1Tayta Diosllay, linlïcunawanmi uyalipäculá.
Awquillücunapis punta timpucunaćhu
paycunawan ima lulaśhayquicunacta willapämälamá.
2Juc nasyuncunäta am quiquiqui alapaculculmi
awquillücunacta chayman tacyaycachilanqui.
Chay malcacunäta sumä ñacalcachilmi
awquillücunacta allinman ćhulayculanqui.
3Manamá quiquinpa ispädallanwanchu chay allpacta pudiracaycälila,
nïtac quiquinpa callpallanwanchu libraculcäla,
sinuꞌa allï maquiquiwanmi, callpayquiwanmi librayculanqui.
Paycunacta cuyalmá sumä cayniquiwan yanapayculanqui.
4Am Tayta Diosnillämi mandacüní canqui.
Amllamá Jacobta llalliycachinqui.
5Amwanmá ćhïnicünïcunacta llalliycälí.
Śhutiquiwanmá cunträcunacta jalutacälälí.
6Flïchäman manamá chalapacüchu.
Ispädäpis manamá llalliycachimanmanchu.
7Anmá ćhïnimänïcunapïta licaycälimälanqui.
Anmá cunträcunacta pinꞌayman ćhulayculanqui.
8Am Tayta Diosllätam imaypis alawaycälishayqui.
Śhutiquitamá imaypis sulpäta uycälishayqui. Selah
9Cananñatacmi jitälälimanqui,
pinꞌayman ćhulaycälälimanqui.
Pilyänanpä cä nunäcunawanpis manañamá yalunquiñachu.
10Chaymá ćhïnicünïcunap ñawpäninpïta ayiculcälá.
Cunträcuna lluy imäcunactapis munaśhantamá apaculcan.
11Wañuchisha canapä uwishtanümá ćhulaycalälimanqui.
Lluy malcacunämanmá chiꞌilälichimanqui.
12Malcayquita dinbaldillamá uycülunqui.
Chay uycuśhayquiwan imactamá julucunqui.
13Muyülïnïćhu cäcunaca jamuyapämänanpämá muyülächimanqui.
Lluy asipäcalcämänanpä, jalutacalcämänanpämá ćhulaycälälimanqui.
14Mana allin malcacunaca limacalcämänanpämá lulälälimanqui.
Licapämalmá umanta aywishtin asipäcalcäman.
15Uyshulächishallañam walan-walanpis caycú.
Pinꞌacuypi cäräpis pampällaćhüñamá cayan.
16Chaynu cayá cunträcuna, usuchimänïcuna,
cutichicü ćhïnimänïcuna pinꞌayman
ćhulapämal jamuyapämaptinmá.
17Caycuna pasayalcäman manamá unꞌälälishacpïchu.
Limalicuśhayquita uchucllapis manamá unꞌaycälilächu.
18Amta manamá ipanchalacchu.
Ćhaquïcunapis caminuyquipi manamá juc läduman lilachu.
19Chaychun atücunap maćhayninman jitaycälälimanquiman.
Chaychun sumä tutawyaycäwan ñitïlälichimanquiman.
20Am Tayta Diosnïpa śhutiquita unꞌäläliptí ütac taytachacunacta alawaycäliptí,
21¿manachun yaćhanquiman cala imatá,
śhunꞌüćhu pacaläśha cäcunätapis tuquicta yaćhayalꞌa?
22Am-laycumá, imaypis wañuycällapä licaycuśha capäcú.
Uwish ćhipïsha cananpä licapäśhancänümi capäcú.
23Taytallay, ¡licaćhacuyñari! ¿Imapïmi puñuyanqui?
Taytallay, ¡licaćhacuyñari! Amaña pasaypipä caćhaycälälimaychu.
24¿Imapïmá yaꞌacunapi pacacuycunqui?
¿Imapïmá caynu ñacaynïcunaćhu,
sasachacuynïcunaćhu unꞌälälimanqui?
25Pampäcama pinꞌayman ćhulaycuśhamá cayalcá.
Pampäćhüñamá lätaycaćhayalcá.
26¡Śhalcuyñari yanapaycälimänayquipä!
¡Llaquipayniquiwanꞌari libraycälillämay!
Who We AreWhat We EelieveWhat We Do
2025 by iamachristian.org,Inc All rights reserved.
