Sirak 24 - KYER?W KRONKRON（ATWDB）

Nyansa ho ayeyi

1Nyansa kamfo ne ho,

na ɔka n'anuonyam wɔ ne nkurɔfo mu.

2Obebue n’ano wɔ Ɔsorosorohene no nhyiam ase,

na ɔbɛhyɛ ne ho anuonyam wɔ ne nkurɔfo anim:

3Mifi Ɔsorosorohene no anom na maba,

na mebɛkataa asase ani sɛ omununkum.

4Metenaa ɔsoro mu soro,

na m’ahengua wɔ omununkum dum mu.

5Me nkutoo na mebɔɔ ɔsoro ne emu dɔ,

na metwaa emu dɔ no mu bon.

6Po asorɔkye mu, ne asase nyinaa so,

nnipa nyinaa mu, ne aman horow nyinaa so;

mewɔ agyapade wɔ mu.

7Eyinom nyinaa mu no, mehwehwɛɛ ahomegyebea,

na mansin bɛn mu na mɛtena?

8Afei abɔde nyinaa so tumfo no hyɛɛ me mmara,

na nea ɔbɔɔ me no, maa me baabi a mesi me ntamadan.

Na osee me sɛ: Yɛ wo tenabea wɔ Yakob mu,

na gye w’agyapade wɔ Israel mu.

9Efi mmeresanten, mfiase no, na ɔbɔɔ me,

na nna nyinaa menya nkwa.

10Mesom wɔ ntamadan kronkron no mu wɔ n’anim

na saa nti ɛma mitim pintinn wɔ Sion.

11Na kurow a medɔ no no mu

na ɔmaa me ahomegyebea,

na Yerusalem bɛyɛɛ me kyɛfa;

12Nti m'ase timii animdefo mu,

wɔ AWURADE kyɛfa mu,

ɔno na ɔyɛ wɔn agyapade.

13Meyɛɛ tenten sɛ Lebanon nkyenduru nnua,

sɛ Ɔpepaw dua a ɛwɔ Hermon mmepɔw atifi.

14Meyɛɛ tenten sɛ Engedi abɛten,

ne Yeriko aduhuam nnua;

sɛ ngo dua fɛfɛ a ɛwɔ afum;

na meyɛɛ tenten sɛ dua a esi asubɔnten ho.

15Me ho yɛɛ huam

sɛ akesia ne yoma nhwiren,

me ho huam no gyee hɔ nyinaa sɛ aduhuam mapa,

sɛ nnuhuam ahorow a afrafra,

te sɛ aduhuam a wɔte nka wɔ ɔsom ntamadan mu.

16Metotoo m’abaa sɛ dua a ne ho tɔ no,

na m'abaa ho nso yɛ fɛ

na ɛhyɛ anuonyam ne ahomeka nso.

17me ho yɛɛ fɛ, te sɛ bobe a ɛregu nhwiren,

na m'ahoɔfɛ yɛɛ anuonyam ade na ɛsow aba pii.

19Mo a mopɛ me no, mommra me nkyɛn,

na mommedi m’aba no mmee.

20Efisɛ mokae me a ɛyɛ dɛ sen ɛwo,

na sɛ monya me a, ɛyɛ dɛ sen ɛwo mu aba.

21Wɔn a wɔtetew m'aba di no,

ɔkɔm renne wɔn bio,

na wɔn a wɔnom me me mu nsu no,

osukɔm renne wɔn bio.

22Nea otie m'asɛm no,

anim rengu ase,

na wɔn a wɔne me yɛ adwuma no,

renyɛ bɔne.

Nyansa ne mmara

23Eyi ne Ɔsorosoro Nyankopɔn no apam nhoma.

Mmara a Mose hyɛɛ yɛn no: Sɛ

ɛnyɛ agyapade mma Yakob asefo

25Nyansa no dɔɔso sɛ asubɔnten Pishon mu nsu,

na ɛte sɛ asubɔnten Tigri ho nnuaba a adi kan abere.

26Ebu fa so sɛ Euphrates, ma wonya mu ntease,

na ɛte sɛ Yordan mu nsu wɔ otwa bere mu.

27Ɛma nkyerɛkyerɛ sɛnea Asubɔten Nil hwie ne nsu,

sɛ Gihon nsu bere a wɔretetew bobe aba.

28Onipa a odii kan no

anhu nyansa papa,

na nea odi akyiri no anhu ne bo a ɛsom;

29Efisɛ nyansa adwene dɔɔso koraa sen po,

na n’adwene mu dɔ sen amoa donkudonku.

30Mede mete sɛ nsuka a efi asubɔnten mu,

ne nsukwan a ɛtene kɔ turo bi mu;

31Mekae sɛ: Megugu me nhaban so nsu

na mafɔw me nhwiren asase no,

na hwɛ, me nsuka no bɛdan asubɔnten,

na m’asubɔnten nso bɛdan po.

32Mɛma me nkyerɛkyerɛ ahyerɛn akɔ kan sɛ anɔpahema bio,

na mɛma ne hyerɛn akɔ akyiri;

33Afei nso, mɛma kyerɛkyerɛ akɔ so sɛ nkɔmhyɛ,

na mede ne nyinaa ama nkyirimma.

34Hu sɛ, me dwumadi mu no

anyɛ me nkutoo mfaso bi

mmom midi maa wɔn a

wɔhwehwɛ nimdeɛ nyinaa.