1Chay walmin Ester cumbidu ayachishanmanmi mandacüca Amanwan lipäcula.
2Ishcay muyuncäćhu bïnucta upyayalcalmi Esterta mandacüca yapa nin: “Mama Ester, imacta munaśhayquitapis mañamay jinalla, uycuśhayquimá. Masqui cay mandacuśhá nasyuntapis ćhawpipi uycucmanmi” nil.
3Niptinmi walmin Ester: “Tayta mandacüní, śhunꞌuyquipänu caycuptinꞌa, ampä allin captinꞌa, mañacuc yaꞌap bïdätawan malcäpa bïdantapis salbaycamänayquipämari.
4Yaꞌactawan malcätamá lanticäläliman lluy camacaycüśha capäcunäpä. Uyway nunapä lanticälälimaptinpis allinćha canman, manaćh piñachicmanchu cala. Ñatac camacaycälälimaptinꞌa am mandacünïpäćha sumä mana allin canꞌa, imaypis śhalcachiyta mana atipanaćh canꞌa” nil.
5Niptinmi mandacü Asuero: “¿Mayantá chaynu lulananpä cärayu caña? ¿Mayćhütá chay nunaca cayan?” nin.
6Niptinmi Ester: “Chay ćhïnicamänica, cuntrá śhalcüca cay juyu Amanmi caña” nin.
Chay nishanta Aman uyalïlulñatacmi mandacücäpa, jinaman Esterpa ñawpäninćhu chucchuyllaman camälun.
7Mandacü Asueroñatacmi śhunꞌunpis timpuyaptin upyaśhantapis caćhaycul palasyup wirtanman licun. Amanñatacmi mandacüca wañuchinanpä cacuyaptin chayćhu quïdacuycul salbaycunanpä Esterta ruygacücuyan.
8Palasyup wirtanpi mandacüca cumbidu caśhanman cutiycamunanpämi, Ester iscataläśhanman unꞌulacuycul Aman pilatalayäña. Chaymi mandacüca: “¡Ima! ¿¡Quiquïpa wasïćhüchun walmïtapis ‘allaycuśhä’ niyanquimanlä imatá!?” nicuyan.
Chaynu mandacüca nïluptin-pachallamá Amanpa cäranta täpälälin.
9Jinaptinmi mandacücäpa jucnin yanapänin capäśha Harbona nin: “Amanpa wasin sircanćhümi ishcay ćhunca pichayu (25) mitru ilu śhaycächisha cayan. Chayta quiquin Amanmari śhalcächila allin lulaycuśhüniqui Mardoqueocta walcachinanpälä canpis” nil.
Niptinmi mandacüca: “Chayurá chayman quiquintari walcälälimuy” nin.
10Chaynüpamari Mardoqueocta walcachinancäman quiquin Aman walcäśha cala. Chaynüta lulaycachilmari mandacücäpa piñacuynin jawcayaycula.
Who We AreWhat We EelieveWhat We Do
2025 by iamachristian.org,Inc All rights reserved.
