Job 20 - Old Testament Quechua Wanca（QVW）

Mana allin nunacunaca imanuypapis camacananpämi Zofar liman

1Niptinmi Naamat lädu Zofar nin:

2“Lluy nimäśhayquita uyalil manañamá jawcachu cacüman;

chaymi niycuśhayqui.

3Palacuyniquiwan umätapis nanächimanquiñamá;

chaymi niycunacpä allin yaćhayní niycaman.

4“¿Manachun cay pachäćhu nunaca caśhanpi

chaynu caśhanta tantianqui imatá?

5¿Manachun yaćhanqui mana allin nunäpa cushicuynin pasacülla caśhanta imamá?

¿Manachun tantianqui juchasapacunäpa cushicuynin camacälla caśhanta imatá?

6Chay nunap nunatucuynin masqui sïlücama captinpis,

jatunchacuynin pucutaycäcama ćhaycuptinpis,

7ismayninnümá pasaypipä chincacunꞌa.

Apanacuśhancunäñatacmi: ‘¿Imatá pasällan?’ nipäcunꞌa.

8Muspaynüllamá chincacunꞌa; suyñuynüllamá pasacunꞌa.

Manañamá mayanpis taliycunꞌachu.

9Licäcunap ñawincuna manañamá licaycunꞌañachu;

chay caśhanca manañamá yalpalcunꞌañapischu.

10Chulincuná wacchacunätamá ruygapaculcanꞌalä canpis;

suwacuśhancunätamari cutiycachipäcunan canꞌa.

11Callpallanćhu cayaptinlämá tulluncunapis camacanꞌa;

müsullalä cayaptinlämi allpäman cutiycunꞌa.

12“Chay mana allin nunap masqui mana allinca shiminćhu mishquiptinpis,

allunpa lulïninman pacaptinpis,

13shimillanćhu mishquillacta cachiptinpis,

shimi-lulïllanćhu mishquichicuptinpis,

14patanćhümi puchꞌülunꞌa;

culibraypa bininunnümi lulïninćhu licalïlunꞌa.

15Ima ayca cänincuna lacsaśhantapis lansapacämunꞌamá;

Tayta Diosmari patanpïta lluy aćhïmunꞌa.

16Lacsaśhanca bininu-yupaymá cacunꞌa;

sumä bininuyu culibraypa caćhuśhannümá cacunꞌa.

17Manañamá mayunu cä mishquictapis licanꞌañachu.

Manañamá yacunu cä lichictapis mallinꞌañachu.

18Lluy ima tawacuśhancunactapis cutiycachinꞌañamá;

ima cänincunactapis manañamá prubichaycunꞌañachu.

19Chaynu caycunꞌa wacchacunäta alapaculcul jinanllanta caćhaycuśhanpïtamari.

Jinaman mana lulacuśhan wasicunacta duyñuchacuycuśhanpïmari.

20Läga-cayninwan ima wañupacuśhantapis taliycümi cala;

ñatac manamá imaypis maćhaycüchu cala.

21Läga-cayninwan imactapis lacsananpä manañamá imapis calañachu;

chay allin caynin manamari tacyaycunchu.

22Lluy ima cänincuna tawalayaptinpis llaquicuyllaćhümá canꞌa;

mana allincäpa maquinmanmá palpunꞌa.

23“Maćhacuycul cayaptinmá, Tayta Dios

piñacuyninta ćhaycachinꞌa;

lücu tamyactanümá rabyacuyninta ćhaycachimunꞌa.

24Masqui jïrru armapi ayiptinpis

brunsipi flïchamá tucsïlunꞌa.

25Chay flïcha aychanman yaycülulmá

śhunꞌunpa yalämunꞌa.

Sumä-sumä manchacuymari niticalpunꞌa.

26Lluy cänincunacta pasaypi itiwyaycällamá ñiticalpunꞌa;

sumä walayä ninamá quiquintapis

wasinćhu lluy quïdäcunätapis camacaycülunꞌa.

27Mana allin lulaynincunacta sïlümá camalachinꞌa;

paypa cuntran allpämá śhalcunꞌa.

28Tayta Diospa piñacuynin sumä llüllanümá,

paycunap lluy cänincunacta apacunꞌa.

29Cayta ćhasquipäcunanpämari quiquin Tayta Dios unanchala;

chaycunamá chay mana allin nunacunäpa tücänin” nil.