1Niptinmi Teman lädu Elifaz nin:
2“¿Nunaca imallaćhuꞌa Tayta Diosta yanapaycunmanmá?
¿Masqui maynu yaćhayniyücäpis yanapaycunmanchun imatá?
3¿Mana juchayu nuna caśhayquipi imactatá sumä munayniyüca julucun?
¿Masqui allin cawsaycuptiquipis imallaćhuꞌa yanapaycunmanmá?
4¿Manchacuywan payta uyalicul
cawsaycuśhayquipïchun caynu cäraycuyäśhunqui imamá?
5¿Manachun mana allin lulayniquicuna ancha-anchap imatá?
¿Manachun juchayquicuna mana camacaycüña imatá?
6“Yanꞌal-yanꞌalpïmari malca-masiquicunap ima cänincunactapis chalacuycunqui.
Awari, wacchacunäta calapatallactamá caćhaycülanqui.
7Pasaypi pishipäśhacunäta manamá yacullactapis chacchayculanquichu;
micanäśhacunätapis manamá tantallayquitapis uyculanquichu.
8Allin puydï, sumä allinpä licaśha cayniquiwanmá
jinantin allpätapis duyñuchacuyculanqui.
9Japanyäśhacunätapis imallactapis mana uyculćha cutichilanqui;
mana taytayu-mamayu cäcunätapis ñacachilanquićh.
10Chaymari canan imaymana ñacaycunap ñitïsha cayanqui;
manchacuypïta sumä-sumä chucchuyanqui.
11Chaymari tutawyayca manaña licachishunquiñachu;
sumä-sumä llülla śhamüca awnayächishunquiña.
12“Má, ¿manachun sïlüpïtapis mas altunninćhülä Tayta Dios cayan imatá?
Paypa ćhaquillanćhümá altu-altućhu cä uyllurcunäpis cayan.
13Chaychun amñatac: ‘¿Imactamá Tayta Dios yaćhan?
¿Imanuypatá sumä tutawyaycäpïta cäraycamunman?
14Janay pachäćhu wicman-cayman puliyalmá,
jinaman sumä-sumä pucutaypa taycüśha cayalmá mana licamanchicchu’ nil niyanquimanlä canpis.
15“¿Mana allin nunacunaca punta cawsapäcuśhantachun
ampis atichiyta munayanqui imatá?
16Paycuna manaläpis timpunćhümi camacaycüśha capäcula;
llülla licalilcamul apaśhannümá tacyapacuyninta camacaycüla.
17Paycunamá Tayta Diosta nipäcula: ‘¡Ama piñachipämaychu!
¿Am, Sumä Munayniyüca imactatan yaꞌacunapä lulaycunquiman?’ nil.
18Chaynu niyaptinpis wasi junta imanpis cananpä paymari camaycachila.
Chaymari yaꞌañatac, chay mana allin limapaynincunawanꞌa mana apachicuśhächu.
19Mana allin nunacunaca ñacayman ćhäpäcuptinmá chuya nunacunaca cushiculcan.
Juchannä nunacunaca asipapäcun:
20‘Licayꞌari, ćhïnicüninchiccunam camacaycüśha licalïlälin;
lluy ima cänintapis ninamá camacalpülun’ nilmá.
21“Canan, allin jawca cawsayta caśhan taliycunayquipä
Tayta Diospa munayninman ćhulacuy.
22Paypa yaćhachicuyninta uyalicuy;
limapäśhuśhayquita śhunꞌuyquiman ćhulaycuy.
23Sumä Munayniyücäman cuticamul,
mana allin lulayniquicunacta caćhayculꞌa śhalcachishamá canqui.
24Sumä fïnu üruyqui cäcunäta allpactanüña licaycuptiquiꞌa,
jinaman mayućhu cä lumictanüña licaycuptiquiꞌa,
25Sumä Munayniyücäñamá üruyqui caycunꞌa;
payñamá mana camacaycü illayniquipis caycunꞌa.
26Sumä Munayniyücämi cushicuyniqui caycunꞌa;
Tayta Diosmanmi umayquitapis pallalcunqui.
27Mañacuyniquitapis paymi uyaliycuśhunqui;
amñatacmi ima limalicuśhayquitapis lulaycunqui.
28Ima lulaśhayquipis allinmi yaluycunꞌa;
cawsayniquipis acchiycunꞌamá.
29Mayanpis ñacayćhu cayaptin: ‘Yanapaycuy’ nil mañacuptiqui,
Tayta Diosñatacmi yanapaycunꞌa.
30Aśhta juchasapacunäpis libraycuśhamá capäcunꞌa.
Allin lulaycuśhayquipamari juccunäpis juluycuśha capäcunꞌa” nil.
Who We AreWhat We EelieveWhat We Do
2025 by iamachristian.org,Inc All rights reserved.
