Nehemias 4 - Old Testament Quechua Wanca（QVW）

Ćhïnicücunämi manalcachiyta jicutapäcun

1Chaynu murällacta śhalcachipäcuśhäta Sanbalat yaćhälulmi sumä piñacülul rabyälun. Chaymi Juda läducunäta mana cäpa licayninwan,

2caśhta-masincunap, Samariap pilyänincunap ñawquin nicuyan: “¿Cay micuypi wañüśha Juda läducunaca imactatan lulacuyalcan? ¿Caśhan śhalcalcachil uywacunacta Tayta Diosninman ‘uycälishä’ niyalcanćha aw? ¿¡Juc muyunllaćhu ishpïlächinmanchun imatá!? ¿¡Pasaypi lupäśha muntunalayä lumicunäwan caśhan śhalcächisha niyalcanćha aw!?” nil.

3Paypa lädunćhu cä Amon lädu Tobiaspis nicuyanmi: “Licayꞌari wic murälla śhalcachicuyninta. Chayman atüllapis ishpïlulꞌa lluymá tunïlunꞌa” nil.

4Chaynu nipäcuptinmi mañaculá: “Tayta Diosllay, uyaliycuyꞌari maynu-maynu jamuyapämaśhancunacta. Chay jamuyäcuynincuna quiquincunamanꞌari cutiycuchun. Ćhïnicünincunap maquincunaman ćhulaycuptiquiꞌari juc malcacunaman prïsu apäśha capäcuchun.

5Murälla śhalcachïcunäta jalutacuyaptinꞌa mana allin lulayninta amari unꞌaycuychu, nïtac juchancunactapis chincaycachiychu” nil.

6Chaypi murällacta jinalla lulay-lulay capäculmi malcaca sumä callpawan cushisha lulapäcuptin ćhawpicama śhalcälächilá.

7Ñatac Jerusalenpa murälla śhalcachishanca acudiycuyaptin, ućhcuncunapis lluyña wićhäśha cacuyaptinmi Sanbalat, Tobias nunawan Arabia, Amon, Asdod lädu nunacunaca sumä-sumä piñacälälin.

8Chaymi Jerusalenman yaycuycul ima mana allincunactapis lulapäcunanpä limanacälälin.

9Jinaptinmi Tayta Diosta mañaculcul chay nunacunäpi licapämänanpä tutay muyun täpäcunacta ćhulapäculá.

10Lluy Juda lädućhu nunacunäñatacmi nicuyalcäla: “Caychica allpacunacta aśhtäcunäpa callpanpis manañam canchu; cay murällacta śhalcachiyta manañam atipachwanchu” nil.

11Chay ćhïnicünïcunapis caynümi nipäcula: “Mayantapis mana musyachillal yaycuyculmi lluy wañüchishun. Chaynüpam śhalcachipäcuśhanca manalcunꞌa” nil.

12Ñatac paycunaćhu yaćhä Juda läducunämi śhapämul ćhuncay-ćhuncay nipämäla: “Chay nunacunaca lluy cunćhacaycälilmi yaycamuyta munacuyalcan” nil.

13Chaymi murällap ipanman tunïsha läducunäman, manalä śhalcachisha cäcunäman lluy nunacunäta ayllu-ayllucta ćhulälá ispädantin-camacta, lansantin-camacta, flïchantin-camacta.

14Chayćhu manchacuśhallaña cayalcäta licälulmi śhalcuculcul yaśhacunäta, puydïcunäta, jinantin malcäta nilá: “Ama manchaculcaychu. Tayta Diosninchic sumä munayniyu manchay caśhantari yalpapäcuy. Chayurá malca-masiquicunapi, walaśh-wamla chuliquicunapi, walmiquicunapi, wasiquicunapi pilyapäcuy” nil.

15Ñatac chay ćhïnicünïcunam ima lulay munaśhancunactapis tantiälälishäta yaćhälälil, jinaman ima lulay munaśhanta Tayta Dios mana caśhanman muyuchishanta yaćhälälil nï yaycapämulañachu. Chaymi imam lulapäcunäcäman lluypis cutipäculá.

16Chay muyunpïmari murälla śhalcachiyćhu partillaña lulapäcula. Partiñatacmi lansanwan, atajachicunwan, flïchanwan chalicu-yupayninwan-cama listu capäcula. Puydïcunäñatacmi Juda nunacunäpa ipanćhu licaycunanpä cayalcäla.

17Murällacta śhalcachïcunaca, lumi aśhtäcunaca, allpa wicapäcunäñatacmi jucnin maquinwan arman apticälälisha-cama lulapäcula.

18Lluy luläcunämari wiꞌawninćhu ispädan ćhulacälälisha-cama lulapäcula. Ñatac imapis captin curnitilla tucäcäñatacmi tucananpä yaꞌap lädulläćhu liwshimäla.

19Yaꞌañatacmi chayćhu cä yaśhacunäta, puydïcunäta jinantin malcantinta nilá: “Lulananchic jatu-jatunmi cayan. Yaꞌanchicñatacmi wicćhu cayćhu calu-calu lulayanchic.

20Chaymi mayćhu cayalpis curnitilla tucamuśhanta uyalilꞌa yaꞌa läduman lluypis juntunacalcämunqui. Tayta Diosninchicmari yaꞌanchicpi pilyanꞌa” nil.

21Chaynu parti nunacunaca lansan apticälälisha-cama täpapäcuptinmi yaꞌacuna inti yalamuśhanpi aśhta inti jiꞌalpunancama lulay-lulay capäculá.

22Chaynütacmi jinantin malcäta nilá: “Cay Jerusalenćhümi lluypis yanapäniquicunawan quïdapäcunqui. Chayćha tutanpa täpapäcul muyunpañatac lulapäcunqui” nil.

23Ñatac manam yaꞌapis, ayllücunapis, yanapänïcunapis, pilyänïcunapis imallapäpis müdanäcunacta juluculcälachu.