2 Makabe 4 - KYER?W KRONKRON（ATWDB）

Simon, ne Onias nya akasakasa

1Simon, a kan no wɔbɔɔ ne din, sɛ ɔno na wakodi sika no ho nseku atia n'ankasa man, de guu Onias din ho fi, na ɔno hyɛ Heliodorus basabasayɛ no ase no, na ɔno ara ne mmusu no nyinaa farebae no,

2Otumi mpo kae sɛ, ɔno na ɔbɔɔ aban nnipa a wɔboa ahenkurow no ho pɔbɔne no. Onipa a ɔbɔ ne kuromfo ho ban, na ɔpɛ sɛ ne nkurɔfo bedi mmra so no.

3Bere a Simon nitan yɛɛ kɛse sɛ ne nkurɔfo a wɔtaa no no mu biako dii awu no,

4Onias huu sɛ nunkutwe no mu ayɛ den, na Menesteus a ne ba ne Apolonius a ɔyɛ Koelesiria ne Foenike amrado no maa Simon yaw yɛɛ kɛse no,

5ɔkɔɔ ɔhene hɔ, nyɛ sɛ ɔrekɔbɔ nkuromfo sobo, na mmom n'adwene sɛ yiyeyɛ bɛtena ɔman ne nkorowankorowa nyinaa ntam mu,

6Ohui sɛ, sɛ ɔhene no anwɛn n'aso atie ɔman no asɛm no yiye a, asomdwoe ne nsiesie pa remma amansɛm no mu bio, na Simon rennyae nkwaseasɛm no.

7Bere a Seleusus wui na Antiokus a wɔfrɛ no Epifanes bedii hene no, Onias nua Yason nam ademudegye so bedii sɔfopanyin,

8ɔhyɛɛ ɔhene no bɔ sɛ, ɔbɛma no dwetɛ talent ahasa aduosia, na wafi tow mu, ama no talent aduowɔtwe.

9Ɔhyɛɛ bɔ bio sɛ, sɛ wɔma no kwan ma ɔde ne tumi si agodibea na ɔkyerɛw Yerusalem mmerante ne mmabaa, din sɛ wɔyɛ Antiokiafo a, obetua sika ɔha aduonum aka ho.

10Bere a ɔhene penee so, na Yason nyaa dibea no, ntɛm ara na ɔdan ɔmanfo no asetena sɛ wɔmfa Helafo abrabɔ kwan so mmɔ bra.

11Ɔde Yudafo bere so ahensɛm no too nkyɛn, na ɔfaa Yohane a n’agya ne Eupolemus so ne Romafo ayɔnkofa ne nkitahodi yɛɛ den, nam so de mmara foforo ne amammerɛ a ɛnyɛ Yudafo de baa ɔman no mu.

12N'ani gyei sɛ obesisi agodibea ahorow wɔ Yudafo abankɛse no anim na ɔhyɛɛ mmerante no sɛ wɔnhyɛ Helafo kyɛw.

13Helafo asetena mu abrabɔ bedii akoten wɔ Yuda, afei ananafo bra nso baa ɔman no mu pii, na ɛsen Yason atirimmɔdensɛm ne n'abosonsom so.

14Afei na asɔfo no nna nsusuw wɔn afɔremuka so adwuma no ho bio. Wommu kronkronbea no hwee, na wobu wɔn ani gu afɔrebɔ so, mmom sɛ wohu dadebo tow no ho nsɛnkyerenne pɛ a ntɛm ara wokodi aguma wɔ agoprama so bere a mmara mma ho kwan.

15Wommu anuonyam nneɛma a wɔn agyanom ani kuu ho no hwee, na mmom Helafo anigyede abɔdin no, na ɛsom wɔn bo kɛse.

16Saa nti mmusu kɛse too wɔn, sɛ wɔn a anka Yudafo abrabɔ yɛ wɔn fɛ na wɔpɛɛ sɛ wosua no, bɛyɛɛ wɔn atamfo na wɔtwee wɔn aso.

17Ɛnyɛ ade ketewa sɛ Onyame fi mmara no wobebu no ade teta bi. Ɛyɛ nokwasɛm, na nneɛma a ebedi akyi sisi no bɛda no edi pefee.

Yason de Helafo amammerɛ ba Yuda

18Bere a wɔredi mfe anum biara agoru wɔ Tire na ɔhene wɔ hɔ bi no,

19Yason ɔbɔfo tuu nnipa fii Yerusalem kɔe sɛ wɔyɛ Antiokiafo, sɛ wɔnsoa dwetɛ karibo ahaasa mfa nkɔbɔ afɔre mma Herkules. Wɔn a wɔsoaa sika no, dwenee sɛ eye sɛ wɔde sika no kɔbɔ afɔre, efisɛ ennye sɛ wɔde bɛyɛ ade foforo bi.

20Nea ɔde sika no somae no botae, ne sɛ wɔmfa nkɔbɔ afɔre mma Herkules, mmom wɔn a wɔsoae no, adwene ne sɛ wɔmfa nkɔyɛ akodi ahyɛmma.

21Wɔsomaa Menesteus ba Apolonius Misraim, bere a wɔrebɛsoa Philometo hene no, Antiokus tee sɛ Philometo abɛyɛ ne tamfo a oko tia n’aban nti, ɔhwɛ bɔɔ ne ho ban. Saa nti oduu Yopa no, ɔde toaa so kɔɔ Yerusalem.

22Yason de anigye ne ahokeka hyiaa no kwan, na wɔde akanea a ɛredɛw framfram ne osebɔ de no kɔhyɛn kurow no mu. Akyiri no ɔne n'asraafo osiim kɔɔ Foenike.

Menalaus bɛyɛ ɔsɔfo panyin

23Mfe abiɛsa akyi no, Yason somaa Meneiaus, Simon a yɛabɔ ne din dedaw no nua, sɛ ɔmmfa sika nkɔma ɔhene no ma ɔmfa nwie nhoma no ho dwumadi nkae no.

24Nanso ɔde sika no maa ɔhene no ɔhyɛɛ no tumi so, gyee ɔsɔfopanyin dibea no maa nankasa ho, na ɔmaa Yason dwetɛ karibo ahaasa.

25Ne nsa kaa ɔhene mmara no, ɔsan n’akyi, bere a onni adansedi nhoma mpo, sɛ ɔyɛ ɔsɔfo panyin, mmom, ɔde abufuw, komaden, atirimmɔden ne ɔhamni suban na ɛbae.

26Nti Yason a ɔtaa n'ankasa nua no, ɔno nso obi bɛtaataa no. Wɔpam no sɛ ɔkobɔfo ma ɔyɛɛ ɔhamni kɔtenaa Amon asase so.

27Ɛwom sɛ Menelaus bedii dibea no de, nanso wantua sika a ɔhyɛɛ ho bɔ no mu biara amma ɔhene no.

28Bere a Sostratus a ɔyɛ ɔsafohene kɔɔ so ara dan no ka: Sɛ ɔno na sikagyigye ho dwumadi hyɛ ne nsa no, ɔhene no samaa wɔn baanu n'anim wɔ saa sikasɛm yi nti.

29Menelaus de n'ankasa nua Lisimakus yɛɛ n’abediakyiri sɛ ɔsɔfopanyin, na ɔde Sostratus nso yɛɛ Krate safohene wɔ Kipro asaafo no so.

Wokum Onias

30Nneɛma rekɔ so saa no, ɛbae sɛ, nnipa a wɔwɔ Tarsus ne Malus tew atua, efisɛ wɔde wɔn ahenkurow akyɛ Antiokus, a ɔyɛ ɔhene no mpena.

31Ne saa nti ɔhene no kɔɔ no ɔhare so sɛ: Ɔrekosiesie basabasa a asi no, enti ɔde n'akyi gyaw n'abediakyiri Andronikus, onipa a ne dibea krɔn, sɛ ɔnhwɛ akyi.

32Nanso Menelaus huu sɛ wanya bere pa de bɛyɛ nea ɔhwehwɛ no, owiaa asɔrefi sika kɔkɔɔ nkuruwa no bi, na ɔde maa Andronikus; na nkuruwa no bi nso, ɔtontɔn maa Tire ne nkuropɔn a ɛdeda wɔn nkyɛnkyɛn no.

33Bere a Onias huu nea akɔ so no, ɔkaa saa asɛm no too gua. Saa bere no na wadi kan aguan akohintaw wɔ kronkronbea a ɛwɔ Dafne a ɛbɛn Antiokia.

34Ne saa nti Manelaus frɛɛ Andronikus kɔɔ nkyɛn baabi na ɔhyɛɛ no sɛ onkum Onias. Andronikus baa Onias nkyɛn, nam nyansa kwan bi so hyɛɛ no bɔ, kyiaa ne nsam, de too no brada, bere koro no ara na Onias tirim yɛ no nann, sɛ obi fi kronkron hɔ afi adi. nanso Andrnikus de mmara too nkyɛn na ntɛm ara okum Onias.

Andronikus nya Asotwe

35Eyi nti, Yudafo no, ne amanaman binom, nso dii yaw, na wɔn bo antɔ wɔn yam da, wɔ Onias wu a amfa mmara kwan mu no ho.

36Bere a ɔhene no fi Kilikia bae no, Yudafo a wɔwɔ ahenkurow no mu, no kɔkotow srɛɛ no sɛ: Onias wu no ntease nni mu, na Helafo no nso mpene awudisɛm no so.

37Ne saa nti Antiokus dii yaw, ne awerɛhow, na osui, ɛnam owufo no abrabɔ pa ne suban pa nti.

38N'abufuw dodow nti, ɔworɔw Andronikus ne beredum atade no fii no ho, na ɔtetew mu, na ɔne no bɔɔ anan koduu beae a, odii Onias awu no, na okum owudifo no wɔ hɔ ara. Saa na Awurade tuaa ne bɔne no so ka.

Lisimakus ne Menelaus animguase

39Mmere a Lisimakus ne Menelaus aka abom ayɛ nneɛma bɔne pii atia ahenkurow no, na saa nneyɛe no ho nsɛm atene afa mmeaemmeae no, kurow no mufo no sɔre tiaa Lisimakus, esiane sɛ na wadi kan awiawia sika kɔkɔɔ nkuruwa no pii dedaw.

40Esiane sɛ na nnipa dodow no de abufuw resɔre nti no, Lisimakus de akode hyehyɛɛ nnipa bɛyɛ mpensa nsa, ma wɔsɔre bɔɔ ntoa a ntease nni mu. Na ɔbarima bi a wɔfrɛ no Auranus a ne mfe akɔ anim ara yiye na odii wɔn anim kan dii saa agyimisɛm no.

41Na bere a Yudafo no huu nea Lisimakus reyɛ no, ebinom tasee abo, afoforo tasee nnuasin na ebinom nso sesaw nso a egugu hɔ no, nsa ma nsa ma de anibere ne ahoyeraw nam basabasayɛ so totow de hyiaa Lisimakus ne ne dɔm no.

42Awiei no, wopirapiraa wɔn mu pii, na wokunkum binom nso, na ebinom fii nsa guan kɔe. Asɔredan mu ɔkorɔmfo no ankasa de wokum no too sikakorabea no ho pɛɛ.

43Wɔbɔɔ Menelaus sobo wɔ nea esii nyinaa ho.

44Bere a ɔhene no baa Tire no, nnipa baasa a ɔmanfo somaa wɔn no, de asɛm no kɔtoo n’anim.

45Nanso Menelaus a na onim dedaw sɛ onni anoyi pa biara no, dii kan Doremenes a ne ba ne Polemi no afonom sika kɛse, sɛ ɔnnan ɔhene adwene mma no.

46Ne saa nti Polemi frɛɛ ɔhene no wɔ nkyɛn ne no kɔɔ kokoam nkɔmmɔdi, sɛ ebia wɔkodidi, na ɔnam mu ara ma ɔhene no sesaa n’adwene.

47Enti ɔhene no de Menelaus a ɔde ɔhaw yi nyinaa bae no ho kyɛɛ no, yii no fii sobo a wɔde bɔɔ no no nyinaa ase. Mmom obuu asomafo mmɔborɔfo a, anka ɛsɛ sɛ wogyaa wɔn koraa no kumfɔ. Nanso Sinteke na odii wɔn asɛm a anka obegyaa wɔn.

48Ɛnam so ma wɔn a wɔkasa maa ahenkurow no ne ɛho nkuraase ne asɔrefi nkuruwa kronkron ho no, ntɛm so ara wonyaa asotwe a ɛmfata wɔn.

49Ne saa nti Tirefo mpo a awudisɛm yi anyɛ wɔn abodwo no boa yɛɛ wɔn ayi fɛfɛɛfɛ.

50Nanso Menelaus de, ɛnam wɔn a wodi tumi no adufudepɛ nti, ɔtenaa agua so ara. Na n'atirimmɔden no kɔɔ so ara, na onunuu ne beresofo no ase twitwatwitwaa wɔn anan mu.