Nyansa 9 - KYER?W KRONKRON（ATWDB）

Solomon nyansa ho mpaebɔ

1Ao M’agyanom Nyankopɔn ne mmɔborohunufo AWURADE,

wo a wode w’asɛm ayɛ nneɛma nyinaa,

2na wode wo nyansa abɔ onipa dasani,

sɛ ɔnhwɛ w’abɔde so,

3na onni wiase so tumi

wɔ kronkronyɛ ne trenee mu,

na ɔmfa trenee mmu nnipa atɛn,

4fa w’ahengua ho nyansa no ma me,

na mpo me mmfi w’asomfo mu,

5efisɛ meyɛ w’akoa ne w’afenaa ba,

onipa a ɔyɛ mmerɛw na ne nkwa yɛ tiaa,

na ne ntease wɔ atemmu ne mmara mu sua;

6mpo nea odi mu wɔ nnipa mu no,

sɛ onni wo nyansa a wobu no sɛ ɔnyɛ hwee.

7Woapaw me sɛ ɔhene wɔ wo nkurɔfo so,

na menyɛ ɔtemmufo wɔ wo mmabanin ne wo mmabea so.

8Woahyɛ mmara sɛ wonsi

w’asɔredan wɔ wo bepɔw kronkron no so,

ne afɔremuka wɔ w'ahenkurow a, wote mu no mu,

nyɛ wo ntamadan kronkron a,

wosiesiei fi mfiase no sɛso.

9Nea onim w'adwuma no hu sɛ:

Wonim nyansa ampa,

na ɔwɔ hɔ bere a wobɔɔ wiase,

na ɔte nea eye w'ani so no ase,

ne nea ɛteɛ wɔ wo mmaransɛm no mu.

10Soma no fi soro kronkronbea hɔ bra,

na fi w’anuonyam ahengua no

so soma no bra,

na ɔne me mmɛyɛ adwuma

na minsua nea ɛsɔ w’ani.

11Efisɛ onim na ɔte nneɛma nyinaa ase,

na ɔbɛbɔ me ho ban nyansam wɔ me nneyɛe mu

na ɔde n’anuonyam awowaw me.

12Afei me nnwuma bɛsɔ ani,

na mebu me nkurɔfo atɛntrenee,

na mɛfata m’agya n’ahengua no.

13Na hena na obetumi asua

Onyankopɔn ho nyansa?

Anaasɛ hena na obetumi ahu nea AWURADE pɛ?

14Efisɛ onipa nsusuwii nyɛ hwee,

na yɛn nhyehyɛe betumi ayɛ ɔkwa.

15Esiane sɛ ɔhonam a ɛsɛe yi brɛ ɔkra no ase,

na yɛn asase so ntamadan yi yɛ adesoa ma adwene a emu dɔ.

16Ɛyɛ den sɛ yebetumi ahu nea ɛwɔ asase so,

na nea ɛbɛn yɛn mpo yɛbrɛ ansa na yɛahu,

na hena mpo na watumi akari nea ɛwɔ soro?

17Hena na watumi asua w'afotu,

gye sɛ woadom no nyansa,

na woasoma wo honhom kronkron no afi soro aba.

18Na saa na ɛma asase sofo di mu,

na wokyerɛkyerɛɛ wo nkurɔfo nea, ɛsɔ w'ani

na nyansa gyee wɔn nkwa.