Deuteronomio 21 - Old Testament Quechua Wanca（QVW）

Wañüśha nuna licalïluptin imactapis lulananpämi nin

1“Tayta Diosniqui uycuśhuśhayqui allpaćhu cayalcaptiqui ćhaclaćhu mayan nunapis wañüśha licalïluptin, jinaman mayan wañuchishantapis mana yaćhalꞌa,

2yaśhacunäwan fiscunämi lipäcunꞌa. Paycunam chay wañüśha nuna caśhanpi mïdipäcunꞌa sircanćhu cä malcacunaca maynu calu capäcuśhantapis.

3Chaymi sircaćhu cä malcap yaśhancuna japächanꞌa manalä yügu wataśha wäcacta.

4Chaytam yacu linanman, mana äraśha, mana talpuśha pampaman yaśhacunaca atipäcunꞌa. Chayćhümi wäcap cuncanta iwilcul wañuchinꞌa.

5“Chaypïtam Tayta Diosniqui aclaśhan Levi ayllu sasirdüticunaca chayman lipäcunꞌa. Paycunamari Tayta Diosta sirbinanpä chaynütac allin cananpä niycunanpä ćhulaśha capäcula. Jinaman lïtunacuyćhu ütac pilyucunaćhu imanuy caśhantapis aringlaycünanpämi capäcula.

6Chaypïta nuna wañüśhap sircanćhu cä malcacunap yaśhancunam maquinta paꞌaculcanꞌa iwïsha wäcap janäninćhu.

7Jinalculmi caynu nipäcunꞌa: ‘Cay nunacta yaꞌacunachu manam wañuchipäculá nïtac imanuy wañuśhantapis licapäculächu.

8Tayta Diosllay, pampachaycälillämay juluycuśhayqui Israel malcayquita; wañüchisha nunapïta ama juchachaycälillämaychu’ nil. Chaynüpam wañüchisha nunapïta pampachaycuśha capäcunqui.

9Chaynu Tayta Diospa ñawquinćhu imapis allincällacta lulaycälilmi chay wañüchisha nunapïta mana juchayüña capäcunqui.

Imaymana camachicuycunapïmi nin

10“Sïchuśh ćhïnicüniquicunawan pilyaptiqui Tayta Diosniqui maquiquiman lluy ćhulaycämuptin duyñuchacälälishaña cayalcal,

11chayćhu jucnin tuquish wamla śhunꞌuyquipänu captinꞌa walmicüluy.

12Chayćha wasiquita puśhäluptiqui ächanta siplay-siplayta lutucunꞌa, shilluncunactapis cuchucunꞌa.

13Jinaman ćhämuśhan müdanantam julucunꞌa. Jinalculmi chay wasiquićhu quilla intïru taytanpïta mamanpïta waꞌanꞌa. Chaypïta casaracälälilñam walmi cariña capäcunqui.

14Ñatac śhunꞌuyquip munaśhannu mana captinꞌa librictam caćhaycülunqui. Pinꞌayman ćhulaśhayquipam manaña lanticunquichu nïtac uyway nunapänüpis licanquiñachu.

15“Sïchuśh juc wayapap ishcay walmin captin jucninta cuyanꞌa, juccätañatac mana. Chay ishcayninćhüpis walaśh chulin captin, mana cuyaśhancäćhütac wamä walaśh chulin licalïlunꞌa;

16jinaptin chulincunacta tücachinan muyunca ćhämuptin cuyaśhan walminćhu cä chulintachu manamá wamä chulintanu tücachinꞌa. Chayta lulalꞌa mana cuyaśhan walminćhu cä rasun wamä chulintaćh mana allinta lulanman.

17Aśhwanpam rasun wamä chulinta custumrinmannu dublictalä tücachinꞌa. Wamä callpanwan lulacuśhan captinmi wämä chulicta tücachinancä tücaycun.

18“Sïchuśh taytantapis mamantapis mana cäsucu pasaypi cullu linli captin, masqui asutiptinpis mana cäsucuptinꞌa,

19taytanwan mamanmi malcap puncunćhu cä yaśhacunäman puśhälälinꞌa.

20Chayćhümi malcap yaśhancunacta nipäcunꞌa: ‘Cay chulí mana cäsucu pasaypi cullum. Limapäśhäcunacta mana cäsucümi; pasaypi micuylla micu shincacuycunallaćhu pulicümi’ nil.

21Chaynu niptinmi malcantin nunacunaca tamshaywan wañülächinꞌa. Chaynüpam amcunaćhu mana allin cäcäta chincachipäcunqui. Jinapäcuptiquim jinantin Israel caśhtacunaca yaćhapäcul manchaculcanꞌa.

22“Sïchuśh mayanpis mana allinta lulaśhanpi lantaman walcaycul siꞌilulꞌa,

23chay ayäta amam walächi chacatalayäta caćhaycapäcunquichu. Aśhwanpa chay muyunllam pampäśha canꞌa. Iluman chacatäśha wañücunacá Tayta Diosniquip cäraycuśham cayan.Gal 3.13. Chaynüpam Tayta Diosniqui tücachishuśhayqui allpäta anlapä ama licachipäcunquichu.