1Sionćhu cä Tayta Diosnillay,
amllamá alawaycuna canqui.
Limaliculcäśhäcunacta lulaycapäcunämá.
2Amllamari mañacuynïcunacta uyaliycunqui.
Amllamanmá lluy nunacunäpis śhapämun.
3Mana allinnïcuna ćhänalächimaptinpis
amllamá pampachaycälimanqui.
4Am caśhayqui alawana wasićhu
yaćhananpä aclaycuśhayqui,
puśhaycuśhayqui nunaca cushisha cachun.
Wasiquićhu sumä cäniquicunawanläćha,
yaćhaśhayquićhu chuya cäcunäwanläćha maćhaycuśhapis capäcuśhä.
5Am salbamäní Tayta Diosllamá mañacuylläta uyaliycul
sumä allin tincünincunamanlä uycapämanqui.
Jinantin pachäćhu cäcunäpis,
aśhta cay pachäpa manyanćhu cäcunäpis
amllamanmá chalapaculcan.
6Amllamá munayniquiwan, callpayquiwan
ulꞌucunätapis sumä tacyaycachinqui.
7Amtacmá jawcayaycachinqui lamarca piñälicuśhanta,
yacucunaca wicapacamuśhancunäta,
malcacunäpa piñäśha lüyatityapäcuśhancunactapis.
8Cay sumä lulayniquicunäpïtamá
cay pachäpa manyanćhu yaćhäcunäpis äśhalayllaman camapäcunꞌa.
Inti yalamunancäpïta aśhta inti chincalpunancama
amllamá sumä cushicuyta uycunqui.
9Amllamá cay pachäta ñawillayquićhu caycachil sumä-sumä cäniyüta uywaycunqui.
Am Tayta Diosllämi juntay-juntay mayuyquicunawan
trïgucunacta malcayquipä wiñaycachinqui.
Chaynüpamá ćhaclacunäćhu wiñaycachinqui.
10Anmá ćhaclacunäta tamyayquiwan puśhtaycachinqui,
śhucancunapapis yacuyquita liycachinqui,
culpancunactapis wichiycachinqui,
lluy wiñäcunätapis allintamari ishpiycachinqui.
11Amllamá watan-watan sumä tuquicta ishpiycachinqui.
Mana ishpinancunäćhüpis micuycuna tuqui-camamá ishpiycun.
12Chunyäcunäćhu pastucunäpis tuqui-camallamá cayalcan.
Ulꞌucunäpis cushicuywanmá müdapaculcan.
13Pampacunäćhüpis uywacunallamá lancalayalcan.
Ćhaclacunäpis trïgucunawan pampäśhamá cayalcan.
¡Lluy-lluymá cushicuypïta apalipäcun, taquipäcun!
Who We AreWhat We EelieveWhat We Do
2025 by iamachristian.org,Inc All rights reserved.
