1Má, lulaśhüniqui, camaśhüniqui Tayta Diosmi caynu nin:
“Jacob, ama manchacuychu;
yaꞌami librayculac.
Israel śhutiquipam ayayculac; yaꞌapamari am canqui.
2Yacucunap chimpaptiqui amwanmi caycuśhä;
mayucunacta pasalpis manamá anuanquichu.
Ninap pasalpis manamá lupanquichu;
nina walayäca manamá lataycuśhunquipischu.
3Yaꞌamari Tayta Diosniqui cayá.
Yaꞌami salbäniqui, Israelpa Chuya Diosnin cayá.
Amcunacta libraycunacpämari ampïta
pägayculá Egiptocta, Etiopiacta, Sebactapis.
4Am, sumä ćhaniyümi, altuman juluycuśhämi,
cuyaśhämi yaꞌapä canqui.
Chaymi cawsayniquita salbaycunäpä nunacunäta,
nasyuncunäta pudirniqui uyculá.
5“Ama manchacuychu; amwanmi yaꞌa cayá.
Inti ishpimunan lädupïmi milayniquita puśhamuśhä;
inti jiꞌalpunan lädupïmi juntuycamuśhä.
6Nurti läductam ‘Paycunacta cutiycachimay’ nishä.
Sur läductañatacmi: ‘Chulïcunacta amañari chalacuycuychu.
Wamla chulïcunactapis cay pachap
manyanpïta puśhapämuyꞌari’ nishä.
7Yaꞌacta Tayta Diosnintanu licapämäcunätari puśhapämuy;
altuman juluycuśha canäpämari lulayculá;
yaꞌamari camayculá.
8“Ñawiyu cayalpis mana licä malcacunäta julapämuy;
linliyu cayalpis mana uyalïcunätari julapämuy.
9Lluy nasyuncuna jucllaman juntunaculcay;
jinantin malcacuna juntunaculcay.
Caycunapïta ¿mayanllá niyculatan?
¿Mayanllanꞌa willayculamá śhamü timpucunaćhu imacuna pasanantapis?
Sïchuśh willaculcaptinꞌa niycamänanchicpä ¿mayćhümá tistïguncuna cayalcan?
¿Mayantá rasunpa willaculcäśhanta niycamachwan?
10“Yaꞌapa tistïgüñatacmi am sirbïnïcuna capäcunqui;
amta aclapäculac yaꞌaman
chalapacalcämänayquipämi, lisipämänayquipämi;
jinaman yaꞌalla Tayta Dios
caśhäta tantiapäcunayquipämi.
Allaycuycäćhüpis śhamücäćhüpis
juc dios manamá canchu.
11Yaꞌallamá Tayta Dios cayá;
yaꞌallamari salbaycüca cayá;
juc manamari canchu.
12Yaꞌa Tayta Diosmari ní:
‘Yaꞌami willaculá, salbayculá, yaćhaycachilá.
Manamari juc taytachachu yaćhaycachila sinuꞌa yaꞌa quiquïmi.
Amcunañatacmi tistïgücuna capäculanqui.
13Imapis manalä captinmi yaꞌa Tayta Dios cayäläña.
Maquïpïta manamá pipis quitamanmanchu.
Yaꞌa lulaśhäta manamá mayanpis manalcachinmanchu’ ” nil.
Tayta Dios limalicuśhannümi Israel libraycuśha14Israelpa Chuya Tayta Diosnin, libraycüniquim nin:
“Amcunap allinniquipä Babiloniaman
pilyäcunacta caćhaptïmá paycuna ayiculcanꞌa;
Caldeo läducunäpis alawaculcäśhan
barcuncunaćhümari ayipäcunꞌa.
15Yaꞌamá Tayta Diosniqui, Chuya Diosniqui cayá.
Yaꞌamari lulaycüca, Israelpa mandacüninca cayá.
16Lamarcäćhu caminucta quićhaycü,
sumä-sumä yacucta wicman-cayman laquï
Tayta Diosmari niyan.
17Yaꞌamá Egiptopïta sumä-cama pilyäcunacta carritancunactawan
cawallucunacta yalachimulá camacaycünäpä.
Yacup lulinman jiꞌalpächiptïmá anualälila;
michïru wañulpücänümá wañucalpälila.
18“Má, punta pasaśhancunäta amañari yalpalayalcaychu;
unay pasaśhancunäman amaña pinsalayalcaychu.
19Cananꞌa muśhütañamá yaꞌa lulaycuśhä.
Chay camalaycuśhañamari caycunꞌa.
¿Manachun yaćhapäcunqui imatá?
Chunyäcäćhümari caminucta caśhan quićhaycuśhä;
chaqui allpacunäćhümari mayucunacta licalichimuśhä.
20Munti uywacunapis allinpamá licaycälimanꞌa;
atücunapis, tucucunap wawincunapis alawapämanꞌamá.
Aclacuśhá malca upyapäcunanpämari
chunyäcunäćhu yacucunacta paćhyachimuśhä.
Chaqui allpacunäćhüpis mayucunacta licalichimuśhämá.
21Cay malcäta quiquïpämari lulayculá;
altuman juluycuśha caśhätamá paycuna willaycälinꞌa.
22“Ñatac am Jacob, manamá ayacamälanquichu;
am Israel, yaꞌapïta pishipälunquiñamá.
23Cañaywan uycamänayquipä uwishcunacta manamá apamulanquichu.
Uycamänayquiwanpis manamá altuman julaycamälanquichu.
Manamari uycuna micuycunacta uycapämänayquipä jicutälacchu
nïtac insinsiucta umänayquipäpis piñachipäculacchu.
24Mishqui aśhnä śhuꞌuśhtapis uycamänayquipä
manamá lantimulanquichu;
uycamäśhayqui uywacunap wilancunawanpis
manamá maćhaycachimälanquichu.
Aśhwanpam juchayquicunacta tawapaycämanqui;
mana allin lulayniquicunawanmi amïchimanqui.
25“Awari, cuyacuyniyu caśhä-laycumá, chay mana allin
lulayniquicunacta yaꞌalla chincaycachïman;
chay juchayquicunacta manañamá yalpalcuśhächu.
26Má, licaycuśhunꞌari; imapis nimänayqui captinꞌa, nimayꞌari;
mana juchayu caśhayquita má niycamayꞌari.
27Puntapïmari wamä awquilluyqui cuntrá lulala;
lluy yaćhachïniquicunapis mana allintamari lulälälila.
28Chaypïmi alawana wasip puydïnincunacta pinꞌayman ćhulayculá;
Jacobta lluy camacaycünanpämi camachilá;
sumä pinꞌaymanmi Israelta ćhulayculá.
Who We AreWhat We EelieveWhat We Do
2025 by iamachristian.org,Inc All rights reserved.
