Yudit 9 - KYER?W KRONKRON（ATWDB）

Yudif ne Mpaebɔ

1Na Yudif de n'anim butuw fam, na ɔde nso guu ne tirim, na oyii antweatam a ofura no; bere a wɔrehyew anwummere aduhuam wɔ Awurade fi wɔ Yerusalem no, na ɔde nne kɛse teɛɛm frɛɛ Awurade kae sɛ:

2O, Awurade Nyankopɔn, wo ne m'agya Simeon Nyankopɔn a womaa no afoa sɛ ɔmfa ntɔ were ananafo a, wɔatetew ɔbaabun ntama, apa ne srɛ ho de agu n’anim ase, na wɔasɛe n’awotwoa nso, efisɛ wokae sɛ, enni sɛ wɔyɛ saa, nanso wɔyɛe.

3Enti woyii wɔn mpanyimfo mae sɛ wonkum wɔn, ne wɔn mpa a animguase kae, wɔ nnaadaa bra a wɔbɔe no nti, na ɛso ayeyɛ mogya no, na wode ahemfo fraa nkoa twaa wɔn gui, ɛne ahemfo wɔ wɔn ahengua so.

4Wode wɔn yerenom mae sɛ asade, na wɔn mmabaa kɔɔ nnommum mu, na wɔn asade nyinaa nso wode maa wo mma adɔfo sɛ wɔnkyɛ mfa; wɔn a wɔtwee wɔn ho, na woampɛ sɛ wobegu wɔn mogya ho fi, na wɔkoto srɛɛ wo hɔ mmoa no. O, Awurade, me Nyankopɔn, tie me a meyɛ okunafo yi nso.

5Na wo na woayɛ saa nneɛma yi, nea atwam, ne nea ɛbɛba nyinaa. Wo na woahyehyɛ nneɛma a ɛwɔ hɔ mprempren ne nea ɛrebɛba nso. Yiw, w'atirimpɔw nyinaa abam pɛ;

6na w'agyinae a wutui no, yii wɔn ho adi kae sɛ: Hwɛ, yɛn ara ni! Efisɛ w'akwan nyinaa, woahyehyɛ ato hɔ fi tete, na w'atemmu nso woadi kan adwene ho.

7Afei Asiriafo no ni, wɔn ahoɔden dɔɔso pii, wotu wɔn ho ne wɔn apɔnkɔ, wɔn so tefo nti, na wɔsan tu wɔn ho, wɔ wɔn asraafo ne wɔn nkatabo, mpeaw ne wɔn kuntun nti. Nanso wonnim sɛ woyɛ Awurade a woko ma wo mma, na Awurade ne wo din.

8Fa w'abufuw bubu wɔn ahoɔden no gu, efisɛ wɔn adwene ne sɛ wobegu wo kronkronbea no ho fi, na wɔayɛ beae a wo din te no basabasa, na wɔde wɔn afoa abubu w'afɔremuka no mmɛn no.

9Hwɛ wɔn ahantan, na ma w’abufuhyew mmra wɔn atifi. Ma me a meyɛ okunafo yi atirimpɔw mmra mu.

10Na ma m’anofafa nnaadaa nkum akoa ne ɔhene, ne ne somfo; fa me ɔbea yi so sɛe wɔn ahantan.

11Efisɛ wo ahoɔden nnyina dodow so, na w’ahoɔden nso nnyina nnipa ahoɔden so. Woyɛ mmɔborohunufo Nyankopɔn, na woboa wɔn a wɔhyɛ wɔn so, na wukura wɔn a wɔyɛ mmerɛw mu, woyɛ ankonam boafo, ne wɔn a wɔn anidaso asa no, gyefo.

12Tie, O tie me, m'agya Nyankopɔn, Israel agyapade Nyankopɔn,. ɔsoro ne asase Nyankopɔn, wo na wobɔɔ nsu, abɔde nyinaa wura, tie me mpaebɔ!.

13Na me nnaadaa nsɛm yi nyɛ apirakuru ne akuru mma wɔn a wɔasusuw bɔne atia w'apam no ne wo bepɔw Sion ne wo mma a wɔte wɔn asase so no.

14Ma ɔman mu no nyinaa ne abusua biara nhu na wɔnte ase sɛ: Woyɛ Onyankopɔn, a tumi ne ahoɔden nyinaa wɔ wo. Onyankopɔn, biara nni hɔ a, ɔbɔ Israel ho ban sɛ wo nkutoo.