Jueces 20 - Old Testament Quechua Wanca（QVW）

Gabaa malcactam tincüninman mućhuchipäcun

1Chaymi lluy Israel caśhtacunaca juc nunanülla Tayta Diospa ñawquin Mizpa malcaman juntunacälälila. Chaynu juntunacüla Dan malcapïta allaycul Beerseba malcäcama, jinaman Galaad läducamam.

2Chayćhümi Israel ayllucunap puydïnincuna cayalcäla. Chayćhütacmi Tayta Diospa malcanpïta tawa paćhac walanga (400,000) pilyäcunapis armantin-cama cayalcäla.

3Benjamin ayllucunäñatacmi yaćhälälila Israel ayllucunaca Mizpaćhu lluy juntunacälälishanta.

Chay juntunacälälisha caśhanćhümi Levi ayllu nunacta tapupäcula: “Má nipämay, ¿imanuypam wañülächila?” nil.

4Niptinmi wañücäpa wayapan nin: “Uywanacuśhá walmïwan jamapaculcänäpämi Benjamin ayllup Gabaa malcanman ćhäpäculá.

5Chayćhümi Gabaa lädu nunacunaca cuntrá śhalcacalcälil jamapaculcäśhá wasiman juntunacälälimun wañuchipämänanpä. Uywanacuśhá walmïtapis wañunancamamari abusälälin.

6Chaymi cay mana allin lulaśhanta, Israel caśhtacunäpa pinꞌayninchic caśhanta yaćhapäcunayquipä ayacta cuchulcul amcuna capäcuśhayquiman apachimulá.

7Chayurá Israel caśhtacuna lluy cayalcal, imacta lulananchicpäpis amcunaćhá imanipäcunquipis” nil.

8Niptinmi juc nunanülla lluypis śhalcacalcälil nicuyalcan: “Manam mayanllanchicpis jamaśhanchicman nï wasinchicmanpis cutichwanchu.

9Chayurá canan-pacha chüsaśhun Gabaa malcaćhu cäcunäwan mayanninchiccuna pilyä puntanapäpis.

10Israel ayllucunäpi ćhunca pilyäpïta jucta, paćhacpïta ćhuncacta, walangapïta paćhacta, ćhunca walangapïta walangacta japächaśhun lluy pilyäcunäpä micuyta apapämunanpä. Juccunäñatacmi Israel caśhtacunäta caynu pinꞌayman ćhulamäśhanchicpi tincüninman mućhuycachï lishun” nil.

11Chaynüpam lluy Israel caśhtacunaca juc nunanülla juntunacälälin chay malcacta mućhuchipäcunanpä.

12Jinaman jinantin Benjamin ayllucunämanmi willacüta caćhälun: “¿Imactañamá caynu-caynütaña lulälälinqui?

13Cay Gabaaćhu pasaypi mana allin nunacunäta maquïman ćhulaycälimuy wañuchipäcunäpä. Chaynüpam mana allincäta Israel caśhtacunäpi chincachishun” nil.

Niptinpis Benjamin ayllucunätá manam imapis uculcälachu Israel caśhta-masin nishancuna.

14Aśhwanpam Benjamin ayllucunaca lluy-lluy malcapi Gabaaćhu juntunacälälin Israel caśhta-masincunawan pilyapäcunanpä.

15Chaymi Benjamin ayllucunaca lluy malcapi ishcay ćhunca sütayu walanga (26,000) ispädanwan armädu-cama pilyapäcunanpä juclla juntanacälälila. Jinaman chay Gabaa lädućhu anćhish paćhac (700) pilyapä allinnin nunacuna mana fintaśham calapis.

16Chaynütacmi anćhish paćhac (700) ichuśhninwan waracawan pilyäcuna aclaśha capäcula. Paycunam mana pantaycullal jucllay ächallactapis asirtaycul ćhächipäcü cala.

17Israel caśhta-masincunañatacmi tawa paćhac walanga (400,000) pilyaypä sumä yaćhaśha-cama capäcula.

Benjamin aylluwan pilyapäcun

18Chaypi Israel caśhtacunaca Bet-el malcaman lipäculmi Tayta Diosta tapupäcula: “Taytay, ¿Benjamin aylluwan mayanní ayllum pilyayta allaycapäcuśhä?” nil. Niptinmi Tayta Dios: “Juda ayllum allaycunꞌa” nin.

19Chaymi Israel caśhtacunaca wälalla śhalcacalcälil Gabaap chimpanman ćhulanacälälin.

20Jinalmi Benjamin ayllucunäman masta aśhuycälil Gabaa malcap chimpallanćhu achacaycälin pilyayta allaycälinanpä.

21Benjamin ayllucunäñatacmi Gabaa malcanpi yalalcälimul ishcay ćhunca ishcayniyu walanga (22,000) Israel caśhta-masincunacta pilyayćhu camacaycüla.

22-24Jinaptinmi Israel caśhtacunaca Tayta Dios caśhancäman lipäcul tutalpunancama waꞌaśhtin nipäcula: “¿Benjamin ayllu wawꞌi-caśhäcunawan yapachun pilyayta allaycapäcuśhä?” nil.

Niptinmi Tayta Dios: “Pilyapäcuy jinalla” nin. Chaymi yapañatac callpanchanacul chay walantinpis punta pilyaśhancällaćhütac Benjamin ayllucunäwan caśhan pilyayta allacaycälila.

25Chayćhümi Benjamin ayllucunaca Gabaa malcanpi caśhan yalälälimul ćhunca pusä walanga (18,000) ispädayü-cama pilyä Israel caśhta-masincunacta camacaycülun.

26Jinaptinmi malcantin Israel caśhtacunaca Bet-elman caśhan lipäcula. Chayćhümi micuytapis mana micapäcul Tayta Diospa ñawpäninćhu tutalpunancama waꞌaśhtin mañaculcäla. Jinaman cañaywan uycunactapis, allinpä cawsaśhanpïpis uycapäculamari.

27-28Ñatac Bet-elćhümi Tayta Diospa limalicuśhan babulca cayäla. Chayćhümi Aaronpa milaynin Eleazarpa chulin Finees sasirdütin cala. Chayćhu Israel caśhtacunämi Tayta Diosta tapupäcula: “¿Benjamin ayllu wawꞌi-caśhäcunawan yapalächun pilyapäcuśhä?” nil.

Niptinmi Tayta Dios nin: “Lipäcuy. Wälamanmi maquiquiman ćhulaycämuśhä” nil.

29Chaymi waquin Israel caśhtacunaca Gabaa malcap muyülïninman ćhulanacälälin.

30Juccunäñatacmi quimsa muyuncäćhu Benjamin aylluncunawan pilyananpä Gabaapa chimpanman punta ćhulanacuśhannu yapa achälälin.

31Benjamin ayllucunäñatacmi malcanpïta caśhan yalalälimun Israel caśhtacunäta puntaćhünüpis camacayninwan. Chayćhu malcapïta caluctaña aticuyalcalmi Bet-elman Gabaa malcaman lï caminucunäćhu, pampacunäćhu quimsa ćhuncactanu (30) Israel caśhtacunäta wañülächila.

32Chaymi Benjamin ayllucunaca nicuyalcan: “Puntacunaćhu llallishanchicnümi llallicuyanchic” nil.

Israel caśhtacunäñatacmi ayipäcula: “Cay caminucama malcanpi yalächimuśhun” nil.

33Chayćhümi Israel caśhtacunaca capäcuśhanpïta juclla yalälälimun Baal-tamar lädućhu pilyapäcunanpä; jinaman Gabaa malcap muyülïninćhu pacaläcunäpis yalatityälälimunmi.

34Chayćhu ćhunca walanga (10,000) sumänin aclaśha-cama Israel caśhtacunam Gabaa malcaman pilyä yaycälälila. Sumä-sumä pilyayca cacuyaptinmi Benjamin ayllucunaca llallichicunantá mana tantiapäculachu.

35Ñatac Tayta Diosmi Israel caśhtacunäpa maquinman Benjamin ayllucunäta ćhulaycula. Chaymi ispädawan pilyä Benjamin ayllucunacta ishcay ćhunca pichayu walanga paćhacniyüta (25,100) wañülächila.

36Chayćhülämi Benjamin ayllucunaca llallïsha capäcuśhanta tantiacälälin.

Benjamin ayllucunaca atiptinmi Israel caśhtacunaca ayïtuculcäla. Chaynüta lulapäcula Gabaa malcap muyülïninćhu pacaläcunäman chalapaculmi.

37Chay pacaläcunämari Gabaa malcaman juclla yaycuycul chayćhu lluy yaćhäcunäta ispädawan camacaycüla.

38Ñatac chay pacacücunämi parti Israel-masinwan limanaculcäla: “Alli-alli untay ishpiptin yaćhapäcunquiñam malcaman yaycälälisha capäcuśhäta.

39Chaymi am ayïcunaca untayta licälälil filtapämunqui Benjamin ayllucunäta camacaycünäpä” nil.

Chayćhu Benjamin ayllucunäñatacmi pilyayta allaycapäcul Israel caśhtacunäta quimsa ćhuncactanu wañülächila. Chaymi ninaculcäla: “Puntacunaćhu llallishanchicnümi llallicuyanchic” nil.

40Chayćhu malcapïta alli-alli untay ishpiyta allacuycuptinñatacmi ichá Benjamin ayllucunaca ipanta muyulcälil licälun untayca janay pachäcamaña ćhäyäta.

41Chayćhümi israelcunaca atiyta allacaycälin. Benjamin ayllucunäñatacmi jananćhüña jatun sasachacuy caśhanta tantiacalälil manchacuypi chucchucuyalcan.

42Chaymi caminunninpa chunyäcäman ayiyta allacaycälilpis manaña atipapäculañachu. Malcapïta śhamücunämari alcansaycul-alcansaycul wañülächila.

43Chaynüpam Israel caśhtacunaca Benjamin ayllucunäta cunćhacaycälil Menuhuapi aśhta Gabaa malcap chimpan inti ishpimunancama camacaycälälila.

44Benjamin ayllućhu ćhunca pusäniyu walanga (18,000) pilyäcunam wañülälila.

45Quïdä Benjamin ayllucunäñatacmi chunyäcäćhu Rimon ulꞌuman ayicuyalcäla. Jinayätam picha walangacta (5,000) caminucunäćhu israelcunaca wañülächila. Gidom läducama atipäcuśhanćhüpis ishcay walanga (2,000) nunacunactalämi lluy camacaycüla.

46Chay muyun Benjamin ayllucunapïta ishcay ćhunca pichayu walanga (25,000) ispädawan sumä pilyäcunam wañuculcäla.

47Süta paćhac (600) Benjamin ayllucunañatacmi chunyäcäćhu cä Rimon ulꞌuman ayiculcäla. Chay ulꞌućhümi tawa quilla capäcula.

48Chaypïtam Israel caśhtacunaca malcan-malcan ashilcul uywactapis, nunactapis, ima talishantapis lluy camacaycälälila. Jinaman lluy malcacunätapis cañaycälälilam.