Esdras 6 - Old Testament Quechua Wanca（QVW）

1Niptinmi chay isquirbishacta mandacü Dario ashichila Babiloniaćhu imapis ćhaniyünin juntuna cäcäćhu.

2Chaymi Media lädućhu cä Acmetap palasyunćhu punta mandacünincunap ima lulaynincunapis isquirbisha caśhanta talïlälin.

Chayćhümi caynu isquirbïsha caña:

3“Ciro wamä wata mandacuyninćhümi Jerusalenćhu cä Tayta Diospa alawana wasinpi caynu camachin: ‘Alawana wasip simintunta allaycul pilapäcuy. Jinalcul chayćhu cañaywan Tayta Diosman uycäliy. Chay alawana wasi ishcay ćhunca anćhishniyu (27) mitrum altunmanpis anchunmanpis canꞌa.

4Quimsa pasayćhu-cama jatućhä lumicunacta pilapäculmi chaypa jananmanñatac juc ilucta-cama ćhulapäcunqui. Lluy gastapäcuśhayquitañatacmi mandacücäpa illay juntünin pägaycunꞌa.

5Ñatac Nabucodonosor Tayta Diospa alawana wasinpi ürucunäta, illaycunäta Babiloniaman apachishancäñatacmi Jerusalenman cutichimuśha canꞌa. Jinaculmi Tayta Diospa alawana wasinćhu may caśhancällaman cutiycachisha canꞌa’ ” nil.

6Chaynu nishanta licayculmi mandacü Dario Eufrates mayup chimpa lädup puydïnin Tatnaita, Setar-boznaita, lulawshï-masincunapäwan camachila cay nil:

“Amcuná, Jerusalenta caćhaycapäcuyña.

7Yaśhacunaca lluy puydïnincunawanHag 2.21. Tayta Diospa alawana wasinta jina śhalcachipäcuchun. Ama mićhaculcaychu.

8Ñatac Israel lädup yaśhancunaca Tayta Diospa alawana wasinta śhalcachipäcuśhanćhu yanapapäcunqui. Eufrates mayup chimpan malcacunaca alcabälacunacta timpullanćhu pägapäcuśhayquiwanꞌari yanapapäcuy. Chaynüpaćh lulaśhancunaca mana manalcunꞌachu.

9Jinaman Jerusalenćhu sasirdüticunaca nipäcuśhanmannümi janay pachäćhu cä Tayta Diosman cañaywan uycälinanpä muyun-muyun mana mićhacänacullal wäcacunacta, carnicunacta, uwishcunacta, trïgucunacta, caćhicunacta, bïnucunacta, asayticunacta uycälinayqui.

10Chayćha paycuna janay pachäćhu cä Tayta Diospa munaśhanmannu uycälinꞌa, jinaman yaꞌa mandacücäpäpis chulïcunapäpis Tayta Diosta mañaculcanꞌa.

11Ñatac cay camachishäta mana cäsucücätá wasip ilunwan pasalcachil wañuchisham canꞌa. Wasinpis pampaman lluy muyuchishamari canꞌa.

12Cay camachishäta mana cäpa licaycul alawana wasicta pampaman muyuchiyta munäcätá, Jerusalenćhu yaćhananpä aclacü Tayta Dios camacaycüchun. Masqui mandacü ütac nasyuncuna cacuptinpis mana cäpa licäcätá pampaman muyuchishari cachun.

Yaꞌa mandacü Dariom caynu cananpä camayächí. Cay nishämannümari lulaycuśha canꞌa” nil.

Alawana wasictam ishpilpachin

13Chaynu mandacü Dario cartaćhu imam nishantanüllamari Eufrates mayup chimpa lädup puydïnin Tatnai, jinaman Setar-boznai lulawshï-masincunawan lulaycapäcula.

14Chaynu willacü Hageo, jinaman Iddop chulin Zacarias willapayaptinmi Israel lädup yaśhancuna mana manalcullal allin lulapäcula.Esd 5.1-2; Hag 1.1; Zac 1.1. Chaynütac Israel lädup Tayta Diosnin, jinaman Persiap mandacünin Ciro, Dario, Artajerjes nishanmannümari alawana wasicta ishpichipäcula.

15Chay Persiap mandacünin Dario süta wata mandacuyninćhu Adar quillap quimsa muyunninćhümi alawana wasi camacäśha cala.

16Chaymi israelcunaca, sasirdüticunaca, levitacunaca, jinaman prïsu caśhanpi lluy cutimücunaca sumä cushisha Tayta Diospa alawana wasin ishpishanpïta fistachaculcäla.

17Chay japächaycuśhanćhümi Tayta Diosman uycapäcula: paćhac (100) wäcacunacta, ishcay paćhac (200) carnicunacta, tawa paćhac (400) uwishcunacta, jinaman ćhunca ishcayniyu (12) capishcunactapis. Juc capishmi ayllupïta-cama juchan pampachaycuśha cananpä cañaywan uycuśha cala.

18Chaypïtam Moises camachishanmannu sasirdüticunäta, levitacunäta lulayninman-cama tücaśhanman ćhulala Jerusalenćhu Tayta Diosta sirbipäcunanpä.

19Chayćhu prïsu puśhaśhanpi cutimücunämi Tayta Dios Libraycuśhan Fistacta lulapäcula wamä quillap ćhunca tawayu (14) muyunninćhu.Exo 12.1-20; Deut 16.1-8.

20Chayćhümi sasirdüticunäwan levitacunaca chuyanchacälälil chuyaña cayalcäla. Jinalculmi quiquinpä, sasirdüti-masincunapä, prïsu caśhanpi cutimücunäpäpis chay fistaćhu uwishta uycapäcula.

21Jinalculmi chay fistaćhu prïsu caśhanpi cutimücunaca micapäcula. Paycunawan cuscatacmi micapäcula Israelpa Tayta Diosninta sirbiyninwan malcacunap anla millachicuy lulaynincunapïta laquicücunäpis.Neh 9.2; 10.28; 13.3.

22Chay Mana Libadürayu Tanta Fistacta sumä cushisham anćhish muyun lulapäcula. Chay Asiria lädup mandacüninwan allinpä licaycachil, Israelpa Tayta Diosninpa alawana wasinta śhalcachiyta Tayta Dios yanapächishanpïtamari chaynu lulapäcula.