1Edom lädu imanuypis cananpämi Abdiasman Tayta Dios licachin.
Edom läducunäpïtamari Tayta Dios caynu nin:
“Jinantin nasyuncunäta maquinćhu cachï
Sumä Munayniyu Tayta Diosmi caynu nin:
Nasyuncunämanmi juc willacüta caćhayá
caynu ninanpä: ‘¡Acuchun! ¡Acuchun!
Edom malcacunäwan pilyä lishun’ nil.
2“Má, Edom lädu, lluy nasyuncunapïtapis
mana cäpa licaśhanninmanmi muyuycachishayqui;
sumä pinꞌayninmanmi ćhulaycüśhayqui.
3Sumä aꞌacunäpa laꞌalancunaćhu yaćhalmi,
nunatucuyniqui pantächishunqui;
altunnincunaćhu yaćhalmi:
‘¿Mayantá pampaman muyüchimanman?’ ninquilä canpis.
Chay nunatacuyniquimá mana allinman ćhächishunqui.
4Masqui ancanu altunninman päliptiquipis,
masqui uyllurcunäćhülä ishnachacüluptiquipis,
nunatucuyniqui pantächishunquimá;
chaypïta wicapalpämuśhayquimari.
Yaꞌa Tayta Diosmari niyá.
5“Má, suwacunaca tutanpa suwä anman śhapämul,
¿manachun atipäśhallanta apaculcan imatá?
Üba palläcunäpis,
¿manachun juccuna pallapacunanpä caćhaycälin imamá?
Amtañatacmi ichá ćhïnicüniquicuna
lluy-lluyta camacaycälälishunqui.
6Am Esautamá lluy-lluy waycälälishunqui.
Pacäśha cäniquicunactapis lluy-lluymá ashïlälinꞌa.
7Yanapäniquicunamá ipanchälälishunqui;
allpayquipïtamá alapacälälishunqui.
Amcunawan allinpä apanacuśhayquicunämá ingañapäcuśhunqui;
amcunawan cusca micücunämá trampacunacta ćhuläläliśhunqui.
Edom malcacuna, ¿mayćhümá allin tantiayniyu caśhayquica?” nil.
8Chaynütacmi Tayta Dios nin: “¿Manachun Edom lädu
yaćhaysapacunäta camacaycüśhä imamá?
¿Manachun Esaupa ulꞌuncunaćhu cä allin tantiayniyücunäpa
tantiayninta chincächishä imatá?
9Teman malcap sumä allin pilyänincunapis
manchacuypïmá chucchupäcunꞌa.
Esaupa ulꞌuncunaćhu cäcunäpis
lluy-lluymá camacaycüśha capäcunꞌa.
10“Wawꞌi-caśhayqui Jacobta ñacachishayquipïtamá
sumä pinꞌayćhu caycunqui;
wiña-wiñaypä camacaycüśhamá canqui.
11Malcäpa ćhïnicünincuna lluy cänincunacta waycaptin,
Jerusalenpa puncuncunactapis pilyäcunaca paquiptin,
paycunacta chayćhu am licapayllamá licapayälanqui;
Jinaman paycunacta lulawshiytalämá ćhapalanquipis.
12¿Imanilmá wawꞌi-caśhayqui
mana allinta pasayaptin cushipälanqui?
¿Imanilmá Juda lädup
ñacaynincunapi cushiculanqui?
¿Imanilmá llaquicuyta pasayaptin asipälanqui?
13Ñacayćhu cayaptin, malcäman
manamá puncunpa yaycunayquichu cala.
Llaquicuyninćhu cayaptin,
manamá cushipänayquichu cala.
Camacaycüśha cayaptin, manamari
cänincunacta waycanayquichu cala.
14Ayꞌïcunäta caminu pasanacuśhancunäćhu
alcaycul manamá wañuchinayquichu cala.
Llaquićhu quïdäcunätapis manamá
wañuchisha cananpä ćhulaycunayquichu cala.
Lluy nasyuncuna cäraycuśha cananpämi nin15“Lluy nasyuncunäta Tayta Dios
cäraycunan muyunca janayquićhüñamari cacuyan.
Maynümi juccunäwan lulalanqui,
chaynümari amwanpis lulaycunꞌa.
Imam lulaśhayquimannümari cutiycachisha caycunqui.
16Maynümi chuya ulꞌüćhu
amcuna upyapäculanqui,
chaynümá nasyuncunäpis lluy upyapäcunꞌa.
Juc śhutuyllactapis mana caćhayculmari upyapäcunꞌa;
jinalmi imaypis mana cawsänu capäcunꞌa.
17“Sion ulꞌućhüñatacmi ichá
waquincuna salbaculcanꞌa; chay ulꞌuca chuyamari.
Jacob ayllucunaca lluy cänincunacta
cutichiculcanꞌamari.
18Jacob ayllucunaca ninanümá capäcunꞌa.
Josepa aylluncuna nina walayänümá capäcunꞌa.
Esau ayllucunäñatacmi päśhanu capäcunꞌa.
Chaymari cañaycüluptin lluy camacaycüśha capäcunꞌa.
Esau ayllupi manamari jucllayllapis quïdaycunꞌachu.
Yaꞌa Tayta Diosmari niyá.
19“Má, Neguev lädućhu cäcunäpa maquinćhümi Esaupa ulꞌuncuna canꞌa.
Filisteo läducunäpa maquinćhümi Sefela lädu canꞌa.
Israel läducunäpa maquinćhüñatacmi
Efrain, Samaria lädu allpacunaca canꞌa.
Benjamin ayllucunäpa maquinćhüñatacmi
Galaad lädu allpacunaca canꞌa.
20Israel lädu prïsu puśhaśhanpi cutimücunaca,
Canaan läductam aśhta Sarepta malcäcama chalacaycälinꞌa.
Jerusalenpïta prïsu puśhaśha cä Sefaradćhu yaćhäcunämi
Neguev lädu malcacunacta chalacaycälinꞌa.
21Llallïcunaca Sion ulꞌumanmi ishpipäcunꞌa;
Esaupa ulꞌuncunaćhümari mandapäcunꞌa.
Ñatac lluypis yaꞌa Tayta Diospa maquïćhümi caycälinꞌa” nil.
Who We AreWhat We EelieveWhat We Do
2025 by iamachristian.org,Inc All rights reserved.
