Sirak 11 - KYER?W KRONKRON（ATWDB）

Tebea yɛ nsisi

1Ahobrɛasefo nyansa ma wɔma wɔn ti so,

na ɛde wɔn tena atitiriwfo mu.

2Nkamfo obi wɔ n’ahoɔfɛ nti,

anaasɛ obi wɔ ne ho tan nkutoo nti.

3Ɔwowa ne mmoa a wotu nyinaa mu ketewa,

nanso nea efi ne mu ba no yɛ dɛ

sen nneɛma a ɛyɛ dɛ nyinaa.

4Nkyerɛ wo ho sɛ wohyɛ atade a ɛyɛ fɛ,

nanso mma wo ho so w'ayeyi nti;

Efisɛ Awurade nnwuma yɛ nwonwa.

Na ɔde ne nnwuma ahintaw nnipa.

5Ahemfo dodow, na ɛbae sɛ wɔtenatena fam,

nanso obi a wɔannwen ne ho koraa no, ɔhyɛ ahenkyɛw no.

6Aman so difo pii anya animguase pɔtɔɔ,

na wɔde wɔn anuonyam ama afoforo.

Susuw eyi ho na fa mu aba

7Mmu fɔ ansa na wahwehwɛ asɛm no mu,

di kan hwehwɛ mu, ansa na woabu fɔ.

8Mma mmuae ansa na woatie asɛm no mu,

anaa ntware obi a ɔrekasa ano

wɔ n’asɛnka mfinimfini.

9Asɛm a ɛmfa wo ho no, mfa w'ano nto mu,

na ntena nnebɔneyɛfo mu bere a wodi asɛm.

10Me ba, mfa nneɛma pii nhaw wo ho.

sɛ wode adwuma pii bobɔ wo bo yɛ a, woremfa wo ho nni,

na sɛ wudi akyi a, worennwie,

na sɛ woguan nso a wɔbɛkyere wo.

11Nnipa bi wɔ hɔ a wɔyɛ adwuma a, wɔpere pii na wotu mmirika,

nanso wodi hia pii.

12Nnipa bi nso wɔ hɔ a wɔyɛ nyaa na wohia mmoa;

wonni ahoɔden na ohia kum wɔn;

nanso Awurade ahummɔbɔ aniwa no wɔ wɔn so wɔn yiyeyɛ ho.

Ɔpagyaw wɔn fi wɔn fam asetena no mu,

13na ɔma wɔn so

ma ɛyɛ nnipa pii nwonwa.

14Nneɛma pa ne ade bɔne,

nkwa ne owu, ohia ne ahonya,

fi Awurade hɔ na ɛba.

17Awurade akyɛde wɔ hɔ ma

wɔn a wosuro Nyame,

na n'adom de nkonimdi a enni awiei ba.

18Nnipa bi wɔ hɔ a, wɔn ahonya fi

mmɔdemmɔ ne ahopakyi mu,

na akatua a, ɛfata no ni.

19Sɛ ɔka se: Manya home,

na afei de merebedi me brɛ so ade a,

Onnim bere dodow no,

kosi sɛ ɔbɛdan agya binom na wawu.

20Ma w’ani nna w’apam no so, na di so,

na nyin wɔ w’adwumayɛ mu.

21Mma ɔdebɔneyɛni adwuma

nnyɛ wo fɛ,

mmom fa wo ho to Awurade so na dwen w’adwumayɛ ho;

Efisɛ ohiani yiyeyɛ yɛ mpofirim ne ntɛm so.

22Awurade nhyira

ne Nyamesuroni akatua,

na ntɛm ara Onyankopɔn ma ne

nhyira kɔ so ara yɛ frɔmfrɔm.

23Nka se: Dɛn na mihia,

na dɛn mfaso na ɛbɛsan ayɛ me de?

24Nka da se: Nea mewɔ yi ara dɔɔso,

na dɛn mmusu na daakye ɛbɛba me so?

25Ahonya bere no, onipa werɛ fi ohia,

na ohia bere mu no, onipa nkae bere pa.

26Efisɛ ɛnyɛ Awurade den,

sɛ da a onipa bewu no,

obetua no ka sɛnea n'adwuma te.

27Dɔnhwerew biako mu awerɛhow ma onipa

werɛ fi n'anigye a atwam no,

na onipa nkwa awiei no,

wɔbɛda ne nneyɛe adi.

28Nka se obi ani agye wɔ mmere a wonnim n'awiei,

na onipa awiei na ɛma wohu ne su.

Sɛ worefa nnamfo a hwɛ yiye

29Nnye obiara ani mma wo fi,

efisɛ nnaadaasɛm wɔ dodow no ara anom.

30Sɛnea anomaa te wɔ birebuw mu no,

saa ara na ɔhantanni adwene te,

na ɛte sɛ akwansrafo a wohu wo sintɔ.

31Efisɛ wɔyɛ komm twɛn, de papa dan bɔne,

na nneyɛe pa biara no wonya ho asɛm ka.

32Ogyaframa ma gyabiriw pii dɛw,

na ɔdebɔneyɛni yɛ komm twɛn

sɛ obehwie mogya agu.

33Hwɛ yiye wɔ ɔkwasea ho,

efisɛ ɔtwetwe ɔhaw ba,

na wo din ho begu fi afebɔɔ.

34Gye ahɔho bra wo fi,

na wɔde ɔhaw bɛbrɛ wo,

na wɔbɛma wo ne w’abusuafo ntam atoto.