1Tayta Diosmi nin:
“Yaꞌacta ashimäcuna,
tincüninman cawsayta alcäcuna uyalipämay.
Mayannin wancapïta juluśha
capäcuśhayquitari tantiacaycäliy;
mayannin lumipïta julüśha caśhayquitari licacaycäliy.
2Má, taytayqui Abrahammanꞌari tantiaycäliy;
waćhacuśhüniqui Saramanꞌari tantiaycäliy.
Payta ayaptí jucllayllam cala;
ñatac allin cananpä niyculmi achca-achcaman milaycachilá.
3“Yaꞌa Tayta Diosmi Sionta caśhan cunsuylaycuśhä;
pampaman muyüchisha malcactam caśhan cunsuylaycuśhä.
Chunyä ulꞌucunätam Eden wirtaman muyuchishä;
amya allpacunätam yaꞌa Tayta Diospa wirtäman muyuchishä.
Chayćhümi cushicuylla, allin cawsaylla caycunꞌa;
sulpäta uycuywan taquicunallam caycunꞌa.
4“Cuyacuśhá malcäní, tuquicta uyalipämay;
cuyacuśhá nasyunní, sumäta uyalipämay.
Yaꞌapïmari camachicuyca yalunꞌa;
tincüninman licaycuynïmari lluy nasyunman acchinu ćhaycunꞌa.
5Tincüninman licaycunäca cayllaćhüñamá cacuyan;
salbaycunäca jananchicćhüñamá cacuyan.
Nasyuncunäta sumä munaynïwanmari cäraycuśhä.
Calu lamar patanćhu yaćhäcunaca yaꞌactamá alcaycälimanꞌa;
munaynïmanmá chalapaculcanꞌa.
6Má, sïlüta licaycäliy;
cay allpäta licaycäliy.
Sïlucunaca untaycänu chincacüllamá;
cay allpäpis müdananu lataśhyällamá.
Cay allpäćhu yaćhäcunäpis chuspinu chincacüllamá.
Salbacü caśhäñatacmi ichá wiña-wiñaypä tacyaycun.
Tincüninman mandacuyniꞌa manam imaypis camacanchu.
7“Mayannin allin ütac mana allin caśhantapis tantiäcuna uyalipämay;
yaćhachicuynïta śhunꞌuyquićhu uywäcuna uyalipämay.
Nunacunaca usuchipäcuśhuptiqui ama manchaculcaychu;
palapäcuśhuptiquipis ama jucmanyapäcuychu.
8Müdanacta puyu camacaycüśhannümá
paycuna camacaycüśha capäcunꞌa;
millwactanümá culucuna micalälinꞌa.
Tincünïman licaycünïñatacmi ichá
wiña-wiñaypä tacyaycunꞌa;
salbacü caśhämi ichá imaypis mana camacaycü canꞌa” nil.
9¡Tayta Dios śhalcuyñari!
¡Munayniquiwan śhalcuyña!
Sumä munayniquiwan müdacuyña.
Punta timpućhünuꞌari śhalcuyña.
¿Manachun lamarćhu cä manchanaśh
Egiptocta camacaycülanqui imamá?
10¿Manachun sumä luli-luli lamarcäta
chaquichïca cayanqui imamá?
¿Libraycuśhayquicunaca manachun lamarpa lulinćhu caminu
lulaycuśhayquipalä pasapäculä imamá?
11 Tayta Diospa libraycuśhancunaca cushisha
taquicunacta taquishtinmá Sionman cutipämunꞌa.
Sumä cushicuymá paycunaćhu imaypis timpuycunꞌa.
Ancha cushicuyllaćhüña captinmari nanaynincunapis,
llaquicuynincunapis chincacunꞌaña.
12 Tayta Diosmi nin:
“Yaꞌami cunsuylaycüniqui cá.
Chayurá ¿imapïmi ulänülla wañucü
nunällacta manchacuyalcanquiman?
13Ñatac ¿sïlütapis maśhtaycü,
cay allpätapis tacyaycachï
Tayta Diosniquitachun unꞌälälinquiman imamá?
¿Ñacachishüniquipa piñacuyninta walan-walan
manchaśhallachun cawsayanquiman imatá?
¿Mayćhümá chaycunap piñacuynin rabyacuynin cayan?
Chincacunñamari.
14Ñacachisha prïsuśha cäcunämi libraycuśhaña capäcunꞌa.
Manamá carsilcäćhu wañunꞌachu;
manatacmá micuypis pishiycunꞌachu.
15Lamarcäta cuyuchï
yacuncunactapis manyanman
mächichimü Tayta Diosmi yaꞌa cayá.
Sumä munayniyu Tayta Diosmari śhutí.
16Sïlütapis yaꞌami maśhtayculá;
cay allpäpa simintuntapis yaꞌami ćhulayculá.
Limaynïta shimiquiman yaꞌami ćhulaycamulá;
maquïwanmi imapïpis pacayculac.
Sionćhu yaćhäcunätapis yaꞌami nilá:
‘Anmi malcá canqui’ ” nil.
17¡Jerusalen, licaćhacuyñari, licaćhacuyñari!
¡Tayta Diospa piñacunan bäsunpïta
am upyäca licaćhacuyñari!
Shincachishunayquicama upyayta camacäca śhalcuyña.
18Lluy uywaśhayqui wawiquicunapïta
manamá mayanllanpis puśhaycüniqui canchu.
Lluy ishpichishayqui wawiquicunapïta
manamá jucllanpis maquiquipïta chancüniqui canchu.
19Ishcay ñacaymi ćhäśhunqui:
Malcayquimá pulumächisha jinaman camacaycüśha canꞌa.
Nunayquicunamá pilyawan micuypi lluy wañülälinꞌa.
¿Mayanllá llaquipaycuśhunquimanmá?
¿Mayanllá cunsuylaycuśhunquimanmá?
20Wawiquicuna pasaypimá lawtïlälin;
trampa chaläśha luychunümá
caminup isquinancunaćhu cućhpälälin.
Chaynu cayalcan Tayta Dios
piñacuyninwan lawćhaycuśhanpïtamá.
21Chaymi canan llaquisha cä malca,
bïnuctapis mana upyayal shincäśha cäcuna tuquicta uyalipämay.
22Malcanman śhalcuyä quiquin
Tayta Diosniquim nin:
“Shincachishüniqui bäsuctamá
maquiquipi quitälú.
Piñacuyní bäsupïta manañamá upyapäcunquiñachu.
23Aśhwanpa ñacachishüniquimanmi
chay bäsupïta upyachishä;
paycunamari nishulanqui:
‘Pampäman jitalacuycuy janayquip pasanäpä’ nil.
Amcunap waśhayquicunam
paycunap pulipäcunan caminun cala” nil.
Who We AreWhat We EelieveWhat We Do
2025 by iamachristian.org,Inc All rights reserved.
