Ezequiel 25 - Old Testament Quechua Wanca（QVW）

Amon läducunäpa cuntranmi willacun

1 Tayta Diosmi niman:

2“Wañucülla nuna, Amon läducunäman ñawiquita ćhulaycul paycunap cuntran willacamuy.

3Yaꞌa Tayta Dios nishäta niycamuy: Alawana wasí jalutacüśha anlaman muyüchisha captin, Israelpa allpan pulumäśha captin, Juda läducunaca prïsu puśhaśha captin amcuna asipapäculanquimá.

4Chaymi inti yalamunan lädu nunacunäpa maquinman ćhulaycüśhayqui, munayninćhüña capäcunayquipä. Paycunañamá ćhaclayquicunaćhu carpancunacta śhalcalcachil chayćhu yaćhapäcunꞌa. Jinalmi talpuyniquicunactapis micapäcunꞌa, uywayquicunap lichincunactapis upyapäcunꞌa.

5Raba malcayquita camïllu uywacunap micunanmanmi muyüchishä. Amon läductañatacmi uwishcunap wićhalänanman licalïchishä. Chaynüpamá amcuna yaćhapäcunqui yaꞌa Tayta Dios caśhäta.

6Yaꞌa Tayta Diosmi niyá: Am Amon läducunämá, Israel mana allinman ćhäluptin śhunꞌuyquićhu cushicuypïta maquiquitapis chacchalcul-chacchalcul paćhcaycaćhaśhtin asipapäculanqui.

7Chaymi amcunaman maquïta ćhulaycul juc nasyuncunap munayninman jitaycüśhayqui. Paycunamá imayquitapis waycälälishunqui. Malcacunäpïtamá wicapäśhayqui, nasyuncunäpïtamá chincächishayqui. ¡Camacaycüśhayquimá! Chaynüpamari yaꞌa Tayta Dios caśhäta yaćhaycälinqui” nil.

Moab läducunäpa cuntranmi willacun

8Chaynütacmi Tayta Dios nin: “Moabwan Seir läducunam jamuyapäcula: ‘Juda lädu juc malcacunänüllamá cayan’ nil.

9Chaymi Moab lädup culindanćhu cä Bet-jesimot, Baal-meon, Quiriataim sumä-cama malcacunäta quićhaycul pichaypa-pichaycüśhä.

10Amon lädu, Moab läducunäta mayan nasyuncunapis manaña yalpalcunanpämari inti yalamunan lädu malcacunäpa maquinman ćhulaycuśhä.

11Tincüninmanmá Moab läducta mućhuycachishä. Chaymari yaꞌa Tayta Dios caśhäta yaćhaycälinꞌa” nil.

Edom läducunäpa cuntranmi willacun

12Chaynütacmi Tayta Dios nin: “Edom läducunämi Juda läducunäta sumä-sumäta cutichicülun. Chaynu lulapäcuśhanpamá sumä juchayu cayalcan.

13Chaymi yaꞌa Tayta Dios ní: Edom läducunäman maquïta ćhulayculmi nunancunactapis, uywancunactapis camacaycüśhä. Awari, pampamanmá lluy muyüchishä. Teman malcapïta aśhta Dedan läducamamá ispädawan wañupäcunꞌa.

14Israel malcäwanmá Edom läducta cutichicüśhä. Yaꞌa piñacuśhämannu, rabyacuśhämannümari paycunawan lulaycunꞌa. Chaynüpamá yaꞌa Tayta Dios cutichicuśhäta yaćhaycälinꞌa” nil.

Filisteo läducunäpa cuntranmi willacun

15Chaynütacmi Tayta Dios nin: “Filisteo läducunämi una-unaypïta Juda läducta ćhïniculcäla. Jinalmari śhunꞌun sumä timpuśhanmannu Juda läducta pampaman muyuchiyta munapäcula.

16Chaymi yaꞌa Tayta Dios ní: Filisteo läducunämanmi maquïta ćhulaycuśhä. Chay Ceret läducunäta camacaycüśhämi; lamarpa patanćhu quïdäcunätapis pampamanmi muyüchishä.

17Paycunacta sumä piñacuynïwanmi cutichicüśhä; rabyacuynïwanmi camacaycüśhä. Chaynu cutichicüluptïmá yaꞌa Tayta Dios caśhäta yaćhaycälinꞌa” nil.