Esdras 7 - Old Testament Quechua Wanca（QVW）

Jerusalenmanmi Esdras ćhäpäcun

1Chaycuna pasäluptin Esdras śhutiyu nunam Persiap mandacünin Artajerjes mandacuyaptin Babiloniapïta cutimula. Cay Esdrasmari Seraiaspa chulin, Seraiasñatac Azariaspa chulin, Azariasñatac Hilciaspa,

2Hilciasñatac Salumpa, Salumñatac Sadocpa, Sadocñatac Ahitobpa,

3Ahitobñatac Amariaspa, Amariasñatac Azariaspa, Azariasñatac Meraiotpa,

4Meraiotñatac Zeraiaspa, Zeraiasñatac Uzip, Uziñatac Buquip,

5Buquiñatac Abisuapa, Abisuañatac Fineespa, Fineesñatac Eleazarpa, Eleazarñatacmi wamä puydï sasirdüti Aaronpa chulin cala.

6Cay isquirbï Esdrasmari Israelpa Tayta Diosnin Moisesman uśhan camachicuyta sumä yaćhaculläla. Paywan Tayta Dios cayaptinmari ima mañacuśhantapis mandacü Artajerjes uycula. Paymari Babiloniapïta cutimula.

7Paywantacmi Babiloniapïta Jerusalenman cutipämula waquin israelcuna, sasirdüticuna, levitacuna, taquïcuna, puncu täpäcuna, alawana wasicta sirbïcunapis. Caynu cutipämula anćhish wataña mandacü Artajerjes mandacuyaptinmari.

8Chaymi mandacü Artajerjespa anćhish wata, picha quilla mandacuyninćhu Jerusalenman Esdras ćhämula.

9Chayurá Babiloniapïta wamä quillap allaycuynin muyunninćhu yalamulmi Tayta Diospa yanapayninwan Jerusalenman allin ćhämula picha quillap allaycuy muyunninćhu.

10Chaynu Esdrasta Tayta Dios yanapäla llapan śhunꞌunwan paypa camachicuyninta, yaćhachicuyninta, lulayman ćhulaycuptin jinaman israelcunäta yaćhaycachinanpä sumäta yaćhaycuptinmari.

11Canan má, Israelman Tayta Dios yaćhachishancunäta, camachishancunäta sumä yaćhä, isquirbï sasirdüti Esdrasmanmi mandacü Artajerjes cartacta apachila. Chay cartaćhümi caynu niña:

12“Mandacücunap puydïnin mandacü Artajerjesmi limaycamuc janay pachäćhu Tayta Diospa camachicuynincunacta yaćhä sasirdüti Esdrasta.

13Caytamari camayächí: Mandacuynïćhu cä mayan israelcunapis, masqui sasirdütipis ütac levitapis Jerusalenta amwan liyta munäcunacá lipäcuchun.

14Yaꞌa mandacücämá anćhish licaycünïcunawan limanacuycul caćhayac Tayta Diospa camachicuyninta uywaśhayquimannu Juda läducta Jerusalenta tuquicta licaycamunayquipä.

15Jinaman Jerusalenćhu yaćhä israelcunäpa Tayta Diosninpäri apay yaꞌa mandacüca yanapänïcunawan llapan śhunꞌüwan uycälishá illaycunätawan ürucunäta.

16Chaynütac apapäcuy Babilonia lädu nunacunaca illaywan üru upäcuśhuśhayquitapis. Jinaman Jerusalenćhu cä Tayta Diospa alawana wasinpä nunacunaca sasirdüticunaca llapan śhunꞌunwan uycapäcuśhancunactapis apapäcuy.

17Chay illaycunäwanñatac lantipäcuy: wäcacunacta, ulu uwishcunacta, uña uwishchacunacta, uycuna micuynintin-camacta, bïnuntin-camacta, Jerusalenćhu cä uycuna patacćhu Tayta Diosniquiman uycälinayquipä.

18Parti quïdä illaytawan üructañatacmi Tayta Diosniquip munayninmannu amwan liwshïniquicuna imaćhüpis gastaycälinquiman.

19Ñatac Tayta Diosniquip alawana wasinćhu sirbichicunapä cäcunäta uycuśhuśhayquitam ichá quiquiqui ćhulaycunqui Jerusalenćhu cä alawana wasiman.

20Sïchuśh Tayta Diosniquip alawana wasinpä imapis pishiptinꞌa, yaꞌa mandacücäpa illaynïwan, ürüwanmi pägaycunquiman.

21Chayurá Eufrates mayup chinpanćhu cä malcacunäpa illay juntünincunactam yaꞌa mandacü Artajerjes ní: Janay pachäćhu cä Tayta Diospa camachicuyninta sumä yaćhä sasirdüti Esdrastamari lluy ima mañaśhantapis uycälinqui.

22Uycälinquiman aśhta quimsa walanga quimsa paćhac (3,300) quïlu illayta, aśhta ishcay ćhunca ishcayniyu walanga (22,000) quïlu trïgucta, aśhta ishcay walanga ishcay paćhac (2,200) litru bïnucta, aśhta ishcay walanga ishcay paćhac (2,200) litru asaytictam. Caćhictañatacmi lluy mañaśhanta uycälinqui.

23Alawana wasinpä janay pachäćhu cä Tayta Dios lluy mañaśhantari juclla lulaycäliy. ¡Yanꞌalätac mandacuynïmanpis chulïcunamanpis piñacuynin ćhämü imanman!

24Jinaman alcabälactapis amañari pägapäcuchunchu sasirdüticunaca, levitacunaca, taquïcunaca, puncu tapäcunaca, Tayta Diospa alawana wasinćhu sirbïcunäpis.

25Amñatac Esdras, Tayta Diosniqui yaćhayta uycuśhuśhayquimannu Diospa camachicuyninta yaćhäcunäpi tincüninman licaycücunacta, puydïcunacta ćhulaycuy. Paycuna Eufrates mayup chimpan läducunäćhu camachicuy yaćhäcunäta licaycunanpäri ćhulaycuy. Chay camachicuyta mana lisïcunätañatac ichá yaćhaycachichun.

26Ñatac Tayta Diosniquip camachicuyninta, jinaman yaꞌa mandacüca camachishätapis mana cäsucücunacá sumä mućhuycachisham canꞌa: wañuchiywan ütac malcanpi alapacüśha caywan ütac cänincunacta quitäśha caywan ütac carsilman wićhaśha caywanpis” nil.

27Chayta lïgiyculmi Esdras nin: “Awquillücunap Tayta Diosnin allinpä licaycuśha cachun. Tayta Diosmari mandacü Artajerjespa śhunꞌunman ćhulaycula Jerusalenćhu cä Tayta Diospa alawana wasin altuman juluycuśha cananpä.

28Jinaman Tayta Diosmari sumä-sumä cuyacü cayninwan yaꞌacta yanapaycaman mandacüca, yanapänincuna, tantiachïnincuna allinpä licaycälimänanpä. Chaynu Tayta Dios yanapaycamäśhanta licayculmari Israelpa puydïnincunacta juntuyculá yaꞌawan cusca Jerusalenman cutipämunanpä” nil.