1 Makabe 16 - KYER?W KRONKRON（ATWDB）

1Yohane fii Gasara, kɔkaa nea Kandebu ayɛ no nyinaa kyerɛɛ n'agya Simon.

2Na Simon frɛɛ ne mma mpanyimfo baanu, ka kyerɛɛ wɔn sɛ: Me ne me nuanom ne m'agya fi na yɛako ama Israel fi yɛn mmerantebere besi nnɛ, na nneɛma atotɔ yiye wɔ yɛn nsam, na yɛatumi agye Israel mmere pii.

3Nanso nnɛ manyin na Awurade adom nti, moadu mo mpanyin mfe so, Munsi me ne me nuanom anan nko mma yɛn man yi. Awurade nka mo ho.

4Enti Yohane paw ɔman no mu akofo ɔpeduonu ne apɔnkɔ, na wɔkɔtoaa Kendebu anadwo no ara wɔ Modien.

5Ade kyee anɔpahema ara pɛ na wɔde wɔn ani kyerɛɛ petee mu hɔ, beae a asraafo apɔnkɔsotefo ne fam de pii rehyia wɔn. Na asu bi da wɔn atam.

6Afei ɔne n'asraafo no hyiaa wɔn, na ohui sɛ asraafo no suro sɛ wobetwa asu no. Enti odii kan twae, na n'asraafo no huu saa no wotwa dii n'akyi.

7Enti ɔkyɛɛ asraafo no mu, na ɔde apɔnkɔsotefo no dii adɔnten, efisɛ na atamfo no apɔnkɔ so asraafo no dɔɔso.

8Wɔhyɛn trobɛnto no pɛ, na Kendebu asraafo no bɔɔ hu guanee. Bebree hwehwee ase pirapirae, na nkae no kɔhyɛɛ abannennen no mu.

9Saa bere no, Yohane nua Yuda pirae, nanso Yohane taa Kendebu ara kosii sɛ oduu Kedron beae a wasi no.

10Wogua hyɛɛ abannennen a ɛwɔ Asotu petee mu hɔ. Yohane de gya too mu, na nnipa bɛyɛ mpensa wuwui, na ɔsan baa Yudea asomdwoem.

Wokunkum Simon ne ne mma no

11Afei Abubu ba Polemi bedii Yeriko petee no so hene, na ɔwɔ dwetɛ ne sika kɔkɔɔ pii.

12Efisɛ na n'ase ne sɔfo panyin no.

13N'ani gyei pii, na ɔpɛ sɛ odi ɔman mu no so tumi, na ɔyɛɛ atoro nhyehyɛe bi tiaa Simon ne ne mma no sɛ obekum wɔn.

14Enti bere a Simon resrasra ne nkurow na ɔretietie wɔn ahiasɛm no, ɔne ne mma Matias ne Yuda kɔɔ Yeriko, wɔ afe ɔha aduɔsɔn ason no, ɔsram dabiako a wɔfrɛ no Shebat no mu.

15Abubu mma no nam atoro nyansa kwan bi so hyiaa wɔn wɔ abannennen ketewa bi a wɔasi a wɔfrɛ no Dok no mu. Ɔtow wɔn pon, nanso na atamfo hyɛ hɔ.

16Ber a Simon ne ne mma no abobow no, Polemi ne n'asraafo no, sɔre faa wɔn akode de kunkum Simon ne ne mma baanu no, ne wɔn nkoa no.

17Enti ɔde nsisi yɛɛ bɔne kɛse, ɔde bɔne tuaa papa so ka.

18Enti Polemi kyerɛw eyi ho nsɛm kɔmaa ɔhene no, srɛe sɛ wɔmfa asraafo mmɛboa no, na wɔmfa kurow ne ɔman no nhyɛ ne nsa.

19Ɔde asraafo kɔɔ Gasara sɛ wonkoyi Yohane mfi hɔ, ɔde nhoma kɔmaa asraafo mpanyimfo no sɛ wɔmmra mmegye dwetɛ ne sika kɔkɔɔ ne akyɛde;

20Ɔsomaa asraafo dɔm foforo sɛ wontu Yerusalem ne kronkronbea no so nsra.

21Nanso obi dii kan kɔbɔɔ Yohane amanneɛ wɔ Gasara sɛ n'agya ne ne nuanom awuwu, na wasoma nnipa sɛ womekum wo.

22Ɔtee eyi no ɛyɛɛ no nwonwa pii, enti ɔkyeree asomafo a wɔpɛe sɛ wokum no no, kunkum wɔn, efisɛ ohui sɛ wɔbaa no sɛe.

23Nneɛma nkae a Yohane yɛe, n'akosɛm ne akokodurusɛm, ne afasu a osi wiei, ne nea ɔyɛ maa ne man nyinaa,

24wɔakyerɛw wɔ asɔfo mpanyin nhoma mu, fi bere a ɔbɛyɛɛ ɔsɔfo panyin sii n'agya anan mu no.