1Tayta Diosllay, ¿imapïmi pasaypiña jitälälimanqui?
¿Michishayqui uwishniquicunapä imapïmá sumä-sumä piñacülunqui?
2Yalpalcuyꞌari una-unaypïta libraśhayqui malcayquita,
ampa tücäniqui aylluña cananpä lantishayquita,
yaćhaśhayqui Sion ulꞌucta.
3Cay mana cäman lulaśhancäta licaycü śhamuy.
Ćhïnicüninchicmá chuya alawana wasicta pampaman lluy muyüchin.
4Ćhïnicüniquicunamá cushicuypi wasiquićhu apalipäcun.
Llallishanpïmá bandiranta śhaycachipäcun.
5Munticunäćhu yamta cuchücänümá
ächanwan ilucunäta pampäman cućhpächin.
6Martillucunawan ächacunawanmá
adurnu llälläśhacunäta camacaycülun.
7Chuya carpayquićhu śhutiquitamá cañaycälälin.
Ampa śhutiquita apä carpayquitamá jalutaculcul pampamam muyülächin.
8Śhunꞌunćhümá ninaculcäla:
“Juclla lluy camacaycüśhun” nil.
Lluy-lluy alawana cäcunätamá cañaycälälin.
9Manañamá ima siñalcunactapis licanchicñachu.
Manañamá willacücunäpis canñachu,
caycuna imaycamaña cananta yaćhaycälichimänanpäpis.
10Tayta Diosllay, ¿imaycamaćh ćhïnicüniqui jalutacuyäśhunqui?
¿Wiña-wiñaypächun ćhïnicüniqui śhutiquita mana allinpä limayanꞌa?
11¿Imapïmá pudirniquita pacacuycunqui?
¿Imapïmá maquiquita curushchapacuycul jawca cacunqui?
12¿Manachun am Tayta Diosní una-unaypïta mandacüní canqui imatá?
¿Manachun jinantin pachäćhu salbaycüca am cayanqui imamá?
13Anmá jatun munayniquiwan lamarcätapis laquiycüca cayanqui.
Chay lamarćhu cä jatućhaćha manchanaśh
cawsäcunäpa umantapis paquiypam pawälunqui.
14Anmá Leviatan nishan juyu manchanaśh uywacta umaćhu uycülunqui.
Jinalculmá chunyäcäćhu chucaru uywacunäman aychanta alaycülunqui.
15Anmá pucyucunäta, mayucunäta paćhyachimulanqui.
Mana camacaycü mayucunätapis amtacmá chaquïchilanqui.
16Ampamá muyuncäpis tutäpis.
Amtacmá intïtapis quillätapis tacyaycachilanqui.
17Anmá jinantin pachäpa ćhululnincunacta unanchayculanqui.
Amtacmá tamya timpu, usya timpu cananpäpis niyculanqui.
18 Tayta Diosllay, yalpalcuyꞌari
ćhïnicüniquicuna śhutiquita jalutaculcäśhanta,
luclu malcaca jamuyapäcuśhuśhayquita.
19Amari ćhïnicünïcunaman ćhulaycälillämaychu.
Mallwa ulpaytanu amari manchanaśh uywacunämannu ćhulaycälillämaychu.
Cay pishi callpayu nunallayquita amari imaypis unꞌaycallämaychu.
20Limalicuyniquita yalpalcullayꞌari,
jinantin lluy pachäćhu mana allin juyucunallamá muyuyalcan.
21Ñacäcunaca amari uyshulächisha capäcuchunchu.
Mana mayanllanpis yanapäniyu cäcunaca,
wacchacunaca śhutiquitamari alawaycälishunqui.
22¡Tayta Diosllay, śhalcuyñari!
¡Limalicuyñari! ¡Luclucunaca mana śhaycuycul
palaśhuśhayquita yalpayñari!
23Ćhïnicüniquicunap äśhaycaćhaśhanta,
amari unꞌaycuychu.
Mana śhaycuycul cuntrayqui apalcaćhaśhanta yalpalcuyꞌari.
Who We AreWhat We EelieveWhat We Do
2025 by iamachristian.org,Inc All rights reserved.
