Ezequiel 14 - Old Testament Quechua Wanca（QVW）

Taytachacunacta alawäcunaca mućhuycachisha cananpämi willacun

1Chaypïtam Israel lädu waquinnin yaśhacuna tapuculcä yaꞌaman śhapämul puntäćhu taycacaycälin.

2Chayćhümi Tayta Dios niman:

3“Wañucülla nuna, cay nunacunäpa śhunꞌunpis taytachancunallaćhümá cayalcan. Chay palpachinancätalämari licapayalcanpis. Chaynu cayalcal ¿cäranpis cañälächun yaꞌactalä tapucayalcämänanpä?

4Paycunacta nimuy: Tayta Diosmi nin: ‘Mayan Israel lädupis taytachancunallaćhu śhunꞌun cayalcaptin, chay palpachinancätalä licapayalpis Tayta Diospa willacüninmanlämá tapucüpis taplapämun. Paycunactam achca taytachancuna-laycu yaꞌa Tayta Dios tincüninman licaycuśhä.

5Chaynüpa ichapis taytachan-laycu japächacü Israel läducunäpa śhunꞌunta yaꞌa suwaycüman cutipämunanpä’ nil.

6“Chaymi Israel läducunäta ninqui: ‘Tayta Diosmi nin: Chay taytachayquicunacta caćhaycapäcuyña; mana allin millachicuy lulayniquicunapi cärayquita japächaculcay.

7Israelćhu yaćhä Israel lädu nunapis ütac mana Israel lädu nunapis yaꞌapi japächaculculmi taytachanćhu śhunꞌunpis cayalcaptin, chay palpachinancätalä licapayalcalpis yaꞌa Tayta Diospa willacünïmanlämi tapucüpis taplapämun. Chaynu nunacunäta yaꞌa quiquí Tayta Diosmari licaycuśhä.

8Chay nunap cuntran śhalculculmá lluy jamuyäculcänanpä, licaculcänanpä ćhulaycüśhä. Malcäpïpis wicapäśhämá. Chaynüpamari yaꞌa Tayta Dios caśhäta yaćhapäcunqui.

9“ ‘Canan má, jucnin willacü ingañachiculcul yanꞌalta willacuptinꞌa yaꞌamari pantächilá. Payman maquïta ćhulayculmi Israel malcäpïta yaꞌa chincächishä.

10Chay tapucücäpis, willacüpä pasachicücäpis mućhuycachishamá capäcunꞌa.

11Jinaptïmi Israel malcaca yaꞌapïta japächacüśha, pantäśha manaña pulipäcunꞌachu, nï millachicuyćhüpis capäcunꞌañachu. Paycuna malcämi capäcunꞌa; yaꞌañatacmi Tayta Diosnin caśhä. Yaꞌa Tayta Diosmari niyá’ ” nil.

Jerusalen mućhuycachisha cananpämi willacun

12Chaypïtam Tayta Dios niman:

13“Wañucülla nuna, mayan malcapis cuntrá mana allinta lulalcul ipanchamäcätá maquïta ćhulayculmi mućhuycachishä. Chaynütacmi micuynincunactapis chincächishä; micuy wanayta ćhächiptïmá nunacunapis, uywancunapis wañuculcanꞌa.

14Masqui chay malcaćhu Noe, Daniel, Job yaćhapäcuptinpis tincüllanman allin cawsaycälishanpi paycunallamari salbaculcanman, manamá lluy nunachu. Yaꞌa Tayta Diosmari niyá.

15“Canan má, chucaru uywacunacta chay malcaman caćhaycüluptí chayćhu cäcunäta camacaycülunmanmi. Chaynu malcaca chunyäman licalïluptinmi chucaru uywacunäta manchacul chayninpa mana mayanpis pasayta munapäcunmanchu.

16Masqui chay quimsa nunaca chayćhu cawsapäcuptinpis walaśh-wamla chulincuna manamá salbaculcanmanchu. Chay quimsallanmi salbaculcanman; jinantin malcäñatacmi pasaypi camacaycüśha quïdanman. Yaꞌa Tayta Diosmari niyá.

17“Chaynütac má, chay malcaman ispädacta caćhamuptí lluy nunacunäta, uywacunäta camacaycülunmanmi.

18Masqui chay quimsa nunaca chayćhu yaćhapäcuptinpis walaśh wamla chulincuna manamá salbaculcanmanchu. Chay quimsallanmi salbaculcanman. Yaꞌa Tayta Diosmari niyá.

19“Chaynütac má, chay malcaman ishyaytawan sumä piñacuynïta ćhächimuptí lluy nunacunapis uywacunapis camacälunmanmi.

20Masqui chayćhu Noe, Daniel, Job yaćhapäcuptinpis manamá walaśh wamla chulincuna libraculcanmanchu. Allin nuna capäcuśhanpïtam paycunalla libraculcanman. Yaꞌa Tayta Diosmari niyá.

21“Yaꞌa Tayta Diosmi ní: Chay juc nasyuncunäpä chaynu cayaptinꞌa maynülämi cay Jerusalenman sumä-cama tawa mućhuchicuynïta: gïrracta, micuy wanayta, munti uywacunacta, ishyaycunactaApo 6.8. caćhaycämuptí lluy nunacunätawan uywacunäta camacaycülunꞌa.

22Chaynu captinpis juc ishcaylla cawsayniyu quïdapäculmi chulincunawan yalapämunꞌa. Amcunaman ćhämuptinñatacmi paycunap mana allin cawsaynin, lulaynin caśhantapis licaycälinqui. Chaymi nipäcunqui: ‘Caynu captinćhá Jerusalenta Tayta Dios camacaycüla’ nil.

23Paycuna imanuy cawsapäcuśhanta, imacta lulapäcuśhanta licapäculmi amcuna jawcayapäcunqui. Chaymi Jerusalenćhu lluy lulaśhäcunaca yanꞌalpi mana caśhanta tantiapäcunqui. Yaꞌa Tayta Diosmari niyá” nil.