1 Reyes 10 - Old Testament Quechua Wanca（QVW）

Saba nasyunpa mandacüninmi Salomonman lin 2Cro 9.1-12

1Chaypi Tayta Diospa yanapayninwan, Salomon sumä alli yaćhayniyu caśhantamá Saba nasyunpa mandacünin walmi uyalïla. Chaymi rasunpa sumä yaćhä caśhanta yaćhapaycunanpä sumä sasa tapucuynincunawan śhamula.

2Achca yanapänincunawanmari Jerusalenta śhapämula. Camïlluncunawanmi cargapäcamulapis tuqui aśhnä pirfümicunacta, achca-achca ürucunacta, aläja tuquish lumicunactapis. Chaynu Salomonman ćhaycamulmi lluy tapucuynincunacta tapuycula.

3Salomonñatacmi ichá lluy tapucuynincunacta nilpula. Manam jucllay tapucuyllanpis mana niycuśhá quïdalachu.

4-5Chaynu Salomonpa sumä yaćhayninta, palasyucta, mishqui-cama micuynincunacta, pilyäcunap puydïnincunap wasincunacta, yanapänincunap sumä-cama müdanancunacta, bïnu sirbïnincunacta, jinaman alawana wasićhu Tayta Diospä cañaywan uycälishantapis licälulmi Saba nasyunpa mandacünin walmi äśhalayllaman camälun.

6Chaymi mandacü Salomonta nin: “Sumä yaćhayniyu caśhayquipis, lluy imacunacta lulachishayquipis malcäćhu cayal uyalishänümi rasunpa cacuña.

7Quiquí ñawïwan licaycunäcamalämi lluy nimäśhanta mana quirilächu. Lluy willapämäśhancunapis imallamá. Sumä yaćhayniquiwan lluy lulaśhayquicunaca uyalishäpïpis mas-maslämá caculläña.

8¡Maynu cushishaćh nunayquicuna cayalcan! ¡Muyun-muyun sumä yaćhayniquita uyalipäcul sumä allinćha sirbïniquicuna cayalcan!

9¡Tayta Diosniqui alawäśha cachun! Allinpä licayculmi israelcunäpa mandacüninpä ćhulaycuśhulanqui. Israelcunäta Tayta Dios imaypis cuyalmi mandacünin canayquipä ćhulaycuśhulanqui, allin tincüllanman licaycunayquipä” nil.

10Chaynu nilcuśhanpïmi Saba nasyunpa mandacünin walmica quimsa walanga isun paćhac süta ćhunca (3,960) quïlu üructa, achca pirfümicunacta, aläja tuquish lumicunactapis Salomonman uycula. Chay Saba malcap mandacünin achca-achca uycuśhan pirfümicunänuꞌa manam imaypis Israel caśhtacunäman ćhämulachu.

11Chaynütacmi Ofir1Rey 9.28. malcapi üructa apamu mandacü Hirampa barcuncunapis apapämula, sandalo nishan achca-achca ilucunactawan aläja tuquish lumicunactapis.

12Chay sandalo ilucunäwanmi mandacü Salomon lulachila Tayta Diospa alawana wasinpä, jinaman palasyunpä barandancunacta. Chaynütacmi taquïcunäpäwan tucäcunäpa arpancunactawan arpanila lïrancunactapis lulachipula. Chaynu sandalo ilucta achca-achca apapämuśhantanuꞌa manañamá canancamapis licalanchicchu.

13Mandacü Salomonñatacmi quiquinpa buluntäninpïta Saba nasyunpa mandacünin walmicta rigalaycula. Jinaman lluy-lluy ima munaśhantapis rigalayculam. Jinaycuptinmi lluy liwshïnincunawan nasyunninta cuticula.

Mandacü Salomonpa sumä cänincunawan yaćhaynincuna 2Cro 9.13-24

14Salomonmi alcabälapi ishcay ćhunca ishcayniyu walanga (22,000) quïlu ürucunacta watan-watan ćhasquila.

15Ñatac lluy nigusyanticunaca, lanticücunaca pägapäcuśhanꞌa chayman manam fintaśhachu calapis. Jinaman nigusyanticunaca, Arabia lädup mandacücunaca, Israel lädu puydïcunäpis alcabälacta upäculatacmi.

16Mandacü Salomonmi ishcay paćhac (200) jatućhaćhä-cama atajachicucta ürunllanllanpïta lulachila. Chay atajachicucunaca süta quïlu ćhawpipi-cama ürupi luläśham cacula.

17Chaynütacmi quimsa paćhac (300) tacsha-cama atajachicucunactapis ürupïta lulachila. Ishcay quïlu-yupay ürupi luläśha-camam cacula. Lluy chaycunactam “Libano munti”1Rey 7.2. nishan palasyunman mandacüca ćhulaycachila.

18Jatun täcunan dispächuntapis marfilpïta lulalcachilmi ürunllanllanwan laꞌachila.

19Chay täcunan dispächunmi cala: süta gradayu, ürupi jalupacuyu, uylu waśhayu, pulan wätanćhu maqui ćhulacuyü-cama. Chaypa wätanćhümi juc liyun-cama luläśha śhäcuyalcäla.

20Chaynütacmi chay süta grädacunäćhu wicninćhu cayninćhu süta-cama liyuncuna cala. Chaynu dispächuctá manam mayan mandacüpis mayćhüpis lulachilachu.

21Chaynütacmi mandacü Salomonpa bäsuncunapis, lätuncunapis “Libano munti” nishan palasyunćhu cäcunaca ürunllanllanpïta cacula. Salomon timpu illayca mana licay munaśha captinmi, illaypïtá jucllayllapis nï lulaśhachu cala.

22Mandacü Salomonpa barcuncunamari, mandacü Hirampa barcuncunawan quimsa watapïta-cama ürucunacta, illaycunacta, marfilcunacta, münucunacta, päbu riyalcunactapis Tarsis lädupïta apapämü cala.

23Mandacü Salomonmi jinantin pachäćhu mandacücunäpïta mas cäniyu, mas yaćhayniyu cacula.

24Chaymi lluy-lluy nunacunapis wañupaculcäla mandacü Salomonta licaycuyta, jinaman Tayta Dios yaćhay uycuśhanta uyaliycuytapis.

25Watan-watantacmi rigälucunacta Salomonman apapäcula: ürupi illaypi aläjacunacta, müdanacunacta, armacunacta, pirfümicunacta, cawallucunacta, mulacunactapis.

Mandacü Salomonmi cawallucunactawan carritacunacta lantin 2Cro 1.14-17; 9.25-28

26Awari, mandacü Salomonmi carritacunactawan sillädacunacta lluy juntüchila: walanga tawa paćhac (1,400) carritacunacta, ćhunca ishcayniyu walanga (12,000) cawallucunacta.1Rey 4.26. Chay cawallucunätam laquila pilyananpä carritacuna caśhan malcacunäman, Jerusalenćhu mandacücäta täpä cachacucunämanpis.

27Mandacü Salomonmi Jerusalenman illaycäta alli-alli śhalactanüña juntüchila.Deut 17.17. Chaynütacmi Sefela lädućhu ïgus munti jaćhacunätanu cedro ilucunactapis wiñachila.

28Mandacü Salomonpa cawalluncunacta Egiptopïtawan Coapïtam apapämula. Chaycunapïtamari yanapänincuna lantïnincuna lantipämü capäcula.Deut 17.16.

29Egiptopïmi carritacunäta süta paćhac (600) illaywan lantimü cala. Cawallucunätañatacmi paćhac picha ćhunca (150) illaywan. Mandacü Salomonpïñatacmari Het, Siria läducunäpa mandacünincuna lantipäcu capäcula.