Deuteronomio 13 - Old Testament Quechua Wanca（QVW）

Tayta Diospa willacünintucücunäta wañuchinanpämi nin

1“Amcunaćhu Tayta Diospa willacünintucul ütac suyñucunaćhu ima pasanantapis willacütucücuna licalimunꞌam. Paycuna siñalcunacta, äśhalayllaman camanacunactam nishunqui.

2Chay siñalcuna, äśhalayllaman camanapä nishancunaca lulacacüluptin nipäcuśhunquimari: ‘Mana lisishayqui juc taytachacunacta alawä lishun’ nil.

3Chaycunap nishuśhayquicunacta amam uyaliculcanquichu. Chaycunawan quiquin Tayta Diosniquim yaćhapaycuyäśhunqui llapan śhunꞌuyquiwan, cawsayniquiwan cuyaśhayquita ütac mana cuyaśhayquitapis.

4Tayta Diosllayquitamari atipäcul alawapäcunqui. Camachishancunäta uyalicul cäsuculcay. Payllacta sirbipäcul, payllaman chalapaculcay.

5Chay willacütucücätawan suyñucunaćhu ima pasanantapis tantiäcunäñatacmi ichá wañuchisha canꞌa. Chay nunacunämari, Egiptoćhu uyway capäcuśhayquipïta julumushüniqui Tayta Diosniquipä cuntran limapäcunayquipä nipäcuśhulanqui. Chaynüpamari amcunaćhu cä mana allincunäta camacapäcunqui.

6“Sïchuśh wawꞌi-caśhayqui, chuliqui, walmiqui, apanacuśhayqui nuna, pacallap nishunqui: ‘Mana lisishayqui taytachacunacta alawaśhun’ nil. Chay taytachacuna ampäpis, awquilluyquicunapäpis mana lisishamari cayan.

7Chay taytachacunaca cayalcan sircayquićhu ütac calućhu cä jinantin malcacunäćhümi.

8Chay nuna nishuśhayquicunäta uyalicul ama cäsucuyalcaychu. Amatac llaquipayalcaychu, pampachayalcaychu, nï pacayalcaypischu.

9Aśhwanpa wañüchiy. Anmari puntacta wañuchiyta allaycunqui; chaypïtam jinantin malcäpis chaynu lulapäcunꞌa.

10Uyway nuna Egiptoćhu caśhayquipïta juluycuśhüniqui Tayta Diosniquipïta japächachïta munaśhanpamari tamshaywan wañülächinqui.

11Chaynüpam jinantin Israel caśhtacunaca mana allin lulayta manchacuyta yaćhapäcunꞌa.

12-13“Sïchuśh yaćhanayquipä Tayta Diosniqui uycuśhuśhayqui jucnin malcaćhu uyalïlunqui pantachicü mana allin nunacuna caynu nishanta: ‘Acuchun, mana lisishayqui taytachacunacta sirbimuśhun’ nil.

14Nishuptiqui tuquictam yaćhaycunqui, licaycunqui. Sïchuśh limaśhanmannu chay millachicuypä cäcunäta rasunpa luläluptinꞌa,

15chay jinantin malcantintam mana ishcayyällal ispädawan camacaycälälinqui. Chayćhu lluy imapis cänintintam, uywantincunactam camacaycälälinquipis.Deut 20.16-18; Jos 6.17.

16Chay malcap lluy ima cänintapis läsanman juntuycul malcantinta cañaycäläliy. Chaymi Tayta Diosniquipä cañaywan uycunanu caycunꞌa. Chaynüpam chay malca pampaman muyuchisha captin caśhan śhalcachishañachu manaña caycunꞌa.

17“Chay camacaycunapä cä japächäśhacunäpïta amari imallactapis duyñuchaculcaychu. Chayćha Tayta Dios amcunawan imaypis mana piñacunꞌachu. Aśhwanpaćh awquilluyquicunaman limalicuśhanmannu llaquipaycul achca-achcaman milachipäcuśhunqui.

18Caynu lulaycunꞌa canan camachishäcunacta uyalicul, cäsucul, Tayta Diosniquipä śhunꞌunpänu lulaycäliptiquim.