɔanwo wo koraa a anka eye,

na wobɛdome da a wɔde woo wo.

15Nnipa a adapaabɔ ayɛ wɔn suban no,

rennya ahohyɛso wɔn nkwa nna nyinaa.

Ahuhubra

16Nnipa horow abien ma bɔne dɔɔso,

nea ɔto so abiɛsa no de abufuw ba.

Abufuwhyew a ɛdɛw sɛ gya no,

rennum, gye sɛ ɛsɛe ade ansa;

nea ɔne ne ho nnipa pɛɛ da no,

rennyae da, gye sɛ gya no ahyew no ansa.

17Oguamanfo de, aduan nyinaa yɛ dɛ;

ɔrennyae da kosi sɛ obewu.

18Nea ɔyɛ bɔne tia n’aware mpa no,

se ne ho sɛ: Hena na ohu me?

Sum abɔ me ho ban, na afasu akata me so,

na obiara nhu me. Dɛn nti na ɛsɛ sɛ misuro?

Ɔsorosoroni no remmu bɔne ho akontaa.

19Ne suro no yɛ nnipa ani so,

na ɔnkae sɛ Awurade aniwa

hyerɛn mmɔho ɔpedu sen awia;

ehu onipa akwan nyinaa

na ehu hintabea nyinaa nso.

20Ansa na wɔrebɛbɔ wiase no, na onim ne nyinaa.

saa ara nso na onim sɛnea ɛte wɔ adebɔ awiei.

21Wɔbɛtwe saa onipa yi aso wɔ ahenkurow no abɔnten so,

na nea anidaso nni hɔ koraa no, ɛhɔ na wobɛso ne mu.

22Saa ara na ɛte wɔ ɔbea a ogyaa ne kunu,

na ɔde ne ho ma ɔbarima foforo sɛ ɔhene ba.

23Efisɛ nea edi kan no, wabu Ɔsorosoroni no mmara so;

nea ɛto so abien, wayɛ bɔne atia ne kunu;

nea ɛto so abiɛsa, ɔde aguamammɔ ato aware ho mmara.

na ɔne onipa foforo awo mma.

24Wɔde ɔno ara bɛba baguafo anim,

na wɔbɛtwe ɔne ne mma aso.

25Ne mma no rennya ntini,

na ne baa nso rensow aba.

26Obegyaw animguase sɛ ne nkae ade,

na n’animguase rempopa da.

27Sɛ owu a, wɔn a wobedi n'ade no,

behu sɛ biribiara nsen Nyamesuro,

na biribiara nyɛ dɛ nsen sɛ

wubedi Awurade mmarasɛm so.