1Sumä tuqui-tuqui limaycunam niycunäpä śhunꞌüćhu cacuyan.
Sumä allincunacta isquirbïcäpa lapisïrunnümi allüpis
mandacücäta alawaycunäpä cacuyan.
2Lluy nunacunäpïtapis sumä tuquinninmá am canqui.
Sumä tuqui allin limaycunallamá shimiquipïtapis unyaycamun.
Chaymá Tayta Diosninchic imaycamapis allinpä licaycuśhunqui.
3Sumä munayniyu, lisisha-lisisha allin nuna,
sumä cayniquiwan imactapis mana manchä nuna
ispädayquita wiꞌawniquimanꞌari watacuy.
4Sumä-sumä cayniquiwan imactapis llallishtinmá puntaman linqui.
Rasuncäta licaycunayquipämi linqui.
Mana nunatucücunäta tincüninman licaycunayquipämi linqui.
Munayniquiwanmi sumä-cama lulaycunacta lulaycunqui.
5Mandacüní, sumä afiläśha flïchayqui
ćhïnicüniquicunap śhunꞌunman śhaticacuchun.
Jinaptin malcacunaca ćhaquiquiman lluy palpupämuchun.
6Tayta Diosllay, dispächuyquiwan mandacuyniqui wiña-wiñaypämá.
Allin tincüllanmantacmi mandacunquipis.
7Am, allincätam imaypis ama-pacha niycunqui.
Mana allincätañatacmi ćhïnicunqui.
Chaymi Tayta Diosniqui amta japächaycuśhuśhayquiwan
juccunäpïtapis mas altunninmanlä ćhulaycuśhulanqui.
Sumä cushicuywanlämari mishqui aśhnä asaytiwan llusiycuśhulanqui.
8Lluy müdanayquicunapis mishqui aśhnä
mïrra, aloe, casia nishan pirfümillañamá aśhnayan.
Marfilwan adurnäśha palasyupïlämi
cushicunayquipä arpacunapis tucayämun.
9Muyülïniquićhu allinpä licaśha nuna cäcunäćhu,
mandacücunap wamla chulincunapis cayanlämá.
Ñatac Ofir lädu fïnunnin üruwanlä adurnäśha
cuscanayquipä cä walmiquimá allï läduyquićhüpis cayan.
10Ija, cay nishäta sumä tuquicta uyaliycamay:
Malcayquita, aylluyquita amaña yalpalayaychu.
11Sumä tuqui-tuqui caśhayquiwanmi mandacücäpa śhunꞌunpa caycunqui.
Pay wayapayquiña captinmá allinpä licachinqui.
12Tiro malcapi nunacunaca rigäluncunawanmá śhapämunꞌa.
Cäniyu rïcucunäpis allinpä licachicuyninwanmá śhapämunꞌa.
13Mandacücäpa walminmá sumä tuquish-tuquishllaña cuartunćhu cacuyan,
müdananpis üruwan tuqui-tuqui burdäśhalämá canpis.
14Sumä burdäśha chipyayä müdanayütamá
mandacücäman puśhaycun.
Sumä tuquish wamla-masincunapis liwshipäcunmá.
15Sumä cushisha-camactamá puśhaycapäcun.
Mandäcäpa palasyunmanmá cushisha-cama yaycapäcun.
16Chuliquicunañamá awquilluyquicunap pudirnin mandacunꞌa.
Jinantin allpämanmá puydï capäcunanpä ćhulaycunqui.
17Milaycuna pasaptinpis wiña-wiñaypämá śhutiquita yaꞌa yalpachishä.
Chaymá lluy nunacunaca wiña-wiñaypä alawaycälishunqui.
Who We AreWhat We EelieveWhat We Do
2025 by iamachristian.org,Inc All rights reserved.
