2 Cronicas 4 - Old Testament Quechua Wanca（QVW）

Alawana wasip cänincunactam lulan 1Rey 7.23-51

1Chaynütacmi brunsipïta uycuna patactaExo 27.1-2. Salomon lulachila, isun mitru larguyüta, isun mitru anchuyüta, tawa mitru ćhawpin altuyüta.

2Jinaman fundïsha brunsipïta jatun uylu istanquictam lulala: manyanpïta aśhta jucnin manyancama tawa mitru ćhawpinmi cala. Wichayninmanñatacmi ishcay mitru cuartan; quiquin uylup muyülïninꞌa ćhunca quimsayu mitru ćhawpim cala.

3Chay istanquip patanćhu lluy muyülïninpa ulapayninmanmi, calabäsanu cä adurnucta ishcay pasäta adurnäla. Ćhawpi mitrućhu-camam ćhunca adurnucunacta ćhulala; istanquiwan juc pïsallatacmi fundïsha cala.

4Chay istanquim täcula ćhunca ishcayniyu (12) luläśha brunsipi wäcacunap janäninćhu. Quimsa wäcacunam inti yalamunan läduman licalapäcula; juc quimsäñatacmi inti jiꞌalpunan läduman, juc quimsäñatac sur läduman, chay juc quimsa wäcäñatac nurti läduman licalapäcula. Cay wäcacunap lümunpi ipan lädumanmi istanquica taycächisha cala.

5Chay istanqui titanninman pusä cintïmitrum cala. Shiminñatacmi liryup waytannu cala. Chay istanquimanmi süta ćhunca sütayu walanga (66,000) litru yacu yaycula.

6Chaynütacmi brunsipïta ćhunca labaturyucunactapis lulala;Exo 30.17-21. chay alawana wasip allïnin lädumanmi pichacta ćhulala, juc pichätañatacmi ichünin läduman. Chayćhümi ichá cañaywan uycuśhancunäpi paꞌaculcä cala. Istanquićhüñatacmi sasirdüticunaca paꞌaculcäla.

7Chaynütacmi camachisha caśhanmannu ćhunca michïructapis ürupïta lulala.Exo 25.31-40. Chaytam ćhulaycula alawana wasip ichü lädunman pichacta, allï lädunmanpis pichactatac.

8Chaynütacmi ćhunca mïsactapisExo 25.23-30. lulaycul alawana wasiman ćhulaycula, allï läduman pichacta, ichü lädumanpis pichactatac. Jinaman paćhac tasuncunactapis ürupïtam lulaycula.

9Chaynütacmi sasirdüticunäpa patyuntawan jatun patyuctapis puncuntinta-cama lulala. Jinalculmi puncuncunacta brunsiwan lluy laꞌala.

10Istanquïtañatacmi alawana wasip allïnin lädu, inti ishpimunan läduman ćhulala.

11Hiram-abiñatacmi lulala mancacunacta, pälacunacta, tasuncunactapis. Chaynüpam mandacü Salomon nishantanu Tayta Diospa alawana wasinta Hiram-abi camacäla:

12Ishcaynin paradïruncunacta,

paradïrup umanćhu cä ishcay uylu-cama linlichancunacta,

chay umanćhu adurnuncunacta chaläcunäta,

13chaynütac ishcaynin shimpanacüśhanu cäcäpa tawa paćhac (400) granadilla adurnucunactapis.

Shimpaćhu-camam ishcay fïla granadilla adurnucuna cala.

Chaycunam uylu-cama ishcay linlichacunäta täpalapäcula.

14Chaynütacmi lulayta camacäla: ćhunca täcunancunactapis,

chaypa jananćhu cä ćhunca labaturyucunätapis,

15chaynütac istanquictapis,

jinaman istanqui taycunanpä cä ćhunca ishcayniyu wäcacunätapis,

16jinaman mancacunätapis,

pälacunätapis, tinidurcunätapis.

Chayurá lluy caycunacta mandacü Salomon nishantanümi, Tayta Diospa alawana wasinpä Hiram-abi fïnunnin brunsipïta lulala.

17Caycunacta quiquin mandacücämi fundichila Sucotwan Sareda lädu tincupulaśhan Jordan mayu pampaćhu, llinca mitupi luläśha muldićhu.

18Achca-achcactamari brunsipïta imactañapis Salomon lulächila. Chaymi manaña pïsachilañachu ayca quïlu brunsi yaycuśhantapis.

19Chaynütacmi Tayta Diospa alawana wasinćhu ima cäcunätapis Salomon lulachila:

ürupi uycuna patacta,

Tayta Diosllapä japächaśha tanta ćhulanapä cä mïsacunacta,

20chaynütac Sumä Chuya Sityup puntanćhu ürunllanllanpi cä jatun michïracunätapis latachicuntinta-cama,

21jinaman michïrup waytancunactapis,

puntanćhu walanancunactapis,

ürupi cä śhanśha julucuntapis.

22Jinaman micha cuchucuncunacta,

täsancunacta,

wishlancunacta,

ürunllanllanpi insinsiu cañacuncunactapis lulachilamari.

Chaynütacmi Chuya Sityup, jinaman Sumä Chuya Sityup puncuncunactapis ürunllanllanpïta lulachila.