Ezequiel 41 - Old Testament Quechua Wanca（QVW）

1Chaypïta alawana wasi yaycunanmanmi puśhäman. Chaypa pilancunacta tupuptinmi quimsa mitru-cama cay lädu wic lädun caña.

2Chay yaycuna puncup anchunñatacmi picha mitru caña. Chay puncup wic lädu, cay lädu pilancunañatacmi anchunman ishcay mitru ćhawpin-cama caña. Chay punta lädućhu Chuya Sityucta tupuptinñatacmi largunman ishcay ćhunca (20) mitru caña, anchunmanñatac ćhunca (10) mitru.

3Chay luliman yaycuycul juc sityuman yaycunapä paradïruncunacta tupuptinmi juc mitru tita cacuña. Puncup anchunñatacmi quimsa mitru caña. Chay puncup wic lädu, cay lädun pilanñatacmi quimsa mitru ćhawpin-cama caña.

4Chaypi luli sityucta tupuptinmi anchunmanpis largunmanpis ćhunca (10) mitru-cama caña. Chayćhümi tupü nunaca niman: “Caymi Sumä Chuya Sityuca” nil.

5Chaypïta alawana wasip pilanta tupuptinmi quimsa mitru tita caña. Chay alawana wasip waśha lädu muyülïninćhu cuartucunäñatacmi anchunman ishcay mitruyü-cama capäcuña.

6Chay cuartucunaca ishcay altuśhniyü-camam capäcuña. Chay altuśhćhu-camam quimsa ćhunca (30) cuartucuna caña. Chay alawana wasip muyülïninćhümi pasalayalcä sulïra-niläcuna capäcuña. Chaycunam altuśhćhu cä cuartucunäta chalalapäcuña. Chaymi alawana wasip pilanman mana śhatilapäcuñächu.

7Chay altuśhćhu cä cuartucunaca mas anchum lulinćhu cä cuartucunäpi capäcuña. Chay altuśhcunäman wichanapä muyu-muyu iscalïranpam ishpiña.

8Chaypïta alawana wasipis, muyülïninćhu cuartucunäpis quimsa mitru altu patacpa jananćhümi täcuyalcäña.

9Chay cuartucunap waśha lädu pilancuna ishcay mitru ćhawpi tita-camam caña. Chay cuartucunäta juc jäcümi laquiña alawana wasipïta.

10Chay alawana wasip muyülïninćhu cä jäcücämi ćhunca mitru anchu caña.

11Chay cuartucunap puncuncuna pasadïsumanmi yalapäcuña. Waquinnin puncucunam nurti läduman, juccunäñatacmi sur läduman yalapäcuña. Chay pasadïsucta tupuptinmi anchunman ishcay mitru ćhawpin caña.

12Alawana wasip ipan lädućhümi juc jatun wasi caña. Chay wasi licalayäña paytu lädumanmi. Anchunmi quimsa ćhunca pichayu (35) mitru caña; largunmanñatacmi tawa ćhunca pichayu (45) mitru caña. Pilancunap titanñatacmi ishcay mitru ćhawpin caña.

13Chaypïta alawana wasicta tupuptinmi largunman picha ćhunca (50) mitru caña. Chaynütac alawana wasip ipanćhu cä patyucta, wasicta, pilantinta tupuptinmi picha ćhunca (50) mitrutac caña.

14Alawana wasip anchunta, chaynütac puncunćhu cä patyup anchunta tupuptinmi picha ćhunca (50) mitru caña.

15Chaypïta alawana wasip ipanćhu cä jatun wasictam tupuña. Chay wasi ishcay lädu cuartuntinta tupuptinmi picha ćhunca (50) mitru caña. Alawana wasi lulinpis, yaycunanpis,

16tablawan laꞌaśham caña. Chaynütacmi puncup patannincuna, rïjaśhniyu bintanancuna, lluy pilancunapis pampäpïta bintanancama, jinaman bintananpïta jananmanpis tablacunawan laꞌaśha caña.

17-18Chaynütacmi puncup luli lädunćhu, jinaman pilancunap luli lädunćhu, waśha lädunćhüpis, juc querubin anjil, juc palmïra chaynu atinacuylla luläśha caña. Chay querubincunaca ishcay cärayu-camam capäcuña.

19Chay jucnin cäran nunap cärannu cäcämi licalayäña palmïracta. Juccä cäran malta liyunpa cärannu cäcäñatacmi juc lädućhu cä palmïracta licalayäña. Jinantin alawana wasip lluy muyülïninćhümari chaynu luläśha caña.

20Pampanpïta aśhta puncup janannincamam, querubinwan palmïracuna luläśha cacuña.

21Alawana wasiman yaycunaćhu paradïruncuna tawa isquinayü-camam caña. Chay Sumä Chuya Sityup ñawpäninćhu cäcäpis chimpanćhu cäcänüllam caña.

22Chayćhu tablapïta uycuna patacmi caña; altunninman juc mitru ćhawpin, anchunman largunmanñatac juc mitru. Chaypa isquinancuna, täcunan, läduncunapis tablallapïmari caña. Chayćhümi chay nuna niman: “Caymi Tayta Diospa ñawpäninćhu cä mïsaca” nil.

23Chay Chuya Sityup, chaynütac Sumä Chuya Sityup puncunpis ishcay üjayü-cama puncum caña.

24Chay puncucuna ishcay üjayü-cama calmi, wic läduman cay läduman quićhacacuña.

25Chay pilancunaćhu luläśha cäcunänümi puncuncunaćhüpis querubinwan palmïracuna luläśha cayalcäña. Alawana wasiman yaycuna puncućhu tablawanmi atalayalcäña.

26Yaycuna curridurpa wic lädu, cay lädu bintanancunaćhümi palmïra luläśha-cama caña. Alawana wasip matäninćhu cuartucunactapis llantunanpä atacuyümi caña.