Ezequiel 45 - Old Testament Quechua Wanca（QVW）

1“Chaynütac tücapäcuśhayqui allpacta chüsaypa ayllunpa-cama partinaculcal yaꞌa Tayta Diospälämi puntacta japächaycapamanqui. Largunmanmi ćhunca ishcayniyu ćhawpin (12.5) quilümitru canꞌa; anchunmanñatacmi picha quilümitru canꞌa. Chay sityuca yaꞌallapä japächäśhamá caycunꞌa.

2Chayćhümi alawana wasïpa japächaycunqui. Tawan lädunmanmi ishcay paćhac picha ćhunca (250) mitru-cama canꞌa. Chaypa muyülïninćhüñatacmi ishcay ćhunca pichayu (25) mitructa-cama juluycunqui libri cananpä.

3Chay partićhümari japächaycunqui largunman ćhunca ishcayniyu ćhawpi (12.5) quilümitructa, anchunmanñatac picha quilümitructa. Chayćhümi chuya alawana wasí, Sumä Chuya Sityú caycunꞌa.

4Chay japächaśhäca, alawana wasićhu Tayta Diosta sirbï sasirdüticunäpämi canꞌa. Chayćhümi sasirdüticunäpa wasincuna caycunꞌa. Chay sityumari alawana wasïpä japächaśha canꞌa.

5Chaynütacmi alawana wasićhu sirbï Levi ayllucunäpä partinta uycunqui. Chaymi largunman ćhunca ishcayniyu ćhawpi (12.5) quilümitru canꞌa; anchunmanñatacmi picha quilümitru canꞌa. Chayćhümá paycuna yaćhapäcunanpä malcan canꞌa.

6“Yaꞌapä japächaśhayqui allpap matällanćhümi jinantin Israel malcapäpis japächaycunqui. Chaypa largun ćhunca ishcayniyu ćhawpi (12.5) quilümitrum canꞌa; anchunmanñatacmi ishcay quilümitru ćhawpin canꞌa.

7“Mandacücäpäñatacmi ishcay partićhu allpanta japächaycunqui. Chay jucnin partinmi inti yalamunan lädućhu canꞌa. Juc partinñatacmi inti jiꞌalpunan lädućhu canꞌa. Ćhawpićhümi yaꞌapä japächaśhancäwan malcapa japächäśha caśhanca canꞌa. Chayurá juc ayllucunäman tücaśhannümi inti yalamunan cä lädućhu culindanpïta allaycul inti yaycunan cä lädućhu culindancama tücanꞌa.

8Chay partimari mandacücäpä canꞌa. Chaymi mandacünïcuna malcäta manaña usuchipäcunꞌañachu. Aśhwanpa Israelćhu lluy ayllunpa-camam aypuycuśha caycälinꞌa.

9“Yaꞌa Tayta Diosmi ní: Israelpa mandacünincuna, ¡supayapachinacuycätawan usuchiycäta caćhaycapäcuyña! ¡Tincüllanman, cällanman imactapis lulaycäliy! ¡Malcäta amaña waycayaychu! Yaꞌa Tayta Diosmari niyá.

10“Balansayquipis tupucuyquipis imam llasaśhallanta tupunayquipämi caycunꞌa.

11Lluy tupucucta ‘homer’ nishan tupucuwanmi tincuycachinqui. Chay homer tupucu ishcay paćhac ishcay ćhunca (220) litructa yaycümi canꞌa. Chay ‘bato’ nishan tupuñatacmi ishcay ćhunca ishcayniyu (22) litru yaycü canꞌa. Chaqui micuyta tupunapä cä ‘Efa’ nishanca ishcay ćhunca ishcayniyu (22) quïlu yaycümi canꞌa.

12Juc ‘siclo’ nishancäñatacmi ishcay ćhunca (20) ‘gera’ nishanta llasanꞌa. Chay ‘mina’ nishancäñatacmi süta ćhunca ‘siclo’ nishanta llasanꞌa.

13“Uycunayquita caynümi uycälinqui: Siwä, trïgu cusichayquipi süta ćhuncaman-camam (60) laquiycunqui. Chay laquishayquipi-cama jucta-camam uycunqui.

14Asayticunätañatacmi paćhacman-cama (100) laquiycunqui. Chay laquishayquipi-camam jucta-cama uycunqui.

15Allinnin pastućhu cä uwishniquicunactañatacmi ishcay paćhacman-cama (200) laquipäcunqui. Chay laquisha cäcunäpïmi jucta-cama japächaycunqui ćhacla micuywan uycunayquipä, cañaywan uycunayquipä, allin cawsaśhanpi uycunayquipäpis juchayquicunacta pampachaycälishunayquipä. Yaꞌa Tayta Diosmari niyá.

16“Chay uycunacunacta lluy Israel nunacunämi mandacüninman uycälinan.

17Chayurá chay mandacücämi apanꞌa: cañaywan uycunaćhu, ćhacla micuy uycuyćhu, allin cawsaśhanpi uycuyćhu, jinaman jićhaywan uycunapä cäcunäćhu uycälinanpä. Chaynütacmi mandacüca apaycunꞌa Tayta Diospa fistancunaćhu, llullu quillaćhu, jamana muyunćhu, malcap juc fistancunaćhüpis uycunancäta uycälinanpäpis. Paytacmá chuyanchacuyćhu, mana allin cawsaypi uycuyćhu, cañaywan uycuyćhu, allin cawsaśhanpi uycuyćhu uycälinanpäpis apanꞌa. Chaynüpamari Israel nunacunäpa juchancunacta pampachaycachinꞌa.

18“Yaꞌa Tayta Diosmi niyá: Alawana wasicta chuyanchaycunayquipämi wamä quillap, wamä muyunninćhu tuqui allinnin malta wäcacta watan-watan uycunqui.

19Chay juchanpi uycunacta apamuśhanpä yawarnintam sasirdütica camaycunꞌa. Chaywanmi alawana wasip paradïruncunacta, uycuna patacpa tawan isquinancunacta, luli patyup puncunpa paradïruncunactapis llushiycunꞌa.

20Chaynüllatacmi chay quillap anćhish muyunninćhüpis lulaycunꞌa mana tantial ütac pantaypa juchacta luläcunäpä. Chaynüpam alawana wasi chuya caycunꞌa.

21“Chay wamä quillap ćhunca tawayu (14) muyunninćhümi lulaycunqui Egiptopi Libraculcäśhan Fistacta. Chay fistacta anćhish muyunmi lulapäcunqui. Chay muyuncunaćhuꞌa mana libadürayu tantactam micapäcunqui.

22Chay fistaćhümi mandacüca quiquinpa juchanpïta, chaynütac malcap juchanpïtapis juc malta wäcacta apaycunꞌa.

23Chay anćhishnintin fista muyuncäćhümi Tayta Diosman uycälinanpä tuqui allinnin anćhish malta wäcacunacta, anćhish ulu uwishcunacta mandacüca muyun-muyun alistaycunꞌa. Chaynütacmi juchanpïta juc ulu capishtapis muyun-muyun apaycunꞌa.

24Chay malta wäcapa-cama, ulu uwishpa-camam ishcay ćhunca (20) quïlu ćhacla micuytawan quimsa litru ćhawpin asayticta uycälinanpä mandacüca alistaycunꞌa.

25“Anćhish quillap ćhunca pichayu (15) muyunninćhümi anćhishnintin fista muyuncunäćhu uycälishayquinu uycälinqui. Chayćhu jucha lulaśhanpi uycunanpä, cañaywan uycunanpä, ćhacla micuyta uycunanpä, asayticta uycunanpä cäcunätapis mandacüca alistaycunꞌamá.