Numeros 18 - Old Testament Quechua Wanca（QVW）

Sasirdüticunäpä levitacunäpä lulaynincunapïmi nin

1Chaypïtam Aaronta Tayta Dios nin: “Anmi, chuliquicunawan, Levi aylluyquicunawan juchayu canqui mayanpis carpacta mana allinta luläluptinꞌa. Sasirdüti lulayniquićhu mana allincunacta luläluptiquim ichá amwan chuliquicunalla juchayu capäcunqui.

2Limalicuśhan babulpa caśhanćhu ampis chuliquipis lulayalcaptiqui Levi aylluyquicuna yanapapäcuśhüniquim capäcunꞌa.

3Paycunam ima lulayniquićhüpis yanapapäcul Chuya Sityucta licaycälinꞌa. Ñatac Chuya Sityućhu ima cänincunamanpis, nï uycuna patacmanpis manam aśhuycälinanchu. Jinapäculꞌa ampis, paycunapis wañupäcunquimá.

4Pay yanapäniquicunamari tincuna carpaćhu ima lulayniquicunaćhüpis yanapapäcuśhunqui. Amcuna lulayniquićhu lulayalcaptiqui mana unanchaśha juc ayllucunaca manamá aśhuycälimunmanchu.

5Chay chuya cäcunäpïtawan uycuna patacpïta amcunallam licaycüca capäcunqui. Chaynu captinćha Israel caśhtacunäwan manaña caśhan piñacuśhächu.

6Jinantin Israel caśhtacunäpïtamari wawꞌi-caśhayqui Levi ayllucunäta japächayculá, anman dinbaldilla uycunacpä. Paycunamari japächäśha cayalcan tincuna carpaćhu Tayta Diosta sirbipäcunanpä.

7Ñatac amwan chulillayquicunam sasirdütinu sumäta licaycälinqui, uycuna patacćhu lluy cäcunäta, jinaman curtïnap ipanćhu lluy cäcunätapis. Amcuna sasirdütinu lulaycälinayquipä yaꞌami dinbaldilla uycälilac. Mayanpis unanchaśha mana cayal lulaycücá wañunꞌamari” nil.

Tayta Diosman uycuśhancunäćhu sasirdüticunäpä tücänincunapïmi nin

8Chaypïtam Aaronta Tayta Dios nin: “Israel caśhtacunaca uycapämänanpä apapämuśhancunäta licaycunayquipä yaꞌa quiquïmi ćhulaycuc. Chay uycapämäśhanta japächaycapulac ampäwan chuliquicunapämi. Cay camachicuymari wiñaypä canꞌa.

9Uycuna patacćhu mana cañana japächaycuśhacunämi anman tücaśhunqui. Israel caśhtacunaca uycuśhancunaca ampämari canꞌa: ćhacla micuy uycuśhanca, cañaywan uycuśhanca, chuyanchaycunanpä uycuśhancäpis. Caycunam ampäwan chuliquicunapä chuya uycuna canꞌa.

10Caycunacta lluy wayapacunämi carpaćhu micapäcunꞌa. Lluy-lluy caycunacta chuyapämari licapäcunqui.

11“Chaynütacmi Israel caśhtacunaca altuman pallalcul uycapäcuśhancunäta amtapis, walaśh wamla chuliquicunapäpis uycälic. Cay camachishäca wiñaypämi canꞌa. Mayanpis aylluyquićhu chuya cäcunaca micapäcunmanmi.

12Chaynütac Israel caśhtacunaca wamä cusichanpi Tayta Diosman apapämuśhancunätapis anmanmi uycuc: asayticta, bïnucta, trïguctapis.

13Wamä cusichanpä wayuyninta Tayta Diosman apaycamuśhancunaca ampämari canꞌa. Mayanpis aylluyquićhu chuya cäcunaca chaycunapïta micapäcunmanmi.

14Israel caśhtacuna uycapämäśhancunacaLev 27.28. am Tayta Diosllapä japächäśhamari canꞌa.

15“Chaynütac Israel caśhtacunäpa wamä chulincunapi, uywancunap wamä wawincunapi Tayta Diosman uycuśhancunaca amcunapämi canꞌa. Ñatac chay wamä chulincunapïta ütac anla uywacunäpïta pudirnintam uycälishunqui.

16Chaynu juluculcanman wamä näsïca quillayü cayällaptinmi. Chaypa ćhanin picha illaymi canꞌa; carpap midïdanmannümari ćhunca jucniyu grämu canꞌa.

17Ñatac wäcap, uwishpa, capishpa wamä wawincuna capäcuśhanpam pudirninta śhaycaycachil mana julucunmanchu. Chaycunap yawarnintam uycuna patacman chächuycunqui; jinaman Tayta Diosman tuqui mishqui aśhnä ćhaycunanpä wilantam cañaywan uycunqui.

18Aychanñatacmi ampa canꞌa, chaynütac altuman pallalcul uycuna pïchunpis allï caćhpanpis.

19Israel caśhtacunaca lluy uycamäśhancunäta anman, walaśh wamla chuliquicunamanpis uycucmi. Cay camachishäca wiñaypämari canꞌa. Chaymi cay limalicuśhäta amwanpis, milayniquicunawanpis lulaycuśhä” nil.

20Chaypïtam Aaronta Tayta Dios nin: “Cay Israel caśhtacunäćhu allpayqui nï ima ćhaclallapis ampa manam canꞌachu. Jinantin Israel caśhtacunäćhu yaꞌamari cäniqui, partiqui caśhä.

21Israel caśhtacunaca cusichancunapïta apapämuśhancunämi Levi ayllucunäpä tücänin canꞌa. Chaymi tincuna carpaćhu sirbipäcuśhanpi canꞌa.Lev 27.30-33; Deut 14.22-29; Mal 3.8-10.

22Juc Israel caśhtacunaca tincuna carpaman amam aśhuycälinꞌachu; yanꞌalmi juchacälälil wañülälinman.

23Chaymi levitacunälla tincuna carpaćhu sirbipäcunꞌa, jinaman malcap juchancunactapis paycunatacmi apaycälinꞌa. Cay camachicuyca lluy milayniquicunapämi wiña-wiñaypä canꞌa: Israel caśhtaćhu levitap tücänin allpa manamá canꞌachu.

24Levitacunäta tücaycachilá lluy Israel caśhtacunaca Tayta Diospä uycunancäta apamuśhancunätamari. Chaymi Israel caśhtacunäćhu ima allpactapis manaña tücaycachilächu” nil.

25Chaypïtam Moisesta Tayta Dios nin:

26“Levitacunätam caynu nimunqui: ‘Israel caśhtacunäpi ćhuncapïta jucta-cama ćhasquipäcunayquipä tücachishuśhayquipïta amcunapis ćhuncapïta jucta-camam altuman pallalcul Tayta Diosman uycälinqui.

27Chay uycapäcuśhayquica canꞌa ïraćhu cä trïgupi ütac üba apchichishayquipi japächaycuśhayquinümá.

28Chaynüpamari ćhuncapïta jucta-cama Israel caśhtacunäpi ćhasquipäcuśhayquipïta Tayta Diospä japächaycälinqui. Chaytamari sasirdüti Aaronman uycälinqui.

29Lluy uycälishuśhayquipïta Tayta Diospa uycälinayquipätacmi japächaycälinqui. Chay allinninta japächaycuśhayquimari chuya caycunꞌa’ nil.

30“Chaynütacmi ninqui: ‘Chaynu allinninta Tayta Diospä japächaycuptiquiꞌa, levitacunaca licaycuśha canꞌa, trïgu, bïnu uycuśhayquicunänüñamá.

31Chay mana uycuśhan partictañatacmi ampis lluy aylluyquipis mayćhüpis micapäcunquimanña. Tincuna carpaćhu sirbipäcuśhayquipïmi päguyqui canꞌa.

32Chaynu allinninta uyculꞌa puchücäta micapäcuptiqui manañam juchaculcanquichu. Chaynüpam Israel caśhtacunaca chuya uycapäcuśhancunacta millachicuyman mana muyuchipäcunquichu, nïtac wañupäcunquipischu’ ” nil.