1¡Asiria läducuna imanuylä capäcunqui!
Juccunacta waycayalcalpis amcuna,
manalämá waycaśhachu capäcunqui.
Juccunacta ipanchayalcalpis amcuna,
manalämá ipanchaśhachu capäcunqui.
Juccunacta waycayta camacäluptiquimá,
amcunapis waycaśha capäcunqui.
Juccunacta ipanchayta camacäluptiquimá,
amcunapis ipanchäśha capäcunqui.
2 Tayta Diosllay, yaꞌacunacta llaquipaycälillämay;
amllamanmá chalapaculcá.
Walan-walanꞌari callpanchaycälillämay;
ñacay timpucunaćhu salbaycälillämayꞌari.
3Sumä bululunyaynu cä limalcuyniquita uyalïlälilmá
malcacunaca ayiculcan.
Śhalculcuptiquimá nasyuncunaca wicta-cayta liculcan.
4Maynümi paćhcaśhca, puyuca malluycul talpuycunacta camacaycülun,
chaynümá Asiriamanpis shipucaycälil lluy camacaycälälinꞌa.
5Janay pachäćhu yaćhä Tayta Diosñatacmi ichá
altuman juluycuśha canꞌa.
Paymá tincüllanman cäcäta,
rasun cäcällacta Sionćhu timpuycachin.
6Chay muyunćhu paymari am Sionta sumä tacyaycachishunqui.
Paymari yaćhaycäta, tantiaycäta,
jinaman salbaycuycätapis alli-allicta timpuycachinꞌa.
Tayta Diosta manchacuywan cawsaśhayquicämi
sumä cäniquinu caycunꞌa.
7Má, cananꞌa allin-cama pilyäniquicuna cällicunäćhümá apalcaćhapäcun.
Jawcayay cananpä willacüniquicunapis llaqui-llaquictamá waꞌapäcun.
8Caminuyquicuna pasaypi pulumäśhañamá cayan.
Manañamari mayanpis pulinñachu.
Tistïgucunäpa ñawpäninćhu limalinaculcäśhanta
imapis manañamá ucunchu.
Malcacunäta ipanchälunmá; nunacunäta jalutacülunñamá.
9Allpaca llaquillaćhu cayalmá lawticacalpun.
Pinꞌacuypïmá Libano lädu awicalpun.
Saron pampa chaqui chunyäman muyüśhañamá cayan;
Basanwan Carmelo ulꞌupis pasaypi jinanllañamá quïdälälin.
10 Tayta Diosñatacmi nin:
“Canan-pacham śhalcuśhä;
canan-pacham sumä caynïta,
sumä munaynïta camalachicuśhä.
11Amcuna ima lulay pinsapäcuśhayquipis
üśhanülla, päśhanüllamá cayan.
Quiquiquip jäcayllayquimá ninaman licalilcul camacaycälälishunqui.
12Nasyuncunämá cañaycüśha ućhpanu capäcunꞌa.
Cuchüśha caśhanümá ninaman jitaycüśha lupanꞌa.
13Am, calućhu cä nasyuncuna cay lulaśhäta uyalipäcuy.
Am, sircallaćhu cäcunaca sumä pudirnïta tantiapäcuy.
14“Juchasapacunaca Sionćhu chucchupäcunmá.
Tayta Diosta mana manchacücunämi
sumä-sumä manchäśha nipäcun:
‘¿Mayanmá cay nina camacaycücäćhu awantaycuchwan?
¿Mayanmá cay sumä-sumä walayä ninaćhu cawsaycuchwan?’ ” nil.
15Cawsaycunꞌa tincüllanman cawsaycüca,
cällanman limaycüca, ingañacuywan illayta mana talïca,
yanꞌalpi imactapis uycunanpä mana mañacüca,
nuna-masinta wañuchinanpä nishancunäta
uyaliytapis mana munäcunaca; chaynütac
mana allin luläcäta mana licananpä imchicuycücämari cawsaycunꞌa.
16Chaynu cawsäcämari altućhu cawsaycunꞌa.
Masïsu tacyaycü wancacunälämi pacaycüninpis caycunꞌa.
Micuycäwan yacuca imaypis manamá pishiycunꞌachu.
17Ñawiquicuna licapäcunꞌa mandacüca sumä cayninćhu cayätamá.
Allpacunaca mas calu-calucunaćhülä
caśhantamá ñawiqui licapäcunꞌa.
18Sumä-sumä chucchuśhayquita yalpalmi nipäcunqui:
“¿Mayćhütá alcabäla pägucta fintä Asirio läducunaca cayalcan?
¿Mayćhütá alcabäla pägucuna ayca caśhantapis tupücunaca cayalcan?
¿Mayćhütá ayca türricuna caśhantapis licäcunaca cayalcan?” nil.
19Chaynu nï nunatucüśha cä, juyu-cama cä,
jucnü-cama, mana tantiapaśh limayniyu nunacunäta
amcuna manañamari licapäcunquiñachu.
20Aśhwanpa chuya fistacunacta lulana cä
Sion malcactañam licapäcunqui;
Jerusalenćhu jawcalla, allin cawsaytañamari licapäcunqui.
Ishtacawan sumä tacyächisha,
watuwan sumä chalächisha carpanümá
chay malca sumä tacyaycunꞌa.
21Chayćhümi sumä munayniyu Tayta Dios
yaꞌanchicpa atajaycüninchic caycunꞌa.
Achca-achca yacuyu jatun mayunümari caycunꞌa
ćhïnicücunaca mana chimpapämunanpä
barcucunapis mana pasapämunanpä.
22 Tayta Diosmá caminaycamäninchic;
paymá puydïninchic, mandäninchic.
Paymá ñawillanćhu caycachil salbaycamäśhunpis.
23Ćhïnicüniquicunap barcunpa watuncuna
pasaypi wayäśhañamá cayan.
Jatun caśhpincunactapis manañamá tacyachinñachu;
barcup lataśhnincunapis lapïshañamá cayan.
Achca-achca waycaśhancunactamá aypunaculcanꞌa;
aśhta wishtunnincunapis waycaśha cäcunäta apaculcanꞌamá.
24Israelćhu yaćhäcunaca manañamá
nipäcunꞌachu: “Ishyayämi” nil.
Chayćhu yaćhäcunäpa juchancunacta
Tayta Diosñamari pampachaycunꞌa.
Who We AreWhat We EelieveWhat We Do
2025 by iamachristian.org,Inc All rights reserved.
