Nyansa 12 - KYER?W KRONKRON（ATWDB）

1Efisɛ wo honhom a ɛte ase daa no

te ade nyinaa mu.

2Ne saa nti woteɛteɛ wɔn a wɔafom no

nkakrankakra,

na wokaekae wɔn na wobɔ wɔn kɔkɔ wɔ

nneɛma a wɔayɛ bɔne wɔ ho no ho,

ama wɔagyae bɔneyɛ

na wɔde wɔn werɛ ahyɛ wo mu,

O AWURADE.

Nyankopɔn abotare wɔ Kanaanfo bɔne ho

3 Deut 12.31; 18.9-13 Wɔn a tete bere no wɔtenaa

w’asase kronkron so no,

4wokyii wɔn brakyew no,

wɔn abayisɛm ne abosonsom ho.

5Wokyii wɔn wɔ wɔn mmofra a wokunkum wɔn atirimmɔden so,

ne wɔn afɔrebɔ afahyɛ a wodi

nnipa nam na wɔnom wɔn mogya no.

Eyinom fi abosonsom mu.

6Saa awofo a wohwie mogya a edi bem gu yi,

na woka too hɔ sɛ wobɛma yɛn

agyanom asɛe wɔn.

7efisɛ asase a ɛsom wo bo kɛse no

ayɛ kurow a ɛfata a,

Onyankopɔn no ankasa akyekyere.

8 Eks 23.28 Nanso mpo eyinom wo kyɛe wɔn so,

esiane sɛ wɔyɛ nnipa,

ɛna wosomaa nkotokurodu

dii w'asraafo anim

de sɛe wɔn nkakrankakra.

9Ɛnyɛ sɛ wuntumi

mfa wɔn a wonnim Nyame no

nnhyɛ atreneefo nsa wɔ akono,

anaasɛ wobɛsɛe wɔn prɛko pɛ

afa akekammoa anaa w'anom asɛm so ntɛm.

10 2 Es 9.11 Mmom worebu wɔn ntɛn nkakrankakra no, na worema wɔn bere sɛ wɔnsakra;

nso na wonim pefee sɛ

wɔn abɔse yɛ adebɔneyɛfo,

na bɔne mu na woo wɔn

na ɔkwan a wɔfa dwene rensakra da.

11Efisɛ wɔyɛ ɔman a wɔadome wɔn fi tete,

na ɛnyɛ sɛ osuro bi so nti

na wɔannya wɔn bɔne ho asotwe.

Onyankopɔn yɛ Ɔdeneho

12Na hena na obebisa sɛ: Dɛn ade na woayɛ yi?

anaa hena bɛko atia w’atemmu?

Hena bɛbɔ wo sobo sɛ:

Woasɛe aman a wo ara yɛe no?

Anaa hena bɛba w’anim

sɛ ɔkasamafo abetwitwa agye nnebɔneyɛfo?

13Efisɛ Onyame bi nni hɔ ka wo ho,

a n’ani ku ne mma ne n'abɔde nyinaa ho,

a ɛwɔ sɛ woyi w’ano kyerɛ no sɛ

woabu atɛnkyew;

14Anaa ɔhene, anaa nso ɔhempɔn bi nni hɔ a

obetumi atia wo wɔ wɔn a

woatwe wɔn aso ho.

15Woyɛ ɔtreneeni nti wodi tumi wɔ

ade nyinaa so pɛyɛ mu,

na ɛyɛ wo tumi akyiwade

sɛ wobebu obi a ɔtea no fɔ.

16Wo trenee mu na w'ahoɔden wɔ,

na wotumi so wɔn nyinaa so.

17Na wokyerɛ w’ahoɔden

bere a nnipa regye kyim wɔ wo tumi amapa no ho,

na wotwiw wɔn a wonim na wɔyɛ aniammɔnho no anim.

18Ɛwom sɛ woyɛ otumfo ne ɔhoɔdenfo de,

nanso w'atemmu yɛ brɛoo,

na abodwokyɛre kɛse mu na

wodi yɛn so pɛpɛ;

na wowɔ tumi a wɔde nea wopɛ biara.

Onyankopɔn kyerɛ Israelfo nyansa

19Wonam saa nnwuma yi so

akyerɛkyerɛ wo nkurɔfo sɛ:

Ɛsɛ nnipa trenee sɛ wɔyɛ ayamyefo

na wode anidaso pa ahyɛ wo mma ma,

efisɛ wowɔ bɔne fakyɛ.

20Na sɛ wode boasetɔ ne abadae

twe w'atamfo a wɔfata owu aso,

na woma wɔn bere ne kwan sɛ:

Wɔde begyae wɔn amumɔyɛ no.

21na afei wode basa a emu yɛ den

abu wo mma atɛn.

wɔn a wone wɔn agyanom

wɔ apam a bɔhyɛ wom no.

22Nti bere a woretew yɛn ho no,

na woretwe yɛn atamfo aso mpɛn apem.

ama sɛ yɛreyiyi ntɛn a yɛadwen wo papayɛ ho yiye,

na yɛn ani hwɛ kwan sɛ yɛn atemmu mu no wobehu yɛn mmɔbɔ.

Misraimfo asotwe

23Saa nti wɔn a wɔte bɔne mu na wɔbɔ ɔbrakyew no,

wonam wɔn ankasa bra bɔne so twee wɔn aso.

24Efisɛ wɔn bɔne kwan no twee wɔn kɔɔ akyiri

sɛ wogyee mmoa a wɔyɛ wɔn atamfo mpo sɛ wɔn anyame

wɔma wɔdaadaa wɔn sɛ mmofra agyimifo bi.

25Nti bɛka sɛ mmofra bi a wonni adwene no,

wobuu wɔn atɛn de dii wɔn ho few.

26Nanso wɔn a wommu anika brɛoo no,

benya Onyankopɔn atemmu a ɛsɛ wɔn.

27Wɔn amanehunu bere mu mpo no,

na wɔyɛ aduhuam ma abɔde a,

wɔafa wɔn ayɛ wɔn abosom no,

nea ɛnam wɔn so ma wonyaa asotwe no

Wohuu nokware Nyankopɔn no, nea wɔampɛ sɛ wobehu no no.

Saa nti wonyaa afobu kɛse.