1 Samuel 9 - Old Testament Quechua Wanca（QVW）

Saultam mandacü cananpä Samuel japächan

1Benjamin ayllućhümi allinpä licaśha nuna Cis śhutiyu cala. Paymi Abielpa chulin cala, Abielñatacmi Zerorpa, Zerorñatacmi Becoratpa, Becoratñatacmi Afiapa chulin cala.

2Quishpa chulinmi Saul cala. Pay cuyapaśh müsunuꞌa Israel caśhtacunäćhu manam pipis sumä jatun-caray calachu. Umruncamallam lluypis ćhäpäcü cala.

3Juc muyunćhu Cispa ćhina aśhnunmi chincacun. Jinaptinmi chulin Saulta Quish nin: “Canan-pacha waquin uyway nunanchicwan lipäcuy aśhnu ashimü” nil.

4Niptinmi Saul pasacula Efrainpa ulꞌuncunacta; chaypïta Salisa lädućhu ashilpis manam talipäculachu. Chaynütacmi Saalim, Benjamin lädućhüpis mana talipäculachu.

5Zuf läduman ćhälälilñam liwshi uyway nunäta nin: “Acuchun licuśhunña. Papäní ćhina aśhnucunäpïtapis mastá yaꞌanchicpïtaćh llaquishaña cayan” nil.

6Niptinmi uyway nunaca nin: “Cay malcaćhu Tayta Diospa willacünin nuna cayanmi. Paytam allinpä lluy licapäcun. Paypa ima nishanpis lluymi lulacacun. Payman acu lïshun, ichapis mayninpa linapäpis niycamachwan” nil.

7Niptinmi Saul nin: “Acu lïshunꞌari. ¿Imactatan paypa apaculcuśhun? Ipinchicćhu manañam ima milcapallanchicpis canñachu. Tayta Diospa willacüninta manañam imacta uycunapäpis capamanchicñachu” nil.

8Niptinmi uyway nunan nin: “Licay, cayćhu ash illayllá cayanmi. Tayta Diospa willacüninta uycuśhun maypa linapäpis niycamänanchicpä” nil.

9(Má, Canan “profeta” nishancätam unayꞌa willacü nila. Chaymi Israel caśhtacunaca Tayta Diosta tapucuyta munalꞌa “willacücäman tapucü lishun” nipäcula.)

10Niptinmi Saul: “Allinmi. Má lishunꞌari” nin.

Chaymi Tayta Diospa willacünin caśhan malcäman liculcan.

11Chay malcaman ishpiyalcalmi yacuman lï wamlacunäwan tincülul tapuculcan: “¿Chayćhüchućh willacüca tapuculcänäpä cayällan?” nil.

12Niptinmi wamlacunaca nin: “Aw, chayćhümi cayan. Apuraylla liy; canan muyun payꞌa malcamanmi śhamula päganancäćhu Diosman uycunanpä.

13Chayurá malcaman ćhayculmi ulꞌüman micü manalä lishancama ashinqui. Nunacunaca manam micunꞌachu pay ćhänancama. Paymi Tayta Diosta sulpäta uycunꞌa cañaywan uycuśhancunapïta. Chaypïtalämi cumbiduman śhamücunäpis micapäcunꞌa. Chayurá canan-pacha lil talïlunquilämi” nil.

14Niptinmi malcaman Saul ishpipäcula. Chaynu jiꞌaycuyalcaptinmi Samuel śhayämuña ulꞌüćhu cañaywan uycälinanpä.

15Ñä, Saul ćhänanpä juc muyun puntactam Tayta Dios Samuelta caynu tantiachila:

16“Wala cay üranümi Benjamin ayllupïta juc umricta caćhamuśhayqui. Paytam Israel malcäpa puydïninpä asaytiwan llusiycul japächaycunqui. Paymi Filisteo läducunap maquinpïta malcäta libraycunꞌa. Malcäpa ñacayninta licaycümi; mañacuynin yaꞌacamañam ćhaycamun” nil.

17Chayćhu Saulta Samuel licäluptinmi Tayta Dios nin: “Caymi chay limapäśhá nunaca. Paymi malcäta caminaycunꞌa” nil.

18Malcap puncunćhüña cayalmi Samuelman aśhuycul Saul nin: “Ama chaynu caychu, ¿mayćhümi willacücäpä wasin cacullan?” nil.

19Niptinmi Samuel nin: “Yaꞌami willacüca cayá. Acu lishun ulꞌüman; chayćhu micamuśhun. Wala-wälamanñam ima tapucuyniquicunactapis niycuśhayqui; chaypïta licunquiñam.

20Quimsa muyun ćhina aśhnuyqui chincacuśhanpïtá ama llaquicuychu; ñam talïlälinña. Aśhwanpa Israel caśhtacunaca mandacüpa wañupaculcäśhancämari ampis aylluyquipis cayalcanqui” nil.

21Niptinmi Saul nin: “¿Imapïtá chaytanu niyämanqui? ¿Manachun yaꞌa cayá Israel caśhtaćhu lluy ayllucunapïta tacsha cä Benjamin ayllullapïta? ¿Chaychun chaytanu niyämanquiman?” nil.

22Chaypïtam Saultawan uyway nunantinta wasi luliman Samuel pasaycachila. Chay cumbiduman lïcunäpa ćhawpinmanmi allinninmanlä taycaycachila. Chayćhu quimsa ćhunca-yupay (30) ayachisham capäcula.

23Chaypïtam yanucücäta Samuel nin: “Japälla ćhulanayquipä uycuśhac aychacta apamuy” nil.

24Niptinmi yanucüca intiru caćhpan aychacta apalcamul Saulman alaycülun. Samuelñatacmi nin: “Caytam ampa ćhulachipulac; micucuycuy. Cay cumbidacuśhá muyunćhu am micucuycunayquipämari ćhulachilá” nil.

Chaynüpam chay muyun Samuelwan Saul micapäcula.

25Chay pägaśhanpïta malcaman jiꞌalpapämulmi Samuel wasip altuśhninćhu Saulwan limapäcula.

26Chay walantin Saul altuśhćhu puñuyaptinlämi aspi-aspiylla Samuel ayan: “Śhalcuyña, wasiquita cuticunayquipä” nil.

Niptinmi Saul śhalcuculcul Samuelwan lipäcula.

27Malcap manyantaña liyalcaptinmi Saulta Samuel nin: “Uyway nunayqui puntacuchcächun. Amꞌa uchuyllacta alcaycuy Tayta Diospa nimäśhanta willanacpä” nil.