Salmos 41 - Old Testament Quechua Wanca（QVW）

Allinyaycachinanpämi mañacunDavid isquirbishan taquinapä; taquïcunäpa puydïninpämi.

1Cushisha cachun pishi callpayücunäta, mana cäniyücunäta yanapaycüca.

Paytam sasachacuy muyuncunaćhüpis

Tayta Dios yanapaycunꞌa.

2Quiquin Tayta Diosmá ñawillanćhu

licaycul cawsayniyüta uywaycunꞌa.

Cay allpäćhu sumä cushishamá caycunꞌa.

Ćhïnicünincunap maquinman manamá ćhulaycunꞌachu.

3Cämaćhu ishyä cäcunäta

Tayta Diosmá callpanchaycunꞌa.

Ishyayninpi allinyaycachinꞌamá.

4Cananñatacmi yaꞌa nilá:

“Tayta Diosllay, cuntrayquimá juchacta lulällá.

Llaquipaycallämalꞌari allinyaycachillämay.

5Ćhïnimänïcunam mana allinnïta munayninwan limapäcun:

‘¿Imayćha wañunꞌa? ¿Imayñamá śhutinta pasaypi unꞌäśhun?’ nil.

6Watucüní śhapämulpis janä shimillanwanmi limapapäman.

Śhunꞌunćhüpis mana allincällacta uywayalcalmá

waśhaman yalülälilꞌa äśhacuśhallaña pulipäcun.

7“Ćhïnimänïcunamá juntunacaycälil cuntrá limapäcun.

Juchäpi ñacaśhäta pinsapäculmá nipäcun:

8‘Supaycäćha caytá ishyächin;

cämaćhüña cayalꞌa manañamá śhalcunꞌañachu’ nil.

9Sumä apanacuśhälämi, chalapacuśhälämi,

cusca micuśhäcälämi ipanchäní licalïlun.

10Am Tayta Diosnillay llaquipaycallämayꞌari.

Śhalcachillämay tincüninman cutiycachinäpä.

11“Ćhïnimänïcuna mana llalliycamaptinmi

ampa śhunꞌuyquipänu caśhäta yaćhayculläśhä.

12Munaśhayquimannu allinlla cawsaycuyaptiꞌa

manamá caćhaycallämanquichu;

ñawillayquićhümá imaypis tacyaycachillämanqui.

13“Israelpa Tayta Diosnin una-unaypi

imaycamapis altuman juluycuśha cachun. Chaynu cachun” nil.