1Chaypïtam juc nuna-yupaylla malcaca juntunaculcäla Yacu Puncuwan śhutichäśha puncup chimpan läsaćhu. Chayćhümi isquirbï Esdrasta nipäcula: “Israel läducunäman Moisespa Tayta Dios uycuśhan camachicuyta apachimuy” nil.
2Nipäcuptinmari sasirdüti Esdras camachicuy isquirbïsha cäcäta apachimula jinantin malca wayapapis walmipis lluy tantiayniyücunaca juntuläśhancäman. Cay pasala anćhish quillap allaycuynin muyuncäćhümari.
3Chay Yacu Puncu nishanpa chimpan läsaćhu lluy juntuläcunäpa ñawpäninćhümi wälapi ćhawpi muyuncama camachicuyta Esdras lïgila. Chayćhümi lluy juntuläcunaca camachicuyta yalpay-yalpaywan uyalipäcula.
4Chay juntunacuypä ilupi luläśha patacćhümi isquirbï Esdras śhäcuyäla. Allïnin lädućhüñatacmi śhacuyalcäla: Matatias, Sema, Anias, Urias, Hilcias, Maasiaspis. Ichünin lädućhüñatacmi śhäcuyalcäla: Pedaias, Misael, Malquias, Hasum, Hasbadana, Zacarias, Mesulampis.
5Chaynu altusca patacćhu cayalmi camachicuy isquirbïsha cäcäta Esdras quićhaycula lluypa ñawquin. Chaynu quićhäluptinmi lluy nunacunaca śhalcatityapäcula.
6Chayćhümi Esdras alawala: “Sumä munayniyu Tayta Diosllay” nil. Jinantin malcäñatacmi maquincunacta altuman pallalcälil: “Chaynu cachun, chaynu cachun” nipäcula. Nilculmi pampäman ulcunpis tupaycunancama uyshucaycälil Tayta Diosta alawapäcula.
7Ñatac malcaca quiquillanćhu uyalipäcuptinmi levita Jesua, Bani, Serebias, Jamin, Acub, Sabetai, Hodias, Maasias, Kelita, Azarias, Jozabed, Hanan, Pelaiapis camachicuycäta tantialpachï capäcula.
8Paycunatacmi Tayta Diospa camachicuynin isquirbïsha cäcäta alli callpawan lïgipäcul malcap limayninman ticlachipäcula, jinaman ima nishantapis tantialpachipäcula.
9Chay camachicuyćhu ima nishantapis uyalipäculmi nunacunaca waꞌayta allacaycälin. Jinaptinmi puydï Nehemias, sasirdütica, isquirbï Esdras, jinaman malcäta tantialpachï levitacunäpis nipäcun: “Cay muyunca Tayta Diospa japächäśha muyun cayaptinꞌa ama llaquiculcaychu nï waꞌapäcuypischu” nil.
10Jinaman Nehemiasmi nin: “Lipäculꞌari allinnin micuycunacta micapämuy, allinnin bïnucunacta upyapämuy. Mana cäniyücunämanpis mallichipäcuyꞌari. Cay muyunca Tayta Diosninchicpä japächaśhan muyunninmari. Tayta Diospa cushicuynin callpanchamäninchic cayaptinꞌa amari llaquiculcaychu” nil.
11Chaynütacmi jinantin malcäta levitacunäpis nipäcun: “Cay japächaśhan muyuncäćhu jawcallañari capäcuy; amaña llaquiculcaychu” nil.
12Chayćhu camachicuy yaćhachishanta lluy nunacunaca tantiälälilmi cushisha liculcäla micapämü, upyapämü, micuynincunactapis mallichinaculcä.
13Chay wälañatacmi ayllup puydïnincuna, sasasirdüticunaca, levitacunaca, isquirbï Esdraswan juntunaculcäla Tayta Diospa camachicuyninta tuquicta tantialpapäcunanpä.
14Chaymi chayćhu talïlälin Moisespa Tayta Dios anćhish quillap fistanćhu Israel läducunaca chucllallaćhu-cama yaćhapäcunanpä caśhanta.Lev 23.33-36, 39-43; Deut 16.13-15.
15Chaymi lluy malcacunäman, Jerusalenmanpis willachila: “Ulꞌucunäman lipäcul ulïbuspa, palmïrap, arrayanpa, ütac alli pallaysapa lantacunap pallaynincunactapis apapämunqui, camachicuyćhu nishanmannu chucllacunacta lulanapä, unay pulicü caśhanchicta yalpalcunapä” nil.
16Niptinmi malcaca lipäcul pallaycunacta apapämula. Chaywanmi wasinpa janänincunaćhu, patyuncunaćhu, alawana wasip patyuncunaćhu, Yacu Puncup puntan läsaćhu, Efrain Puncup puncuncunaćhüpis chucllacta lulapäcula.
17Lluy prïsu puśhaśha capäcuśhanpi cutimücunämi chucllacta lulacaycälil chayćhu yaćhapäcula. Chay lulayta Israel läducunaca mana lulapäculañachu Nunpa chulin Josue timpupïñam. Chaymari sumä jatun cushicuy cacula.
18Chay fistacta anćhish muyunmi lulapäcula. Allaycuy muyunninpïtamari camacay muyunnincama Tayta Diospa camachicuynin isquirbïsha cäcäta Esdras lïgila. Pusä muyuncäćhüñatacmi camachicuymannu jatun juntunacuyta lulapäcula.
Who We AreWhat We EelieveWhat We Do
2025 by iamachristian.org,Inc All rights reserved.
