1Damasco malca imanuy cananpämi Tayta Dios willacachila cay nil:
“Damasco malca manañamá malcañachu canꞌa;
tunïsha pilacunallañamá muntulayanꞌa.
2Aroer lädućhu malcacunaca chunyapäcunꞌañamá;
ulacunallañamá uywacuna micapäcunanpä cayanꞌa.
Chayćhu uywacunaca pipapis mana manchachishañamá micapäcunꞌa.
3Efrainpa sumä murälläśha malcanpis manañamá canꞌachu;
Siria nasyunpa quïdä Damasco puydï malcanpis
manañamá imapischu canꞌa.
Chayurá Siriapis Israelnüñamá canꞌa.
Sumä munayniyu yaꞌa Tayta Diosmari niyá.
Israel mućhuycachisha cananpämi nin4“Chay muyun Jacobpa sumä caynin mirmanꞌamá;
lluy ima cäninpis camacanꞌamá.
5Trïgucta lutuptin ćhacla
quïdaśhannümá quïdanꞌa;
cusicha timpu Refaim pampa
quïdaśhancänümá quïdanꞌa.
6Ulïbus lantacta tapsilcul-tapsilcul pallaptin
juc ishcayllaña quïdaśhannüllañamá quïdanꞌa;
ütac mas altunnincunaćhu, wicćhu cayćhu
quimsa tawa quïdäcänüllañamá quïdanꞌa” nin.
Israelpa Tayta Diosninmari chaynu nin.
7Chay muyunćhülämi nunacunaca Luläninman licaćhaculcanꞌa;
Israelpa Chuya Diosninman yalpaćhaculcanꞌa.
8Maquincunawan lulaśhan uycuna patacnincunacta,
lluy ima lulaśhancunactapis manamá licalcunꞌañachu.
Manañamá mamacha Aseracta alawananpä
śhaycachishan ilucunactapis alawanꞌañachu;
nï insinsiucunactapis taytachanman cañaycälinꞌañachu.
9Chay muyunćhümi Israelpa sumä
murälläśha malcancunapis pasaypi pampaman muyüchisha camacanꞌa;
Hev, Amhor läducunaca israelcunäta
manchaculcal malcanta chunyayäta caćhaycuśhancänümá pasaypi quïdanꞌa.
10Chaynu pasaśhunqui salbaśhüniqui Tayta Diosta unꞌaśhayquipïtamá;
wancanu pacaycuśhüniquita mana yalpaśhayquipïtamari.
Cananꞌa juc dioscunäpämá tuqui-cama lantacunacta lantayanqui;
sumänincunactalämá juccunapi apachimunquipis.
11Talpüluptiqui wiñaytá wiñämunꞌamá;
chay walantinpa waytaytá waytämunꞌamá.
Ñatac llaquicuy muyuncäćhu jampiyta mana atipana ishyay
yaycüluptinmi imactapis nï cusichanquiñachu.
12Licay, ¡achca-achca malcacunap
lüyayninmi lamarpa suynayninnu cacuyan!
¡Nasyuncunäpa apalcaćhayninmi
achca-achca yacu wicapacamuśhanpa suynayninnu cacuyan!
13Malcacunaca chaynu lüyatityapäcuptinpis
Tayta Dios anyäluptinmi ichá calu-calucta ayiculcanꞌa.
Waywa apaśhan amunümá,
pulbüta waywa apaśhannümari ayiculcanꞌa.
14Tardilpuyaptinꞌa sumä manchalicuyllaćhümá Israel cayanꞌa.
Achicäluptinñatacmi ćhïnicünincuna manaña canꞌañachu.
Chaynümá ñacachimäninchiccuna tincüninmannu camacapäcunꞌa.
Chaynümari imanchictapis waycamäninchiccuna camacapäcunꞌa.
Who We AreWhat We EelieveWhat We Do
2025 by iamachristian.org,Inc All rights reserved.
