2 Cronicas 30 - Old Testament Quechua Wanca（QVW）

Tayta Dios Libraycuśhan Fistactam lulan

1Chaypïtam Ezequias jinantin Israel läduman, Juda läduman willacücunacta caćhala; jinaman Efrain, Manases ayllucunämanpis cartanpa-camam apachila, Tayta Dios Libraycuśhan FistamanExo 12.1-13, 21-27; Lev 23.5-8; Deut 16.1-8. Jerusalenta lluy śhapämunanpä.

2Ñatac Mandacüca lluy puydïcunäwan, jinantin Jerusalen nunacunäwan awninacüla, ishcay quilläćhu Tayta Dios Libraycuśhan Fistacta lulapäcunanpämari.

3Chaynu timpullanćhu lulayta mana atipapäculachu sasirdüticunaca manalä chuyanchacüśha cayalcaptinmari; jinaman jinantin malcäpis Jerusalenman manalämi juntunacüśhachu capäcula.Num 9.9-11.

4Chaymi juc muyunćhüña Tayta Dios Libraycuśhan Fistacta lulapäcunanpä limanacuśhanca mandacücäpäpis lluy nunacunäpäpis allin cala.

5Jinalmi israelcunaca Beersebapi allacuycul Dancama willachisha cala Tayta Dios Libraśhan Fistaman Jerusalenta śhapämunanpä. Camachisha caśhanmannu una-unayñamari nï lulapäculachu.

6Chaymari mandacücäwan puydï yanapänincuna apachishan cartacta apacuśha liculcäla jinantin Israel, Juda läducunäman. Chay cartaćhu caynümi niña:

“Israelcuna, Abrahampa, Isaacpa, Israelpa Tayta Diosninman cutiycapämuy. Chayćha Asiriap mandacünincunapi quïdäcunäman Tayta Dios cutiycamunꞌa.

7Amari awquilluyquicunanuꞌa, wawꞌi-caśhayquicunanuꞌa capäcuychu. Paycuna awquilluyquicunap Tayta Diosninta ipanchapäcuptinmari canan licapäcuśhayquinu, pasaypi mana cäman muyüśha cayalcan.

8Amatac awquilluyquicunanu pasaypi cullu linli capäcuychu. Tayta Diosman cutipämulꞌari wiñaypä chuyanchaśhan alawana wasinman śhapämuy. Tayta Diosniquita sirbipäcuy sumä walayä piñacuynin amcunapïta aśhucunanpä.

9Tayta Diosman cuticalcämuptiquiꞌa aylluyquicunacta, chuliquicunacta prïsu puśhäcunaca llaquipaycälilmi cay allpaman cutichipämunꞌa. Tayta Diosniquiꞌa llaquipayniyu, cuyacuyniyümari. Payman cuticalcämuptiquiꞌa manamá imaypis caćhaycälishunquichu” nil.

10Chay cartacta apäcunaca malcan-malcan lipäculmi Efrain, Manases, Zabulon ayllucunap malcancama ćhäpäcula. Ñatac nunacunacá mana cäpa licapäculmi asipapäcula.

11Ñatac Aser, Manases, Zabulon ayllućhu waquinnincunallam mana nunatuculcal, uyaliculcal Jerusalenman śhapämula.

12Juda ayllucunätapis quiquin Tayta Diosmi awnichila. Chaymi Tayta Diospa camachicuyninmannu mandacüca lluy puydïnincunawan nichishanta paycuna awnipäcula.

13Ishcay quilläćhüñatacmi achca-achca nunacunaca Jerusalenman śhapämula Mana Libadürayu Tanta Fistacta lulapäcunanpä.

14Chay Jerusalenćhu taytachacunaman uycuna lluy patacnincunacta, insinsiu cañacuncunacta tunilcälilmi Cedron mayuman wicapälälila.

15Jinalculmi ishcay quillap ćhunca tawayu (14) muyunninćhu Tayta Dios Libraycuśhan Fistapa cä uwishcunäta wañuchipäcula. Sasirdüticunäwan levitacunäñatacmi pinꞌacälälisha chuyanchaculcäla, jinaman Tayta Diospa alawana wasinman cañaywan uycälinanpäpis apapämula.

16Chaypïtam Tayta Diospa nunan Moises camachishanmannu lulayninta-cama lulaycapäcula. Levitacunaca yawarcunäta camaycälil sasirdüticunäman uycapäcula chächuycapäcunanpämari.

17Chay apamü nunacunaca mana chuyanchacälälisha achcamari capäcula. Chaymi paycunap pudirnin levitacunaca Libraycuśhan Fistaćhu uywacunacta wañuchipäcula, chaynüpa Tayta Diospa japächaycuśha capäcunanpä.

18Ñatac mana chuyanchacälälisha achca nunacunamari Efrain, Manases, Isacar, Zabulon ayllucunapïta Tayta Dios Libraycuśhan Fistaćhu micälälila. Chaynu lulayninwanmari camachicuyta jalutacälälila. Chaymi paycunapïta Tayta Diosta Ezequias mañacula: “Allin caycü Tayta Diosllay, llapan śhunꞌunwan anman aśhuycücunätá pampachaycullayꞌari.

19Awquillücunap Tayta Diosnin, cay fistapa camachicuy nishannu mana chuyanchacüśha capäcuśhanpïta pampachaycullayꞌari” nil.

20Chaynu Ezequiaspa mañacuyninta Tayta Dios uyaliyculmi jinantin malcäta pampachaycula.

21Jinaptinmi israelcunaca sumä cushisha Mana Libadürayu Tanta Fistacta Jerusalenćhu anćhish muyun lulapäcula. Sasirdüticunäwan levitacunäñatacmi tucanacunawan tucaśhtin Tayta Diosta muyun-muyun alawaycälila.

22Chaynu llapan śhunꞌunwan Tayta Diosta sirbï levitacunätam Ezequiasꞌa “allinmi” nil callpanchaycula.

Chay anćhish muyun fistaćhu capäculmi chayćhu micapäcula, allin caśhanpi uycunapä cä uycunactapis uycapäcula, jinaman awquilluncunap Tayta Diosnintapis alawaycapäcula.

23Ñatac jinantin nunacunämi anćhish muyun mastalä fistacta lulapacunanpä awninacalcälil sumä cushisha lulapäcula.

24Chayćhu Juda lädupa mandacünin Ezequiasmi lluy cäcunäman uycula: walanga (1,000) wäcacunacta, anćhish walanga (7,000) uwishcunactapis. Chaynütacmi puydïcunäpis uycapäcula: walanga (1,000) wäcacunacta, ćhunca walanga (10,000) uwishcunactapis. Sasirdüticunäpis achcañam chuyanchacüśha cayalcäla.

25Sumä cushisham cayalcäla: jinantin Juda lädućhu sasirdüticunaca, levitacunaca, jinaman Israel lädupi śhamü juc caśhtacunaca, chaynütac chay quiquin Juda lädućhu yaćhä juc caśhtacunäpis.

26Chaynu sumä cushicuy Jerusalenćhu manam calachu Israelpa mandacünin Davidpa chulin Salomon caśhan timpupïta.

27Chaypïtam sasirdüticunäwan levitacunaca śhalcalcälil malcaca allin capäcunanpä niycälila. Chayta Tayta Dios uyaliyculamá. Chay mañacuynin janay pachäćhu Tayta Dios caśhan chuya cäcämanlämari ćhayculapis.