Jueces 2 - Old Testament Quechua Wanca（QVW）

Tayta Diospa caćha anjilninmi Boquim malcaćhu

1 Tayta Diospa caćha anjilnin Gilgalpïta Boquim läduman lilculmi Israel caśhtacunäta nin: “Amcunacta Egiptop maquinpïta jululculmi awquilluyquicunaman limalicuśhá allpaman puśhapämulac. Paycunactamari caynu nilá: ‘Amcunaman limalicuśhäta manam unꞌaśhächu.

2Amcunañatacmi ichá chay malcaćhu nunacunäwan imallactapis ama limalinaculcanquichu. Aśhwanpam uycuna patacnincunactapis tunïlälinqui’ nil. Chaynu niyaptïpis amcuna manam cäsupämälanquichu. Licapäcuyꞌari, ¿imactatan lulälälinqui?

3Chaymi canan yaꞌapis nic: ‘Chay malcacunäta manam amcunapi aluśhächu. Aśhwanpa paycuna uma nanayquimari capäcunꞌa; taytachancunapis trampanümi amcunapä canꞌa’ ” nil.

4Chaynu Tayta Diospa caćha anjilnin limayta camacäluptinmi lluy Israel caśhtacunaca apalcaćhaypa waꞌaculcan.

5Chaymi chay sityucta “Boquim” nïwan śhutichälälila. Chayćhümari uycunancunacta Tayta Diosman uycälila.

Josuemi wañun Jos 24.29-31

6Chaypi Josue “wasiquita-cama cuticulcay” niptinmi Israel caśhtacunaca tücaninman-cama duyñuchaculcänanpä cuticulcäla.

7Tayta Dios sumä jatun lulaśhancunacta licä yaśhacunaca cawsaśhancamá, chaynütac Josuepis cawsaśhancamá Israel caśhtacunaca Tayta Diosta sirbipäculam.

8Ñatac Tayta Diospa uywaynin, Nunpa chulin Josue paćhac ćhunca (110) watanta liyalmi wañucula.

9Chaymi Timnat-sera tücänin allpanćhu pampacula. Chay cala Efrain ayllup ulꞌuncunaćhümi, Gaas ulꞌunpa nurti lädunćhu.

10Chaynütacmi Josuepa wiñay-masin Israel caśhtacunaca lluy wañuculcäla. Chay ipa śhamü milaycunäñatacmi Tayta Diosta manaña lisipäculachu, nï Israel caśhtacunäwan ima lulaśhancunactapis yaćhapäculañachu.

Israel caśhtacunämi Tayta Diosta mana cäsuculcanchu

11Chaypïmi Israel caśhtacunaca Tayta Diospa ñawquin mana allinllactaña lulapäcula; Baalpa taytachancunactapis alawayta allacaycälilam.

12Awquilluncunacta Egiptopi julamuśhan Tayta Diosninta unꞌayculmari, muyülïninćhu malcacunäpa taytachancunacta alawä liculcäla. Chaynüpamá Tayta Diosta piñachipäcula.

13Chaynu Tayta Diosta caćhayculmari Baal, Astarot taytachacunäta alawapäcula.

14Chaymi Tayta Dios paycunawan piñacülul suwacuna lluy imancunactapis waycälälinanpä caćhaycüla. Muyülïninćhu ćhïnicünincunap maquinman ćhulaycüluptinmi imanaytapis manaña atipapäcul llallichicälälila.

15Chaymi mayanwanpis pilyayta allaycuptinꞌa Tayta Dios nishannüpis, limalicuśhannüpis paycunap cuntran Tayta Dios śhalcuculcuptin llallichicälälï-llallichicälälï capäcula. Jinalmi pasaypi llaquillaćhüña cawsapäcula.

16Jinaptinmi chay waycä suwacunäpïta libraycunanpä juc caminaycüta Tayta Dios śhalcachila.

17Chay caminaycücätapis manam cäsuculcälachu. Aśhwanpa ipanchayculmi juc taytachacunawan waticaculcäla. Chay awquilluncuna Tayta Diospa camachicuyninta cäsucuśhantá paycuna manam atichipäculachu.

18Ñatac Tayta Dios paycunapä caminaycüta śhaycachishancäta yanapämi cala. Chay caminaycüca cawsaśhancamá ćhïnicünincunapïtamá libraycula. Chaynu ćhïnicünincunap maquinćhu llaqui-llaquicta awćhuculcaptinmari Tayta Dios llaquipaycula.

19Caminaycüca wañüluptinñatacmi ichá taytancunapïpis masnintalä caśhallan mana allincäta lulapäcula, juc taytachacunacta sirbiyninwan, alawayninwan. Chay mana allin lulaynincunapïta, lumi śhunꞌu caynincunapïta manamá uchuyllapis wanacüchu capäcula.

20Chaymi Tayta Dios sumä-sumä piñacülul nin: “Cay malcaca taytanwan limalicuśhäta jalutaculculmi cäsucuytapis mana munapämanchu.

21Chaymi yaꞌapis mana alapacuśhächu Josue cawsayal manalä aluśhan malcacunäta.

22Yaꞌa Tayta Diosmi licaycuyta munayá Israel caśhtacunaca taytancunanüpis yaꞌacta atimäśhanta ütac mana atimäśhantapis” nil.

23Chaymi Josuepa maquinman manalä ćhulaycuśhan malcacunäta manaña alapaculachu; aśhwanpa paycunawan cusca yaćhapäcunanpäñam caćhaycüla.