Zacarias 14 - Old Testament Quechua Wanca（QVW）

Tayta Dios mandacunanpämi nin

1Jerusalen malca, Tayta Diospa muyunnin janayquićhüñamá cacuyan; lluy ima cäniquicunactapis ñawpäniquićhümá aypunaculcanꞌa.

2Lluy nasyuncunäta Tayta Diosmi juntuycunꞌa ampa cuntrayqui śhalcapäcunanpä. Jinaptinmi malcayquita llalliycul wasiquicunacta waycälälinꞌa; walmiquicunactapis firsälälinꞌamá. Ćhawpi malcactamá prïsuctanu puśhaculcanꞌa; partillactañam jinaćhu caćhaycälälinꞌa.

3Chayćhümi Tayta Dios yalalcamul chay nasyuncunäwan pilyanꞌa sumä gïrraćhu pilyaśhannu.

4Chay muyunćhümá Jerusalenpa chimpan inti ishpimunan lädućhu cä Olivos ulꞌuman Tayta Dios jaluycunꞌa. Jinaptinmi inti ishpimunan lädupïta aśhta inti jiꞌalpunan läducama quićhacacüluptin jatun pampa licalinꞌa Azal läducama; jucnin partim nurti läduman aśhunꞌa, juccäñatacmi sur läduman.

5Chay pampanninpamari amcuna ayipäcunqui. Chay Juda lädup Uzias mandacünin cayaptin pachacuyuy pasäluptin ayipäcuśhayquinümari ayipäcunqui. Chayćhümá Tayta Diosní lluy salbaycuśhancunäwan śhapämunꞌa.

6Chay timpućhu manamá acchipis, alalaypis, nï asapis canꞌañachu.

7Chay muyunnuꞌa manamá juc muyun canꞌachu; chay muyunta Tayta Diosllamá lisiycun. Manañamari licaśhanchic muyunpis nï tutapis canꞌañachu; tutapapis acchica jinallam cayanꞌa.

8Chay muyunćhümi cawsä yacu, Jerusalenpi yalamunꞌa, usya timpućhüpis, tamya timpućhüpis. Parti yacum Wañüśha Lamar läduman linꞌa; juc partiñatacmari Mediterraneo lamar läduman linꞌa.

9Chay muyunćhümari jinantin pachäćhu Tayta Dioslla mandacüca canꞌa. Payllamari Tayta Dios canꞌa, paypa śhutillanmá lisishapis canꞌa.

10Jinantin Juda lädumari pasaypi pampaman muyunꞌa, Geba lädupïta aśhta Jerusalenpa sur lädunćhu cä Rimon läducama. Ñatac Jerusalenꞌa chay jina caśhan altullaćhümá tacyaycunꞌa. Chayćhümi nunacunaca yaćhapäcunꞌa Benjamin Puncupïta aśhta Punta Puncucama. Chay Punta Puncucta, Isquina Puncu nipäculam. Jinaman Hananeelpa Türrinpïta aśhta mandacücäpa üba apchichinancäcamari yaćhapäcunꞌa.

11Awari, Jerusalen malcaćhu nunacunaca yaćhapäcunꞌamá. Manañamá pampaman muyuchishañachu canꞌa; aśhwanpa jawcallañamari yaćhapäcunꞌa.

12Ñatac Jerusalenpa cuntran pilyä malcacunätá Tayta Diosmi juyu ishyaywan camacaycülunꞌa. Cawsayalcällaptinlämi aychancuna ismunꞌa, ñawincunapis caśhallanćhümi, alluncunapis shimincunallaćhümari ismupäcunꞌa.

13Chay muyunćhümi sumä-sumä manchachicuyta chay nunacunäman Tayta Dios ćhulaycülunꞌa. Jinaptinmi quiquin-pula maquinta ćhulanacul pilyapäcunꞌa.

14Chaynütacmi Juda läducunäpis Jerusalenćhu pilyawshipäcunꞌa. Jinalmi chay muyülïninćhu cä nasyuncunäpa ima cänincunactapis waycälälinꞌa: achca-achca ürucunacta, illaycunacta, müdanacunactapis.

15Chaynütacmi nunacunäman ćhächishan juyu ishyaycätatac chayćhu cä cawallucunäman, mulacunäman, camïllucunäman, aśhnucunäman, lluy ima uywacunämanpis ćhächinꞌa.

16Chaypïta Jerusalenpa cuntran śhalcü malcacunäpi quïdäcunämi watan-watan Jerusalenman lipäcunꞌa, Chucllachacuy Fistaćhu sumä munayniyu mandacü Tayta Diosta alawaycälï.

17Sïchuśh mayan malcapis sumä munayniyu mandacü Tayta Diosta alawä Jerusalenman mana liptinꞌa, chay malcaman tamya manamari ćhanꞌachu.

18Masqui Egiptopi calpis Chucllachacuy Fistaman mana lïcunätá Tayta Diosmari juc malcacunätanu chay ismuy ishyaywan mućhuycachinꞌa; jinaman tamyapis manamá ćhaycunꞌachu.

19Chaynüpamari Chucllachacuy Fistaman mana lïcunätá mućhuycachinꞌa, masqui Egipto ütac juc nasyuncuna cacuptinpis.

20Chay timpućhümi aśhta cawallucunäpa campanillan walcaläcunäćhüpis isquirbïsha canꞌa: “Tayta Diospä japächäśha chuyam” nil. Tayta Diospa alawana wasinćhu mancacunäpis uycuna patacćhu cä tasuncunänülämi chuya caycälinꞌa.

21Jinantin Juda lädućhu, Jerusalenćhu cä ima mancacunapis sumä munayniyu Tayta Diosllapä japächäśha chuyañamari capäcunꞌa. Mayanpis Tayta Diosman aychacunacta uycü śhapämul chay mancacunäta chalalculmi chayćhu yanupäcunꞌa. Ñatac chay muyunćhu sumä munayniyu Tayta Diospa alawana wasinćhu manañamari lanticücunapis canꞌañachu.