2 Cronicas 9 - Old Testament Quechua Wanca（QVW）

Saba nasyunpa mandacüninmi Salomonta lisiycü śhamun 1Rey 10.1-13

1Má, Salomon sumä alli yaćhayniyu caśhanta Saba nasyunpa mandacünin walmi uyalïlulmi, Salomonta yaćhapaycunanpä sumä sasa tapucuynincunwan, Jerusalenman śhamula achca yanapänincunawan. Camïlluncunawanmari cargapämulapis mishqui aśhnä pirfümicunacta, achca-achca ürucunacta, aläja tuquish lumicunactapis. Chaynu Salomonman ćhaycamulmi lluy tapucuynincunacta tapuycula.

2Salomonñatacmi ichá lluy tapucuynincunacta niycula. Manamari jucllay tapucuyllanpis mana niycuśhá quïdalachu.

3-4Chaynu Salomonpa sumä yaćhayninta, palasyucta, mishqui-cama micuynincunacta, pilyäcunap puydïnincunap wasincunacta, yanapänincunap sumä-cama müdanancunacta, bïnu sirbïnincunacta, jinaman Tayta Diospa alawana wasinman ishpinapä grädancunactapis licälulmi, Saba lädu nasyunpa mandacünin walmi äśhalayllaman camäla.

5Chaymi mandacü Salomonta nin: “Sumä yaćhayniyu caśhayquipis, lluy imacunacta lulachishayquipis malcäćhu cayal uyalishänümi rasunpa cacuña.

6Quiquí ñawïwan licaycunäcamalämi lluy nimäśhanta mana quirilächu; lluy willapämäśhancunapis imallamá. Sumä yaćhayniquiwan lluy lulaśhayquicunaca uyalishäpïpis mas-maslämá caculläña.

7¡Maynu cushishaćh nunayquicuna cayalcan! ¡Sumä allinćha sirbïniquicuna cayalcan muyun-muyun sumä yaćhayniquita uyalipäcul!

8¡Allinpä licaycul, Israelpa mandacüninpä dispächunman ćhulaycü Tayta Diosniqui altuman juluycuśha cachun! Pay, Israel malcanta cuyalmari allin tincüllanman, cällanman mandacunayquipä ćhulaycuśhulanqui” nil.

9Chaynu nilcuśhanpïmi Saba nasyunpa mandacünin walmica, quimsa walanga isun paćhac süta ćhunca (3,960) quïlu üructa, achca pirfümicunacta, aläja tuquish lumicunactapis Salomonman uycula. Chay Saba malcap mandacünin achca-achca uycuśhan pirfümicunänuꞌa manam imaypis Israel caśhtacunäman ćhämulachu.

10(Má, mandacü Hirampawan Salomonpa uyway nunancuna, Ofir malcapi üructa apamücunaca, sandalo nishan achca-achca ilucunactawan aläja tuquish lumicunactapis apapämulam.

11Chay sandalo ilucunäwanmi mandacü Salomon lulachila Tayta Diospa alawana wasinpä, jinaman palasyunpä barandancunacta. Chaynütacmi taquïcunäpäwan tucäcunäpä arpancunactawan arpa-nilä lïrancunactapis lulachipula. Chaynu sandalo ilucta achca-achca apapämuśhantanuꞌa Judaćhu manañamá canancamapis licalanchicchu.)

12Mandacü Salomonñatacmi, quiquinpa buluntäninpïta Saba nasyunpa mandacünin walmi lluy munaśhanta chaynütac lluy mañaśhanta uycula, chay apamuśhanpïtapis mastalä. Jinaycuptinmi lluy liwshïnincunawan nasyunninta cuticula.

Salomonpa cänincunawan yaćhaynincuna 1Rey 10.14-29; 2Cro 1.14-17

13Má, mandacü Salomonmi alcabälapi ishcay ćhunca ishcayniyu walanga (22,000) quïlu ürucunacta watan-watan ćhasquila.

14Ñatac lluy nigusyanticunaca, lanticücunaca pägapäcuśhanꞌa chayman manam fintaśhachu calapis. Jinaman Arabia lädup mandacücunaca, Israelćhu puydïpa ćhulaśhacunäpis üructawan illayta upäculatacmi.

15Mandacü Salomonmi ishcay paćhac (200) jatućhaćha-cama atajachicucta ürunllanllanpïta lulachila. Chay atajachicucunaca süta quïlu ćhawpipi-cama ürupi luläśham cacula.

16Chaynütacmi quimsa paćhac (300) tacsha-cama atajachicucunactapis ürupïta lulachila. Chaycuna quimsa quïlu ćhawpipi-cama ürupi luläśha-camam cacula. Lluy chaycunactam Libano Munti nishan palasyunman mandacüca ćhulaycachila.

17Chaynütacmi täcunan dispächuntapis marfilpïta lulalcachil chuya ürunllanllanwan laꞌachila.

18Chay täcunan dispächunmi cala: süta gradayu, ürupi jalupacuyu, pulan wätanćhu maqui ćhulacuyü-cama. Chaypa wätanćhümi juc liyun-cama luläśha śhäcuyalcäla.

19Chaynütacmi chay süta grädacunäćhu wicninćhu-cayninćhu süta-cama liyuncuna cala. Caynu dispächuctá manam mayan mandacüpis nï mayćhüpis lulachilachu.

20Chaynütacmi mandacü Salomonpa bäsuncunapis, lätuncunapis, Libano Munti nishan palasyunćhu cäcunaca ürunllanllanpïta cacula. Salomon timpu illayca mana licay munaśha captinmi illaypïtá jucllayllapis nï lulaśhachu cala.

21Mandacü Salomonpa barcuncunamari Hirampa nunancunawan quimsa watapïta-cama ürucunacta, illaycunacta, marfilcunacta, münucunacta, päbu riyalcunactapis Tarsis lädupïta apapämü cala.

22Mandacü Salomonmi jinantin pachäćhu mandacücunäpïta mas cäniyu, mas yaćhayniyu cacula.

23Chaymi jinantin pachäćhu mandacücunaca wañupaculcäla mandacü Salomonta licaycuyta, jinaman Tayta Dios yaćhay uycuśhanta uyaliycuytapis.

24Watan-watantacmi rigälucunacta Salomonman apapäcula: ürupi illaypi aläjacunacta, müdanacunacta, armacunacta, pirfümicunacta, jinaman cawallucunactapis, mulacunactapis.

Mandacü Salomonmi lantin 1Rey 10.26-29; 2Cro 1.14-17

25Cay mandacü Salomonpa tawa walanga (4,000) jatućhaćhä-cama curralnincunam cala, carritancunacta, cawalluncunacta ćhulananpä. Jinaman ćhunca ishcayniyu walanga (12,000) sillädancunapis jinaman juc nasyuncunapïtapis lantipämümi capäcula.Salomonmi wañucun 1Rey 11.41-43

29Salomonpa waquin cawsaynincunapi allaycuyninpi camacaynincama isquirbisha cayan, willacü Natanpa librunćhu, jinaman Silo malcayü willacü Ahiaspa librunćhu. Chaynütac Nabatpa chulin Jeroboam imanuy caśhantapis willacü Iddop isquirbishan librućhüpis cayantacmi.

30Jerusalen malcäpïtam jinantin Israelta, tawa ćhunca (40) wata Salomon mandala.

31Wañucuptinñatacmi papänin Davidpa Malcan nishan läduman pampapäcula. Chayurá paypa pudirnin chulin Roboamñam mandacüca cala.