Levitico 8 - Old Testament Quechua Wanca（QVW）

Aarontawan chulincunactam sasirdütipä ćhulaycun Exo 29.1-37

1Chaypïtam Moisesta Tayta Dios nin:

2“Aaronta lluy chulintinta puśhay tincunanchic carpap puncunman. Jinaman müdanancunacta, japächaycunapä cä asayticta, uycunapä malta wäcacta, ishcay ulu uwishta, canaśhtactapis mana libadürayu tantantintam apanqui.

3Chay tincunapä carpap puncunmactacmi jinantin malcacta juntuchimunqui” nil.

4Chay nishantanüllam Moises jinantin malcäta tincunapä carpap puncunman lluy juntüchin.

5Chayćhümi Moises lluy malcantinta nin: “Cayta lulaycunapämi Tayta Dios nimälanchic” nil.

6Nilculmi Aaronta lluy chulintinta aśhuycachimul yacuwan paꞌala.

7Jinalculmi jatun sutänanta ćhulälun, wiyaw watacunwanpis watälun, ćhawpi sutänantapis ćhulälun. Chaypa janäninmanñatacmi chalicunta ćhulalcul chaypa chalachicunwan watälun.

8Jinaman pichïruntam ćhulälun; chay pichïrunmanñatacmi Urim, Tumim nishancäta winaycula.

9Umanmanñatacmi chucunta ćhuläla. Chay chucup punta lädunmanmi ürunllanllanpïta tablachanu chuya cäcäta ćhuläla. Lluy caynu lulaycula Moisesman Tayta Dios nishantanüllamari.

10Chaypïta Moises japächanapä cä asayticta chalalculmi carpacta lluy cänintinta llusiycula chuya cananpä.

11Chay asaytiwantacmi uycuna patacta lluy cänintinta anćhish cuti llusiycula. Jinaman maqui paꞌacunactapis täcunantinta chächuycula chuya cananpä.

12Chaypïta sasirdütinu japächaycuśha cananpä Aaronpa umanmanmi japächaycunapä cä asayticta Moises llusiycula.

13Jinalculmi Aaronpa chulincunacta pasaycachil jatun sutänawan müdächin. Wiyaw watacunwanpis ćhïla-ćhïlacta watälun, chucuntapis ćhulälun. Chaynu lulaśha cala Moisesman Tayta Dios camachishanmannümari.

14Chaypïtam juchapi uycunanpä cä malta wäcacta atïchimun. Chayćhümi chay uywap umanman Aaron lluy chulintin maquinta ćhulaycapäcula.

15Jinaycuptinmi Moises chay wäcacta ćhipïla. Yawarninwanñatacmi uycuna pataccäpa wälanilänincunactawan lluy muyülïninta dïdunwan llusila chuya cananpä. Chay parti yawartañatacmi uycuna patacpa ćhaquinman jićhaycula. Chaynüpam uycuna pataccäta chuyanchaycula.

16Chaypïta chay uywap allashquinćhu, ñatinninćhu, ishcaynin lulunninćhu wilancunactapis lluy lulunnintintam uycuna pataccäćhu Moises cañaycula.

17Jinaman Moisesman Tayta Dios nishannümi malta wäcap utanta, aychanta, jayunta carpap waśha lädunćhu cañälun.

18Chaypïtam cañaycunanpä cä ulu uwishta atïchimun. Chayćhümi chay uwishpa umanman Aaron lluy chulincunawan maquincunacta ćhulaycapäcula.

19Jinaycuptinmi Moises chay ulu uwishta wañuchila. Yawarnintañatacmi uycuna pataccäpa lluy muyülïninman chächuycula.

20Chaynalculmi ulu uwishcäta uchuy-uchuyllaman cuchulcul umantinta, wilantinta lluy cañaycüla.

21Chaypïta allashquincunactawan caćhpantam paꞌala. Jinalculmi Tayta Diosman tuqui mishqui aśhnä ćhänanpä ulu uwishcäta uycuna patacćhu Moises cañaywan uycula. Caynu lulaycula Moisesman Tayta Dios nishanmannümari.

22Chaypïta Moises apachimula japächaycunapä cä juc ulu uwishcätam. Chay uwishpa umanmanmi Aaronwan chulincuna maquinta ćhulaycälila.

23Jinaycuptinmi Moisesñatac uwishcäta muꞌulun. Jinalculmi yawarninwan Aaronpa allï linlinpa siquinman llusiycula; chaynütac allï maquinpa maman dïdunmanpis, allï ćhaquinpa maman dïdunmanpis llusiycula.

24Chaypïtam Aaronpa chulincunactapis pasaycachimula. Jinalculmi paycunactapis allï linlincunap siquinman, allï maquinpa maman dïdunman, allï ćhaquinpa maman dïduncunamanpis llusiycula. Chaypïta parti yawartañatac uycuna patacpa lluy muyülïninman jićhaycula.

25Chaypïta chay uywap allashquinćhu, ñatinćhu, ishcaynin lulunninćhu wilancunactapis lluy lulunta, allï caćhpantapis uycuna pataccäćhümi Moises cañaycula.

26Jinaman Tayta Diospa canancäćhu mana libadürayu tanta ćhulacu canaśhtapïtam Moises julülun tantacta, panquïquicta asaytiwan chapüśhactapis. Chaytam wilacunätawan allï caćhpancätawan cuscacta ćhulaycun.

27Jinalculmi chaycunacta Aaronman chulintinman uycula. Paycunañatacmi altuman pallalcul Tayta Diosman uycapäcula.

28Jinalcul Moisesman caśhan cutiycachiptinmi pay cañaycula cañanancätawan cuscacta uycuna pataccäćhu. Caymi japächaycunapä uycuśhanca cala. Cay cañaywan uycunaca Tayta Diosman tuqui mishqui aśhnämari ćhaycula.

29Chaypïtam Moises chay aychap pïchunta altuman pallalcul Tayta Diosman uycula. Quiquin Tayta Dios Moisesta camachishannümi japächaycuśha canapä ulu uwish uycuśhancäpa partin tücaycula.

30Jinaman Moises chuyanchanapä cä asaytictawan uycuna patacćhu cä yawarcätam chächuycula Aaronman chulincunamanpis, jinaman müdanancunamanpis. Chaynüpam Aarontawan lluy chulincunactapis müdanantin-camacta japächaycula.

31Chaypïtam Aaronta lluy chulintinta Moises nin: “Tincuna carpap yaycunanćhu aychacta yanuy. Jinalcul japächaycunapä cä canaśhtaćhu tantantintawan micapäcuy. Chaynu micapäcunqui quiquin Tayta Dios nishannümi: ‘Cay aychacta Aaronwan lluy chulintinmi micapäcunꞌa.

32Puchünincunactañatacmi aychactapis tantactapis lluy cañapäcuy.

33Jinalcul tincunapä carpap yaycunaćhu Tayta Dioswan tincuycunällaćhümi anćhish muyun capäcunqui; chay japächaycuśha canayquipä anćhish muyuncunaca camacänancamam capäcunqui.

34Canan caynu japächaycuśha cananpä lulaycapäcuśhayquinu uycälinayquipämi quiquin Tayta Dios camachila.

35Chayurá tincunapä carpap puncullanćhümi tutay muyun anćhishnintin muyunca capäcunqui. Tayta Diospa nishanta cäsupäculꞌa manamá wañupäcunquichu. Chaynu lulapäcunayquipämari nimäla’ ” nil.

36Niptinmi Aaron lluy chulintin lulaycälila Tayta Dios Moiseswan imam nishantanülla.