1Nilculmi Tayta Dios yapañatac nin:
2“¿Sumä Munayniyücäwanlächun chalanacuyta munayanqui imatá?
Yaꞌacta niycamänayqui captinꞌa, má niycamayꞌari” nil.
3Niptinmi Job:
4“Yaꞌa pasaypi mana bälï nunaca ¿imactamá niycucman?
Shimïta chapacuycul upällam caculläśhä.
5Ancha-anchapñam limälú;
manañamá imacta mas limalcunäpäpis canñachu” nin.
6Niptinmi sumä waywäpa ćhawpinpi Tayta Dios nimun:
7“Cananꞌari maynu nuna-nuna caśhayquita licaycuśhun;
yaꞌa tapuptïmi am niycamanqui.
8¿Tincüninman licaycuynïta mana bälïpächun ćhulaycuyanqui imatá?
¿Juchannä licachicunayquipä yaꞌactachun juchachayämanqui imatá?
9¿Yaꞌapanüchun munayniqui cayan imatá?
¿Räyup suynayninnüchun ampa limayniquipis cayan imamá?
10Chaynu captinꞌa, sumä cayniquitari camalachicuy;
allinpä licaycuśha, munayniyu caśhayquiwanꞌari ćhulacuy.
11Sumä piñacuyniquitari camalaycachiy;
nunatucücunäta licaycuyllayquiwanꞌari pampaman muyüchiy.
12Nunatucücunäta licaycuyllayquiwanꞌari uyshulächiy;
mana allin nunacunäta mayćhu captinpis camacaycüluyꞌari.
13Pampaman pampaycüluy;
tutawyaycäman wićhaycüluy.
14Lluy caycunacta lulaycuptiquiꞌa yaꞌapis niycuśhayquim:
‘Quiquiquip munayniquiwanmi salbacunqui’ nil.
15“Má, licaycuyꞌari Behemot nishan
manchanaśh jatu-jatun uywacta.
Pay wäcacunänümá pastucunacta micun.
Ñatac amtapis paytapis yaꞌamari lulaycälilac.
16Licay, waśhancunaćhümá callpancuna;
caćhpanćhümari callpancuna cayan.
17Ćhupancunapis cedro ilunümá sumä-cama;
ancuncunapis wicman-cayman sumä pasanacüśhamá.
18Tulluncunapis brunsinümá;
caćhpancunapis jïrrunümi.
19“Lluy camaśhäpi, paymi wamä sumä allinnin lulayní;
lulänin yaꞌa Tayta Diosllam llalliycüman.
20Chucaru munti uywacunaca awsapäcuśhan
jaćha-jaćhacunämá sumä micuynincuna.
21Jatućha pallaysapa jaćhacunap
llantuyninmanmi jitalacaycälin;
ućha-ućhaćhu cä śhuꞌuśhcunämanmi pacacaycälin.
22Pallaysapa jaćhacunämari llantuycälin;
mayu patanćhu sauce lantacunämari cunćhaycälin.
23Mayuca sumä wiñamuptinpis manamá manchalinchu;
masqui Jordan mayuca sinꞌancama ćhaptinpis jawcallamá caycun.
24¿Mayanmá lichcayaptin chalälunman?
¿Mayantá chalalcul sinꞌanta ućhcülunman?
Who We AreWhat We EelieveWhat We Do
2025 by iamachristian.org,Inc All rights reserved.
