Proverbios 8 - Old Testament Quechua Wanca（QVW）

Yaćhaycämi ayaycaćhan

1¿Manachun yaćhayca ayaycaćhayan imamá?

¿Manachun tantiayca apalcaćhayan imatá?

2Yaćhayca altu ulꞌucunäćhu, caminucuna

tincupulaśhancunaćhu śhaycucuyculmá willacun.

3Malcap jatun puncunpïmi,

chay yaycunancäpïmari caynu ayaycaćhayan:

4“Nunacuna, amcunactamá ayayalcac;

lluytamá limapayalcac.

5Mana tantiayniyu walaśhcuna, tantiayniyu cayta yaćhapäcuy;

luclucuna, müsucuna licaćhaculcayꞌari.

6Uyalipämay, sumäcunactamá limapäśhayqui.

Limaynïcuna tincüninman-camamá limaycunꞌa.

7Shimí rasuncällactamá niycun;

mana allin limaycunätá millachicunmá.

8Allin rasuncällactamá niycú;

shimïćhuꞌa casquicuyca, yanꞌalcuna uchucllapis manamá caycunchu.

9Tantiacäpá limaśhäcuna allinmá;

yaćhayniyücäpá allin rasunmá.

10Illaycäpi mastá yaćhachicuynïta ćhasquiycuy;

allinnin ürüpi mastá yaćhayniyu cayta ashiycuy.

11Yaćhaycämá ima aläjacunapïpis mas ćhaniyu;

¿imallá tincuycachisha canmanmá?

12“Yaꞌa yaćhayca allin tantiaycäwanmi cawsaycú;

allin yaćhayniyu caytawan rasuncätam uywaycú.

13 Tayta Diosta manchacüca mana allincunäta millachicunmá.

Yaꞌa ćhïnicümi: nunatucuycäta, allintucuycäta,

mana allin cawsaycäta, juyu limaycunätapis.

14Yaꞌawanmi cayan allin limapayca,

allin lulaycuyca; tantiaycäpis, munaycäpis yaꞌapämá.

15Yaꞌa yanapaycuptïmi mandäcunaca gubirnapäcun;

yaꞌa yanapaycuptïmi puydïcunäpis tincüllanman-cama allichaycapäcun.

16Yaꞌawanmi lluy mandäcunaca mandapäcun;

yaꞌawanmi tincüninman cäraycücunäpis jinantin allpäćhu cäraycapäcun.

17“Cuyamäcätá yaꞌapis cuyämi;

ashimäcunacá talipämanmi.

18Yaꞌawanmi cayan rïcuyaycäpis,

altuman juluycuśha caycäpis,

wiñaypä cäniyu caycäpis, tincüninman lulaycuycäpis.

19Yaꞌapa wayuyní sumänin ürupïpis mas-mas allinmi;

yaꞌa uycuśhäcá illaycäpïpis mas-mas allinmi.

20Awari, allinnin caminupam yaꞌa puśhaycú;

tincüllanpam yaꞌa puliycachí.

21Cuyamäcunätá yaꞌami alli cäniyüman muyuycachishä;

wasinmanpis alli-allictamá juntaycachishä.

22“Allaycuycäćhu Tayta Dios yaꞌacta uywamälañamá;

imallactapis manalä lulalmá yaꞌacta licalichimäla.

23Imapis manalä captinmá yaꞌa cayculäña;

cay jinantin allpaca manalä captinmá yaꞌa cayculäña.

24Jatućha lamarcunaca manaläpis captinmá yaꞌacta licalichimäla;

pucyucuna ućhacuna manaläpis captinmá yaꞌacta lulamäla.

25Yaꞌacta waćhacamaptin ulꞌunpalcücunaca,

jatućha ulꞌucunaca manalämá calachu.

26Cay allpäpis, ima cäcunäpis,

nïtac cay jinantin allpäta licalichinanpä cä pulbüllapis manalämá calalächu.

27Lamarpa jananman janay pachäta licalichiptinpis,

yaꞌa cayäläñamá.

28Sïlüman pucutaycäta tacyaycachiptin,

lamar lulinćhu yacucunäta tacyaycachiptinpis cayäläñamá.

29Lamarcunaca mana yalapämunanpä maycama capäcunanpä unanchaycuyaptinpis,

cay allpäpa simintuncunacta ćhulaycuptinpis yaꞌa cayäläñamá.

30Chaycunacta Tayta Dios lulaycuśhanćhu cuscamá cayalcälá;

chayćhümá imay timpupis paypa ñawpäninćhu cushishalla cayälá.

31Cay allpäćhu lluy lulaśhancunaćhümá cushiculá;

lluy nunacunäta licalmá cushiculá.

32“Iju, canan sumäta uyaliycapämay,

yaćhachishämannu cawsäcunäpä sumä cushicuymá.

33Limapäśhäta cäsucamal yaćhayniyu capäcuy;

yaćhaycäta ama jalutaculcaychu.

34Nishäta uyalicücunäpá sumä cushicuymi;

wasïpa puncullanćhu licat-licatllaña

muyun-muyun ashimäcunäpá sumä cushicuymi.

35Yaꞌacta talimäcá cawsaytam talin;

Tayta Diospa llaquipaynintapis ćhasquiycunꞌamá.

36Yaꞌacta ipanchamäcäñatacmi ichá quiquinpa mana allinninta ashicuyan;

yaꞌacta ćhïnicamäcá wañuycätamá cuyapäcun” nil.