Proverbios 7 - Old Testament Quechua Wanca（QVW）

Watica walmi imanuy caśhanpis

1Iju, cay limapäśhäta sumäta uyalicuy;

yaćhachicuynïta umayquiman ćhulaycuy.

2Yaćhachicuynïta cäsuculꞌa cawsanquimá;

ñawi luluyquitanu limapäśhäta licayculꞌa cawsanquimá.

3Maquiquiman watacuy,

śhunꞌuyqui lulinman isquirbiycuy.

4Yaćhaycäta paniquitanu ama-pacha niycuy;

allin tantiaycäta aylluyquitanu licaycuy.

5Chaycunamá mansibädu walmicunäpi libraycuśhunqui;

mishqui limayniyu walmicunapïtamá japächaycuśhunqui.

6Juc muyunmi bintanap ućhcullanpa licapayälá.

7Chayćhu mana tantiayniyu müsucunäta licapayalmi

jucnin pasaypi mana fisyuyüninta licälú.

8Paymi cällicta chimpälun, isquinanman ćhaycul

chay walmip wasin läduman licun.

9Muyunca tardicalpunñamá;

aspicalpuptin tutawyayca jiꞌacaycamunñamá.

10Chayćhümi walmica ćhasquïnin yalämun

ñuquicaćhashtin, waticanu müdapacüśhalä canpis.

11Chay walmi mana pinꞌacuyniyu, cäranćhu mana yawarniyu;

wasinćhüpis mana tacyaycümá.

12Cällicunäćhu, läsacunäćhu, isquinacunäćhu

awaytaycaćhayan mayantapis palpachinanpämá.

13Chayćhümi walmica walaśhcäta juclla macallacuycul muchacuyan.

Jinaman imactapis mana pinꞌacuyculmi nin:

14“Allin cawsaśhäpi cä uycunapä cä

limalicuyta uycuśhäcäpi wasïćhu cayanlämi.

15Chaymá ashïniqui śhamulá;

amta licaycuypïmi wañupaculá, canan talïlucñamá.

16Puñunäpis Egipto lädu lïnupi fïnu

lancacucunawanmá maśhtäśha cayan.

17Mïrra, aloe, canïla pirfümicunawan

pirfümïshamá cayanpis.

18Acuchun tutay walächi munaśhanchicta lulacamuśhun;

achicyanancama cuyanacamuśhun.

19Wayapá manam cayćhüchu;

calu-caluctam licun.

20Illay luncucta apaculculmi licun;

puꞌuy quillaćhülämi cutilpis cayman cutimunꞌa” nil.

21Chaynu mishqui shiminwanmi walaśhcäta palpächin;

chaynu tuqui limapayninwanmi śhunꞌunta suwaycülun.

22Jinaptinmá wañuchinancäman liyä wäcanu,

trampaman palpü luclunu walmip ipanta licun.

23Lishanca wañunanpä caśhanta mana yaćhalmá

ulpayca trampaman yaycücänu jiꞌacuycun;

śhunꞌunta flïcha pasäluptinlämi tantiälun.

24Chayurá iju, canan uyalimay;

limapäśhacta sumäta uyaliycuy.

25Chaynu walmicunäwan ama apachicuyaychu;

chaynu walmicunap caminunman ama jaluycuyaychu.

26Chaynu walmicunaca achca-achcactañamá wañuycäman ćhächin;

achca-achcactañamari maquinman palpächin.

27Paypa wasin sipultürämanmá apayan;

tutawyay wañücuna caśhancämanmá ćhäyächin.