Josue 4 - Old Testament Quechua Wanca（QVW）

Jordan mayupïmi ćhunca ishcayniyu lumicta julapämun

1Chaynu Jordan mayucta lluy chimpäläliptinñam Tayta Dios Josueta nin:

2“Ćhunca ishcayniyu Israel ayllucunapïta jucta-cama aclaycuy.

3Paycuna Jordan mayup ćhawpinćhu sasirdüticuna śhäcuśhancunäpi ćhunca ishcayniyu lumicta julapämuchun. Chay lumicunätam tutalpuśhanćhu jamapäcunayquiman ćhulapäcunanpä apapäcunꞌa” nil.

4Chaymi Josue ćhunca ishcayniyu aclaśhan Israel nunacunäta ayalcul nin:

5“Jordan mayup ćhawpinćhu Tayta Dios limalicuśhan babul caśhancäcama lipäcuy. Chaypïta ćhunca ishcayniyu Israel ayllucunaca juc lumincä-camam umrupämunqui. Chayćha apamuśhayqui lumicunaca ćhunca ishcayniyu canꞌa.

6Chay lumicunam amcunapä juc siñal canꞌa. Wala-śhalun chuliquicuna tapupäcuśhunquićh: ‘¿Imapätan cay lumicunaca?’ nil.

7Amcunañatacmi nipäcunqui: ‘Tayta Diospa limalicuśhan babulca pasayaptinmi Jordan mayuca ishcayman laquicacüla. Chaynu Israel caśhtacunäwan pasaśhanta cay lumicunämi imaypis yalpachimanchic’ ” nil.

8Chaynu Josue nishanmannümi Israel caśhtacunaca lluy lulapäcula. Chaymi ćhunca ishcayniyu ayllucunaca juc lumicta-cama Jordan mayup ćhawpinpi jululcul jamapäcuśhanman apapäcula. Chaymanmi Tayta Dios Josueta nishanmannu ćhulaycapäcula.

9Chaynütacmi limalicuśhan babulta apä sasirdüticunaca Jordan mayu ćhawpin śhaycuśhanćhu Josue ćhunca ishcayniyu lumicunacta ćhulala. Chayćhümari chay lumicunaca canancamapis cayalcanlä.

10Chayurá caynümi cala: Tayta Diospa babulninta apä sasirdüticunämi Jordan mayup ćhawpinćhu śhäcula, Josueman Tayta Dios camachishanta nunacunaca lulayta camacänancama. Josueman Moises camachishanmannümari imapis lulaycuśha cala. Chaymi lluy nuna bïbulla chimpapäcula.

11Chaynu lluy malcaca pasayta camacäläliptinmi Tayta Diospa babulnin apä sasirdüticunäpis pasapäcula. Jinalcul malcäpa ñawquin puntaman ćhulacacula.

12Chaynütacmi Ruben, Gad, ćhawpi ayllu Manases pilyä umrincunäpis pasapäcula. Moises nishanmannüllam paycuna Israel caśhta-masincunap puntanta lipäcula.

13Jerico malcap pampanman tawa ćhunca walanganu (40,000) pilyä wayapacunamari Tayta Diospa ñawquin armädu-cama pasapäcula.

14Chay muyunmi Tayta Dios Israel caśhtacunäpa ñawquin Josueta altuman juluycula. Chaymi Moisesta licapäcuśhannu lluy malcaca Josueta allinpä licaycälila.

15Chaypïtam Tayta Dios Josueta nin:

16“Tayta Diospa limalicuśhan babul apä sasirdüticunäta niycuy Jordan mayüpi yalapämunanpä” nil.

17Chaymi sasirdüticunäta mayüpi yalapämunanpä Josue niycula.

18Niptinmi Tayta Diospa limalicuśhan babulta apä sasirdüticunaca Jordan mayu ćhawpipi yalälälimula. Chaynu chaqui allpaman jaluycüllaptinmi mayüćhu yacuca patacnincunap caśhan pasayta allacuycula.

19Chaynüpam Israel malcaca wamä quillap ćhunca muyunninćhu Jordan mayüta chimpapäcula. Chay Jerico malcap inti yalamunan lädu Gilgalćhümi jamapäcula.

20Chay jamapäcuśhan Gilgalćhümari mayüpi apachimuśhan ćhunca ishcayniyu lumicunäta Josue ćhulachila.

21Jinalculmi Israel malcäta nin: “Wala-śhalun chuliquicuna tapupäcuśhunquim: ‘¿Imapätan cay lumicunaca?’ nil.

22Nipäcuśhuptiquim nipäcunqui: ‘Israel malcaca Jordan mayucta chaquillacta pasapäcuśhanpïmi’ nil.

23Puca Lamarcäta chimpapäcunäpä Tayta Diosniqui chaquichishannümi Jordan mayuctapis lluy pasananchicpä chaquichila.

24Chaynu lulala jinantin pachäćhu cä malcacunaca Tayta Dios sumä munayniyu caśhanta yaćhapäcunayquipämi. Chaynütac amcuna imaypis payta manchaculcänayquipämi” nil.