Ester Nhoma 16 - KYER?W KRONKRON（ATWDB）

Ɔhene Ahas-weros mmara no

1Eyi ne mmara nhoma no nhwɛso:

Ɔhempɔn Ahas-weros kyerɛw kɔma tumidifo a wɔhwɛ amansin ɔha aduonu ason no so fi India kɔpem Etiopia ne wɔn a wɔyɛ anokwafo ma aban no, mikyia mo.

2Nnipa pii wɔ hɔ a, mmere dodow a wɔn adɔfo de ayamye kɛse rehyɛ wɔn anuonyam no, mpɛn dodow no ara na wɔyɛ ahantan.

3Ɛnyɛ sɛ wɔpɛ sɛ wɔyɛ bɔne tia yɛn nkurɔfo nko, na mmom yiyeyɛ ho ahoɔyaw nti, wɔfa adwen bɔne de tia wɔn ankasa aboafo, a wɔdom wɔn no mpo.

4Ɛnyɛ sɛ wɔma nkurɔfo nnaase bɔ wɔn kwa, na mmom wotiw wɔn a wonnim papa yɛ so. Wotu wɔn ho, na wɔdwen sɛ wobefi Onyankopɔn a owie pɛyɛ na okyi bɔne no nsa. Ɔno na ohu biribiara daa nyinaa nso.

5Na mpɛn pii no, nnipa dodow bi, a wɔde wɔn asisi tumidibea no, de asodi bɛda wɔn ho so sɛ wɔka mogya a edi bem gu. Na basabasayɛ ne mmusu a wontumi nyɛ ho hwee no wɔka ho bi. Na wɔn nnamfo a wɔde amanyɛ mu dwumadi ahyɛ wɔn nsa no, na epiapia wɔn yɛ saa.

6Na saa nkurɔfo yi de wɔn atoro suban bɔne yi, daadaa ahemfo a wɔwɔ ɔpɛpa no.

7Nea wɔde amumɔyɛ anya a efi saa nkurɔfo no suban bɔne a ɛkɔ so daadaa a, efi wɔn a tumidi kura wɔn no, ɛnyɛ sɛ yehu no wɔ nea esii, na atetefo akyerɛw ato hɔ no mu nko; mmom yehu no wɔ nea ɛrekɔ so wɔ abrabɔ no mu mpirepiren yi ara.

8Daakye bi, yɛbɛhwɛ yiye, ama yɛn ahemman no mu adwo na asomdwoe aba mu ama nnipa nyinaa.

9Yɛbɛsakra akwan a yɛfa so yɛ ade, na da biara a asɛm bi ba yɛn anim no yebebu atɛn sɛnea ɛfata.

10Efisɛ Hamadata ba Haman a ɔyɛ Masedoniani, na ɔyɛ ɔhɔho wɔ yɛn mu (nokwarem no ɔyɛ ɔmamfrani, onni Persiafo mogya wɔ ne mu, na onni ahummɔbɔ su bi nso) bɛtenaa yɛn mu.

11Onyaa ntenayie wɔ yɛn mu, sɛnea yɛyɛ ma ɔman biara sofo no; wɔfrɛ no yɛn agya na daapem nyinaa nkurɔfo bɔ wɔn mu ase ma no, nti nnipa nyinaa fa no sɛ ɔno na ɔto so abien wɔ ahengua no so.

12Nanso ontumi nhyɛ n'abufuw so nti, ofii ase sɛ obegye yɛn ahenni no ne yɛn kra afi yɛn nsam.

13na ɔde anitew ne nnipa nyansa ne nnaadaa kae sɛ wonkum Mordekai, yɛn gyefo na yɛn domfo bere biara no. Ɔne Ester a ɔyɛ ahemman no mu ahotefo a afobu bi nni ne ho, ne ɔman no nyinaa.

14Osusuwii sɛ, ɔnam saa kwan no so, bɛma ne nsa aka yɛn a, ɔbanbɔfo bi nni hɔ, na ɔde Persia ahemman no akɔma Makedoniafo.

15Nanso yehui sɛ, Yudafo yi a, saa obusuyɛfo yi, a mprɛnsa ni, wabɔ wɔn ho pɔw sɛ wɔntɔre wɔn ase koraa no, nyɛ amumɔyɛfo, mmom wɔde mmara kronkron na ɛbɔ wɔn bra.

16Na wɔyɛ Ɔsorosoro hene, otumfo, ɔteasefo Nyankopɔn no mma. Ɔno na wahyehyɛ ahenni no ama yɛn ne yɛn agyanom.

17Ne saa nti, ɛbɛyɛ yie sɛ Hamadata ba Haman nhoma a ɔkyerɛwee no, mu nsɛm no, monni so.

18Efisɛ onipa a ɔyɛɛ saa nneɛma yi no, wɔasɛn ɔne ne fifo nyinaa wɔ Susa abɔnten so. Ɛnam so ama Onyankopɔn a ɔyɛ ade nyinaa so tumfo no de asotwe a ɛfata ama no ntɛm so.

19Ne saa nti, ma wɔmfa nhoma yi, mfomfam abɔnten so, ne baabiara, na momma kwan na Yudafo no mfa wɔn mmara mmu wɔn bra.

20Na momma wɔn asraafo no bi nka ho, na ɔbosom dummien, da a ɛto so dummiɛnsa no, yɛ Adar. Saa da no wɔde abɔ wɔn ho ban afi wɔn atamfo nsam.

21Efisɛ Onyankopɔn a odi ade nyinaa so tumi no, ahyɛ sɛ saa da yi nyɛ anigye da mma ne nkurɔfo, a wapaw wɔn no, na mmom ɛnyɛ da a wɔde sɛe wɔn.

22Enti momfa anigye pa, nni saa da yi, sɛ da sonowonko nka mo afahyɛ nna no ho.

23na agyina hɔ sɛ ogye ama mo, nnɛ ne daakye nyinaa, ne Persiafo anokwafo nso, na ayɛ ɔsɛe, nkae da ama wɔn a wɔbɔɔ yɛn ho apam bɔne no.

24Ahenkurow, anaa Ɔman biara, wonyi obiara mfi mu. Nea ɔrenni eyi so pɛpɛɛpɛ no, wɔde abufuhyew, ne peaw ne ogya bɛsɛe no. Ɛnyɛ sɛ nnipa nko na wɔbɛhwɛ ama ayɛ den ama wɔn, na mmom ɛbɛka mmoa ne nnomaa nyinaa nso bi.