Ester Nhoma 2 - KYER?W KRONKRON（ATWDB）

Ester bɛyɛ ɔhemmea

1Eyinom akyi no, ɔhene abufuw no baa fam. Na afei Wasti ho nsɛm nhaw no bio. Ɔhene were fii nea Wasti yɛe, ne nea ɔno nso yɛɛ no.

2Afei ɔhene asomfo no kae sɛ: Momma yɛnhwehwɛ mmabaa ahoɔfɛfo bi a, wodi mu mma ɔhene.

3Afei ɔhene mpaw adikanfo wɔ n'ahemman no mpasua nyinaa so, na wɔmpaw mmabun a wɔn ho yɛ fɛ wɔ ahenkurow no mu no mmra Susa ahemfi. Na wɔmma wɔn aduhuam, ne nea ehia biara, na wɔmfa wɔn nhyɛ ɔhene ayitotofo no nsa nhwɛ wɔn so.

4Na ababaa a ɔbɛsɔ ɔhene ani no, bɛyɛ ɔhemmea asi Wasti anan mu. Eyi sɔɔ ɔhene ani na ɔyɛɛ saa.

5Afei na Yudani bi wɔ Susa ahenkurow mu a, ne din ne: Modekai. N'agya de Yair, na ne nena ne Hyimei a ɔyɛ Kish ba, wofi Benyamin abusua mu.

6Wɔfaa no nnommum kaa nnipa a ɔhene Nebukadnesar de wɔn kɔɔ Babel no ho.

7Na wahwɛ abeawa bi a, ɔyɛ ne papa nuammarima Aminadab ba, a wɔfrɛ no Ester.

8Wɔhyɛɛ mmara yi no, mmabaa pii hyiae wɔ Susa ahenkurow no mu wɔ Gai anim. Ɔno na dwumadi no nyinaa hyɛ ne nsa. Na Ester nso kɔɔ hɔ bi.

9Ester sɔɔ Gai ani, na onyaa n'anim dom, nti ntɛm ara, ɔmaa no aduhuam, ne n'aduan no kyɛfa. Ɔhwɛɛ mmabaa baasɔn a wɔapaw wɔn afi ahemfi hɔ no, ne wɔn mmaawafo no yiye.

10Na Ester nkyerɛɛ baabi a ofi, efisɛ Modekai ahyɛ no sɛ ɔnyɛ sa.

11Na daa ne daa Modekai di ahemfi hɔ akɔneaba hwɛ nea ɛbɛyɛ Ester.

12Afei bere a ɛsɛ sɛ mmea no de kɔ ɔhene anim no yɛ asram dumien. Saa bere yi na ɛsɛ sɛ ɔde wie n'ahosiesie. Asram asia yɛ nea ɔde mire ngo ne aduhuam siesie ne ho, na asram asia a aka no yɛ mmea ahyehyɛde.

13Afei wɔpaw obi de no hyɛ ne nsa, de no kɔ ɔhene hɔ wɔ ahemfi hɔ.

14Ɔkɔ mu anwummere, na anɔpa no, ɔforo kɔ ahemfi a, ɛto so abien, nea oyitotoni Gai hwɛ mmea no so no wɔ. Afei ɔnkɔ ɔhene hɔ bio, gye sɛ wɔbɔ ne din frɛ no.

15Bere no dui sɛ Aminadab, Modekai papa nua babea Ester kohu ɔhene no, wampo nea oyitotoni Gai ka kyerɛɛ no mu biara, na Ester nyaa wɔn a wohuu no nyinaa anim dom.

16Enti Ester kohuu ɔhene Ahas-weros ɔsram a ɛto so dumien no mu. Eyɛ ɔsram Adar mu, ɔhene ahenni afe a ɛto so asɔn.

17Na ɔdɔɔ Ester, na onyaa ɔhene anim dom kyɛn mmabaa a aka no nyinaa. Na wɔde ahenkyɛw no hyɛɛ no.

18Na ɔhene tow pon nnansɔn maa ne nnamfo, ne ne mpanyimfo de hyɛɛ ɔne Ester aware no ho fa.

Ahintasɛm no da adi

19Saa bere no na Modekai som wɔ ahemfi hɔ.

20Nso na nea Mordekai aka nti, Ester nkaa nea ofi nkyerɛɛ obiara ɛ! Na osuro Awurade na odi ne mmara nsɛm so sɛ ɔwɔ ne hɔ nti, Ester ansakra ne bra.

21Esiane Modekai nneyɛe bi nti, ɛmaa ayitotofo a wɔbɔ ɔhene ho ban no bɔɔ pow sɛ wobekum Ɔhene Ahasweros.

22Modekai tee asɛm yi, na ɔbɔɔ Ester amanneɛ, na ɔno nso bɔɔ ɔhene amanneɛ.

23Ɔhene hwehwɛɛ ayitotofo no nsɛm mu, na okum wɔn. Ɔhene no ma wɔkyerɛw nea Modekai yɛe yi de too adehye nhoma korabea de hyɛɛ no anuonyam.